فوتو: qazaqstan.tv
ۇكىمەت ساعاتىندا ەكولوگيا جانە تابيعي رەسۋرستار جانە توتەنشە جاعدايلار مينيسترلىگى بيىلعى جازدا ورمان ءورتىنىڭ الدىن الۋ ماسەلەسىن تالقىلادى.
ەكولوگيا جانە تابيعي رەسۋرستار ءمينيسترى ەرلان نىسانباەۆ تابيعي ورتتەردىڭ الدىن الۋ جانە ولاردى جويۋ جۇيەسىن كۇشەيتۋ ماقساتىندا ەكولوگيا مينيسترلىگى مەن توتەنشە جاعدايلار مينيسترلىگىنىڭ بىرلەسكەن بۇيرىعىمەن تابيعي ورتتەردى جويۋ سالاسىنداعى ۋاكىلەتتى ورگاندار مەن ۇيىمداردىڭ ءوزارا ءىس-قيمىلىنىڭ الگوريتمى بەكىتىلگەنىن ايتتى.
«الگوريتمدە مەملەكەتتىك ورمان كۇزەتى دە, اۋىل شارۋاشىلىعى مينيسترلىگى قىزمەتكەرلەرى دە جاعدايدى باعالاپ, ورمان ءورتى بولعان جاعدايدا قوسىمشا كۇشتەردى تارتۋ تۋرالى شەشىم قابىلدايدى. سونىمەن قاتار الگوريتم اۆياتسيا مەن بولىمشەلەردى جۇمىلدىرۋ ماسەلەسىن رەتتەيدى», دەدى نىسانباەۆ.
مينيستر ورمان ورتتەرىن ءسوندىرۋ بويىنشا ءبىلىم مەن تاجىريبە دەڭگەيىن ارتتىرۋ ءۇشىن مەملەكەتتىك ورگاندار ازاماتتىق قورعاۋ اكادەمياسىنىڭ بازاسىندا مەملەكەتتىك ورمان كۇزەتى مەن ورمان شارۋاشىلىعى قىزمەتكەرلەرىن وقىتۋ باعدارلاماسى بەكىتىلگەنىن مالىمدەدى.
سونداي-اق ۆەدوموستۆولار الداعى جازدا اۋا تەمپەراتۋراسى وتكەن جىلمەن سالىستىرعاندا جوعارى بولاتىنىنا نازار اۋداردى. «قازگيدرومەت» رمك-نىڭ اقپاراتىن العا تارتقان مينيسترلىكتەر سەمەيدە جاز مەزگىلىندە بولاتىن اۋا تەمپەراتۋراسىنا ەرەكشە توقتالدى.
«بىلتىر جازدا سەمەيدە كەي كۇندەرى اۋا تەمپەراتۋراسى 40-44 گرادۋسقا جەتتى. قازگيدرومەتتىڭ مالىمەتىنشە, بيىل ەلىمىزدە جازدا ورتاشا تەمپەراتۋرا 19-23 گرادۋستى قۇراپ, 40 گرادۋس جانە ودان دا جوعارى بولادى دەپ بولجانىپ وتىر. ىستىق اۋا رايى ورمان ءورتىنىڭ بولۋ ىقتيمالدىعىن جوعارىلاتادى», دەدى توتەنشە جاعدايلار ۆيتسە-ءمينيسترى باۋىرجان سىزدىقوۆ.
