تاكسي جۇرگىزۋشىسىن پىشاقتاپ كەتكەن ەكى ءجاسوسپىرىم سوتتالدى

الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى حابارلاعانداي, سوت الماتىدا بولعان تاكسي جۇرگىزۋشىسىنىڭ ولىمىنە قاتىستى قىلمىستىق ءىس بويىنشا ۇكىم شىعاردى.

كامەلەتكە تولماعان ەكى جاسوسپىرىمگە قىلمىستىق كودەكستىڭ ءۇش بابى (99-باپتىڭ 2-بولىگى, 7, 8-بولىمدەرى, 200-بابىنىڭ 2-بولىگى, 1-ءبولىمى, 188-بابىنىڭ 2-بولىگى, 1-ءبولىمى) بويىنشا ايىپ تاعىلىپ وتىر. ولار 2023 جىلدىڭ جازىندا شىمكەنتتەن الماتىعا دەيىن جەتۋ ءۇشىن تاكسي شاقىرعان. مەجەلى جەرگە جەتكەن كەزدە ولار جۇرگىزۋشىگە 40 مىڭ تەڭگە تولەۋدەن باس تارتىپ, الدىن الا كەلىسىم بويىنشا ونى ءولتىرىپ كەتكەن.

«سوتتالۋشىلار جۇرگىزۋشىگە بىرنەشە رەت پىشاق جاراقاتىن سالعان, سونىڭ سالدارىنان جۇرگىزۋشى وقيعا ورنىندا كوز جۇمدى. كەيىن سوتتالۋشىلار جابىرلەنۋشىنىڭ كولىگىن ايداپ, 80 مىڭ تەڭگە تۇراتىن ۇيالى تەلەفونىن ۇرلاپ كەتكەن», دەدى سوت.

ايىپتاۋشى تاراپ ايىپتالۋشىلاردى ون جىلعا باس بوستاندىعىنان ايىرۋدى سۇرادى. كامەلەتكە تولماعاندار وزدەرىنىڭ كىناسىن مويىندامادى. 

«سوت ۇكىمى بويىنشا سوتتالۋشىلار قاساقانا ادام ولتىرگەنى ءۇشىن (قىلمىستىق كودەكستىڭ 99-بابى 1-بولىگى بويىنشا) كىنالى دەپ تانىلىپ, ارقايسىسى 12 جىلدان باس بوستاندىعىنان ايىرىلدى. ۇكىم زاڭدى تۇردە كۇشىنە ەنگەن جوق», دەپ حابارلادى سوتتىڭ ءباسپاسوز قىزمەتى.