اتالعان جارىستا قازاق ەلى نامىسىن التى سپورتشى قورعايدى. 51 كگ سالماقتا 26 جاستاعى تۇركىستاندىق ساكەن بيبوسىنوۆ قولعاپ تۇيىستىرەدى. ۇلتتىق قۇرامانىڭ باس باپكەرى مىرزاعالي ايتجانوۆتىڭ ءتول شاكىرتىنىڭ الەم چەمپيونى (2021), وليمپيا ويىندارى (2021) مەن دۇنيەجۇزىلىك دودانىڭ (2019) قولا جۇلدەگەرى دەگەن اتاعى بار. 57 كگ سالماقتا ماحمۇد سابىرحانعا سەنىم ارتىلىپ وتىر. ول الەم بىرىنشىلىگىندە ءبىر التىن (2023) مەن ءبىر كۇمىس (2021) مەدالدى ولجالادى. بىراق بۇل تابىستارىنىڭ بارلىعىنا ماحمۇد 54 كگ سالماق دارەجەسىندە قول جەتكىزدى. جاڭا سالماققا وتكەننەن كەيىن بىلتىر ازيا ويىندارىندا 22 جاستاعى شىمكەنتتىك جىگىتتىڭ جولى بولمادى. ال وسى جولى قالاي بولاتىنىن رينگ كورسەتەدى. 63,5 كگ سالماقتا تاعى ءبىر تۇركىستان وبلىسىنىڭ وكىلى مۇحاممەدسابىر بازارباي ۇلى شارشى الاڭعا شىعادى. ول ءالى پالەندەي بيىك بەلەستەردى باعىندىرا قويعان جوق. 23 جاستاعى بىلعارى قولعاپ شەبەرى وسىدان بىرەر جىل بۇرىن جاستاردىڭ قۇرلىق بىرىنشىلىگىندە جۇلدەگەر اتاندى. ەل سپارتاكياداسىن ۇتىپ, قازاقستان چەمپيوناتىنىڭ فينالىندا ونەر كورسەتتى.
71 كگ سالماقتاعى اسلان شىمبەرگەنوۆتىڭ قورجىنىندا وليمپيادانىڭ جۇلدەسىنەن باسقاسىنىڭ ءبارى بار. 30 جاستاعى تارازدىڭ تارلانى 2019 جىلى دۇنيەجۇزىلىك اسكەريلەر ويىندارىنىڭ جەڭىمپازى, 2022 جىلى ازيا جانە 2023 جىلى الەم چەمپيونى اتاندى. ەرمەك ەرتاەۆتىڭ شاكىرتى جازعى ازيادادا ەكى رەت جەڭىس تۇعىرىنا كوتەرىلدى. 2018 جىلى دجاكارتادا كۇمىس السا, 2023 جىلى حانچجوۋداعى ويىنداردىڭ جارتىلاي فينالىندا اسلانبەككە تورەشىلەردىڭ قيانات جاساعانىن وزدەرىڭىز دە كوردىڭىزدەر.
80 جانە 92 كگ سالماق دارەجەلەرىندە اعايىندى ورالبايلار جارىس كوركىن قىزدىرادى. استانا قالاسىنىڭ اتىنان سىنعا ءتۇسىپ جۇرگەن ەگىزدەردىڭ جاسى – 23-تە. نۇربەك – 2023 جىلعى الەم چەمپيونى, ايبەك – 2022 جىلعى ازيا بىرىنشىلىگىنىڭ جەڭىمپازى. كەزىندە ەكەۋى دە جاستاردىڭ دۇنيەجۇزىلىك دودالارىندا جەڭىس تۇعىرىنا كوتەرىلدى. ال +92 كگ سالماقتاعى سايىسقا قازاقستاننىڭ بوكسشىلارى قاتىسپايدى. سەبەبى قامشىبەك قوڭقاباەۆ حانچجوۋداعى ازيا ويىندارىنىڭ فينالىنا شىعىپ, كۇنى بۇرىن وليمپيادانىڭ جولداماسىنا يەلىك ەتتى. بۋستو-ارسيتسيودا ەرلەر 28 ليتسەنزيانى ساراپقا سالادى.
ايەلدەردىڭ جارىسىندا 21 جولداما تاراتىلادى. بۇل باسەكەلەردە الۋا بالقىبەكوۆا (50 كگ), جاينا شەكەربەكوۆا (54 كگ), ريمما ۆولوسەنكو (60 كگ), ناتاليا بوگدانوۆا (66 كگ) جانە ۆالەنتينا حالزوۆا (75 كگ) باق سىنايدى. قىزداردىڭ دا قورجىنىندا ءبىر جولداما بار. ونى ازيادادا 57 كگ سالماق دارەجەسىندە ونەر كورسەتكەن كارينا يبراگيموۆا جەڭىپ الدى. اپەننين تۇبەگىندە بارلىعى 114 مەملەكەتتەن كەلگەن 668 بوكسشى كۇش سىناسادى دەپ كۇتىلىپ وتىر.
