بۋكينگەم سارايى تاراتقان مالىمەتتە چارلز پاتشانىڭ قاتەرلى ىسىكتىڭ قاي تۇرىنە شالدىققانى ايتىلماعان. ول وتكەن دۇيسەنبىدەن ەم قابىلداۋدى باستادى. وسى كەزەڭدەگى كورولدىڭ كەي مىندەتتى كەيىنگە شەگەرىلە تۇرماق. ازىرگە دارىگەرلەر تىيىم سالمايىنشا پرەمەر-مينيستر ريشي سۋناكپەن اپتا سايىنعى كەزدەسۋى سەكىلدى قىزمەتى جالعاسا بەرەدى.
وسى جاڭالىقتان كەيىن ۇكىمەت باسشىسى ريشي سۋناك كورولگە تەزىرەك جانە تۇبەگەيلى ساۋىعىپ كەتۋىن تىلەدى. سونداي-اق لەيبوريستتىك پارتيا باسشىسى سەر كەير ستارمەر مەن وكىلدەر پالاتاسىنىڭ سپيكەرى سەر ليندسي حويل پاتشاعا ساۋلىق تىلەدى.
اقش پرەزيدەنتى دجو بايدەن الاڭداۋشىلىق ءبىلدىرىپ, كورولمەن سويلەسەتىنىن ايتتى. تۋيتتەردەگى پاراقشاسىندا كەيىنىرەك «قاتەرلى ىسىك دياگنوستيكاسى, ەمدەۋ جانە امان قالۋ ءۇمىت پەن تۇبەگەيلى باتىلدىقتى قاجەت ەتەدى. دجيل ەكەۋمىز بىرىككەن كورولدىك حالقىنا ۇلى مارتەبەلىنىڭ جەدەل ساۋىعىپ كەتۋىن سۇراپ دۇعا ەتەمىز», دەپ جازدى اق ءۇي باسشىسى.
بريتان كورولدىگىنىڭ جازىلماعان زاڭى بويىنشا مونارح ءوز مىندەتىن اتقارا الماعان جاعدايدا رەگەنتتىك ءتارتىبى جۇزەگە اسىرىلادى. ياعني مەملەكەتتىڭ كەڭەسشىسى رەتىندە پاتشا تۇقىمىنىڭ بىرەۋى بەلگىلەنەدى. دەگەنمەن بۇل كۇردەلى ءھام وڭاي ماسەلە ەمەس.
1937 جىلى قابىلدانعان رەگەنتتىك اكتىندە ءتورت ىقتيمال جاعداي قاراستىرىلعان. مونارح كامەلەتتىك جاسقا, ياعني 18-گە تولماعاندا نە دەنساۋلىعى تولىقتاي سىر بەرگەندە, ۋاقىتشا ارەكەتكە قابىلەتسىز بولعاندا, شەتەلگە كەتكەندە بەلگىلى ءبىر مەرزىمگە باسقارۋشى بەلگىلەنەدى.
العاشقى ەكى جاعدايدا رەگەنتتىك بيلىك ىسكە قوسىلادى. بۇل قىزمەتكە كىرىسكەن تۇلعا مونارحتىڭ بۇكىل قىزمەتىن اتقارادى. كەيىنگىلەرىندە پاتشانىڭ اتىنان ارەكەت ەتەتىن «مەملەكەتتىك كەڭەسشىلەر» تاعايىندالادى.
قازىرگى تاڭدا چارلز پاتشا ۋاقىتشا ارەكەتكە قابىلەتسىز سانالادى. ياعني دەنساۋلىعىندا كىنارات بار. بىراق كەيىنگى جاعدايعا قاراعاندا ول كەڭەسشى تاعايىنداۋعا اسىقپايتىن سەكىلدى. الدا-جالدا مۇنداي شەشىمگە بارا قالسا, بۇل قىزمەت ۇلكەن ۇلى ۋيليام حانزاداعا, قارىنداسى اننا حانشايىمعا نە ءىنىسى ەدۆارد حانزاداعا بۇيىرادى.
نەگىزى چارلز پاتشانىڭ ءوزى ءبىر مارتە كەڭەسشى ءرولىن اتقارعان. 2022 جىلى ەليزاۆەتا II دەنساۋلىعىنا بايلانىستى ونى وسى لاۋازىمعا تاعايىنداعان بولاتىن. بىراق شەتەلگە ساپارى كەزىندە ءجيى-ءجيى كەڭەسشى بەلگىلەپ وتىرعانى ءمالىم.
نەگىزى ۇلىبريتانيا مونارحتارىنىڭ ساياسي كۇشى شەكتەلگەن. دەگەنمەن اتقارۋعا ءتيىس كونستيتۋتسيالىق مىندەتتەرى بار. سونىڭ باسىم بولىگىن مەملەكەتتىك كەڭەسشى ورىنداۋعا قۇقىلى. تەك پارلامەنتتى تاراتۋعا, لوردتار پالاتاسىنىڭ جاڭا مۇشەلەرىن تاعايىنداۋعا زاڭمەن تىيىم سالىنعان. الدا-جالدا ەل پاتشاسى قالام ۇستاۋعا, نە انىق سويلەۋگە شاماسى جەتپەسە, رەگەنتتىك بەلگىلەنەدى. الايدا مونارحتىڭ ءوزى رەگەنتتىكتى مالىمدەۋگە قۇقىلى ەمەس. مۇنداي قۇزىرەت وكىلدەر پالاتاسىنىڭ سپيكەرى, مونارحتىڭ جۇبايى سەكىلدى بەس ادامنان تۇراتىن توپقا بەرىلگەن.
الدا-جالدا چارلز پاتشا بيلىكتى اتقارۋعا جارامسىز سانالسا, ونىڭ ورنىنا رەگەنتتىك ۋيليام حانزاداعا بەرىلەدى. وسىلايشا, مونارحتىڭ ورنىنا بۇكىل مىندەتتى اتقارادى. ايتسە دە مۇراگەرلىكتى وزگەرتۋگە عانا تىيىم سالىنعان.
وسى ورايدا ايتا كەتكەن ءجون, چارلز پاتشا قاتەرلى ىسىككە شالدىققان العاشقى بريتانيا مونارحى ەمەس. ماسەلەن, 1951 جىلى گەورگ VI جامان ىندەتتىڭ تىرناعىنا ءىلىندى. بىراق دارىگەرلەر وعان وكپەسىندەگى قاتەرلى ىسىك تۋرالى ايتپاعان كورىنەدى. حالىققا كۇردەلى وپەراتسيا جاسالاتىنى جونىندە عانا مالىمەت بەرگەن.
ايتپاقشى, ۇلىبريتانيا تاجىنە قاتىستى تاعى ءبىر مىنانداي قىزىق جاعداي بار. الدا-جالدا ۋيليام حانزادا پاتشا اتانىپ جاتسا, ونىڭ رەگەنتى رەتىندە ۇلى گەورگ حانزادا سانالمايدى. ازىرگە ول كامەلەتتىك جاسقا 2031 جىلى تولادى. وعان دەيىن قاجەت كەزدە گارري حانزادا رەگەنت نە مەملەكەتتىك كەڭەسشى مىندەتىن اتقارۋعا ءتيىس.
