قارا قۇرلىقتىڭ ءار قيىرىنان جينالعان 24 ەلدىڭ اياقدوپ شەبەرلەرى التى توپقا ءبولىنىپ, ءوزارا كۇش سىناستى. سولاردىڭ اراسىنان سۋىرىلىپ شىققاندارى پلەي-وفف باسەكەلەرىنە قاتىستى. ۋاقىت وزا مىقتىلار مەن وسالداردىڭ اراجىگى اجىرادى. جارتىلاي فينالدا نيگەريا مەن وار ءبىراز تىرەستى. 65 جانە 90-مينۋتتاردا ولار پەنالتيدى الما-كەزەك ءساتتى ورىندادى – 1:1. قوسىمشا ۋاقىتتا ەسەپ وزگەرگەن جوق. سودان كەيىن «فۋتبول لوتەرەياسىنا» جۇگىنۋگە تۋرا كەلدى. بۇل رەتتە نيگەريالىقتاردىڭ باعى جاندى – 4:2. كەلەسى ماتچ كوت-د’يۆۋار مەن كونگو اراسىندا ءوتتى. بۇل باسەكەنىڭ تاعدىرىن 65-مينۋتتا سەباستەن اللە سوققان جالعىز دوپ شەشتى – 1:0.
ابيدجاندا نيگەريا مەن كوت-د’يۆۋار باس جۇلدەنى ساراپقا سالدى. بۇل تارتىس الاڭ يەلەرىنىڭ پايداسىنا شەشىلدى. 21-مينۋتتا قوناقتار قورعاۋشىسى ۋيليام ترووست-ەكونگ ەسەپ اشسا, 62 جانە 81-مينۋتتاردا فرانك كەسسي مەن سەباستەن اللە ەكى گولمەن جاۋاپ قايىردى – 1:2. ال قولا مەدال ءۇشىن باسەكەدە وار-دىڭ ويىنشىلارى كونگونى پەنالتيدەن ۇتتى – 6:5.
