وسى كۇننەن باستاپ ارال قالاسىنان 20 شاقىرىم قاشىقتىقتا جول پاترۋلدىك پوليتسياسىنىڭ 6 ينسپەكتورى قاۋىپسىزدىك شارالارىنا كىرىسىپ كەتتى. بۇگىندە اۋدان اۋماعىندا جولدان قالعان 1 225 اۆتوكولىك پەن 3 مىڭعا جۋىق جولاۋشى تۇر. وسىعان بايلانىستى اۋداندا ارناۋلى شتاب قۇرىلىپ, جەرگىلىكتى ەرىكتى جاستار, مەكەمەلەر جانە كاسىپكەرلەر جولاۋشىلارعا تەگىن ىستىق تاماق ۇيىمداستىرۋعا كىرىسىپ كەتتى. ۇزاق جولعا بالامەن شىققان جولاۋشىلار ارال قالاسىنداعى يندۋستريالدى-تەحنيكالىق كوللەدج جاتاقحاناسىنا ورنالاستىرىلدى. مەديتسينا قىزمەتكەرلەرى كۇنىنە ەكى مەزگىل جولاۋشىلاردى ارالاپ, دەنساۋلىعىن باقىلاپ ءجۇر.
وسىنداي ارالاۋ بارىسىندا 8 اقپان كۇنى تاجىكستاننان ساماراعا ساپار شەككەن 28 جاستاعى ماحفيلورو ماسرۋروۆاعا مەديتسينالىق كومەك قاجەت ەكەنى انىقتالىپ, اياعى اۋىر كەلىنشەك جەدەل جاردەممەن اۋداندىق پەرزەنتحاناعا جەتكىزىلىپ, كومەك كورسەتىلدى. قينالعان جۇرتقا جاردەم ۇيىمداستىرىپ جۇرگەن ازاماتتار جول اشىلعانشا ماحفيليرونى دارىگەرلەردىڭ قاراۋىندا قالدىرۋ تۋرالى شەشىم قابىلداپ, ول اۋرۋحاناعا جاتقىزىلدى.
كۇرە جولدا قالىپ قويعانداردىڭ جاعدايىن وبلىس اكىمى نۇرلىبەك نالىباەۆ ۇدايى باقىلاپ وتىر. اياق استى بولعان جاعدايدان ابدىراپ قالعان جولاۋشىلارعا ارال اۋدانىنىڭ اكىمى امانجول وڭعارباەۆ كەلىپ, جاعدايىمەن تانىستى. جەرگىلىكتى اكىمدىك جول بويىنداعى قىزمەت كورسەتۋ كەشەندەرىندەگى ازىق-ت ۇلىك پەن تاماق باعاسى قىمباتتاماۋىن باقىلاۋعا الدى. جولدا قالعانداردىڭ دەنى – وزبەكستان, تاجىكستان, قىرعىزستان ەلىنىڭ ازاماتتارى. ولاردىڭ باسىنداعى ءسال قيىندىقتى پايدالانىپ, قارجى قارپىپ قالۋدى كوزدەمەي, كەرىسىنشە قولدان كەلگەن جاردەمىن بەرۋگە ۇمتىلعان جەرگىلىكتى تۇرعىنداردىڭ بۇل جاقسىلىعى «جولاۋشىنىڭ ۇلەسپەگەن ەنشىسى بار» دەگەن باياعى بابالار ءتامسىلىنىڭ ءالى دە ءمانىن جويماعانىنا كوزىمىزدى جەتكىزىپ, جۇرەككە جىلۋ ۇيالاتتى. اۋدان اكىمدىگىنىڭ ۇيلەستىرۋىمەن ەرىكتى جاستار, كاسىپكەرلەر مەن مەكەمەلەر تەگىن اس تا ۇيىمداستىرىپ, جولاۋشىلاردىڭ قينالىپ قالماۋىن بارىنشا قاداعالاپ وتىر.
ارالمەن كورشىلەس قازالى اۋدانىنداعى ويىندى ەلدى مەكەنى تۇسىنداعى «ميراس» سەرۆيستىك كەشەنىندە 135 جۇك كولىگى مەن 35 جەڭىل اۆتوكولىك وشارىلىپ تۇر. مۇنداعى كولىكتەردە 200-گە جۋىق ادام بار. ولاردىڭ جاعدايىن بىلۋگە بارعان اۋدان اكىمى مۇحتار ورازباەۆ جول بويىنداعى كەشەن باسشىلىعىمەن جولاۋشىلارعا تاماقتى ارزان باعامەن بەرۋدى كەلىستىردى. اقپاننىڭ الاپاتىنان جولدا قالىپ قويعاندارعا قاجەتتى كومەك كورسەتىلىپ, ءدارى-دارمەك, اۋىزسۋ تەگىن ۇلەستىرىلدى. بالالى جولاۋشىلارعا كەشەننىڭ قوناقۇيىنەن تەگىن جاتىن ورىندار دايىندالدى.
كۇندىز-ءتۇنى كولىك اعىنى تولاستامايتىن كۇرە جول بويىنداعى «ميراس», «ارزان 1» كەشەندەرىندەگى قازىرگى قاربالاس قوناق كۇتكەن ءۇيدىڭ تىرلىگىنە كوبىرەك ۇقسايدى. جۇمىلعان جاستار كارتوپ-ءسابىزىن ارشىپ, ءار جەردە قازان-قازان پالاۋ اسىپ, جولاۋشىلارعا تەگىن تاماق پەن ىستىق شاي بەرىلىپ جاتىر.
جولدا قالىپ قويعانداردىڭ جەرگىلىكتى اكىمدىك پەن قول ۇشىن سوزعاندارعا العىسى شەكسىز. ارالداعى كوللەدج جاتاقحاناسىنا ۋاقىتشا ورىن تەپكەن تاجىك ايەلى وسى جاعدايدان كەيىن جەر بەتىندە جاقسى ادامداردىڭ كوپتىگىنە سەنە باستاعانىن ايتادى. وسىنى ايتقاندا ونىڭ كوزىنەن مولتىلدەگەن جاس كورىندى. بۇل جارتى الەمدى جالعاعان كۇرە جولدىڭ بويىنداعى جۇرتتىڭ وزدەرىنە كورسەتكەن العاۋسىز پەيىلىنە دەگەن ريزالىق ەدى.
بوران باسىلىپ, جاعداي تۇراقتالعان سوڭ اۆتوكولىكتەر جول پوليتسياسى باستاۋىمەن ساپارىن جالعاستىرادى.
قىزىلوردا
