بىلتىرعى ماۋسىمدا ماگومەد اديەۆتىڭ شاكىرتتەرى س ليگاسىندا ونەر كورسەتتى. ول جارىستا ءبىزدىڭ جىگىتتەر وتە جاقسى ويناپ, ءوز كورەرمەندەرىن قۋانتتى. جەرلەستەرىمىز ازەربايجان (2:0), سلوۆاكيا (1:0, 2:1) جانە بەلارۋستەن (2:1) باسىم ءتۇستى. ودان بولەك, بەلارۋستەرمەن (1:1) تەڭ ءتۇسىپ, قاپ تاۋى قىراندارىنا (0:3) ەسە جىبەردى. ناتيجەسىندە, 13 ۇپايدى قورجىنعا سالىپ, ءبىرىنشى ورىندى يەلەندى. سونىڭ ارقاسىندا دارەجەمىز ءوسىپ, كەلەسى جىلى ۆ توبىندا كۇش سىناسۋ قۇرمەتىنە يە بولدىق.
بيىلعى ماۋسىمدا 3-توپقا تۇسكەن قازاقستاننىڭ قارسىلاستارىنىڭ ەشبىرى وسال ەمەس. نورۆەگيانىڭ اياقدوپ شەبەرلەرى سوناۋ 1936 جىلى بەرلين وليمپياداسىندا ءۇشىنشى ورىن الدى. الەم چەمپيوناتىنا ءۇش مارتە قاتىسىپ, ەكى رەت (1938, 1998 جىلدارى) 1/8 فينالعا دەيىن جەتتى. ەۋروپا بىرىنشىلىگىندە ءبىر رەت (2000) بوي كورسەتتى. سكانديناۆيالىقتاردىڭ قۇرامىندا بۇل كۇندەرى «مانچەستەر ءسيتيدىڭ» ساپىندا قاراسىلاستار قاقپاسىنا توپىرلاتىپ گول سوعىپ جۇرگەن ەرلينگ حولاند سىندى ءدۇلدۇل بار. مارتين ەدەگور (ارسەنال), يۋليان ريۋەرسون (بورۋسسيا دورتمۋند), لەو ەستيگور (ناپولي), وسكار بوببتى دا (مانچەستەر سيتي) ەرەكشە اتاپ وتۋگە بولادى. وسى ورايدا ءبىز تەك ۇزدىك كوماندالاردا ونەر كورسەتەتىن ويىنشىلاردى عانا تىلگە تيەك ەتتىك. ولاردان بولەك, يسپانيا, پورتۋگاليا, بەلگيانىڭ تانىمال كلۋبتارىنىڭ جەيدەسىن كيگەن نورۆەگيانىڭ بەلدى فۋتبولشىلارى جەتەرلىك. قازىرى كەزدە ولار فيفا رەيتينگىندە 44-ورىندا.
دۇنيەجۇزىلىك رەيتينگتە اۋستريا قۇراماسى نورۆەگيالىقتاردان الدەقايدا جوعارى تۇر. نەمىس مامانى رالف رانگنيك جاتتىقتىراتىن كوماندا 24-ساتىعا جايعاستى. ولاردىڭ ەڭ زور تابىسى – وليمپيا ويىندارىنىڭ كۇمىس (1936) جانە الەم چەمپيوناتىنىڭ قولا (1954) جۇلدەسى. دۇنيەجۇزىلىك دودادا جەتى جانە قۇرلىق بىرىنشىلىگىندە ءۇش رەت باق سىنادى. اۋستريانىڭ ساپىندا دا مىقتى فۋتبولشىلار جەتەرلىك. سولاردىڭ اراسىندا داۆيد الابا (رەال مادريد), مارسەل زابيتتسەر (بورۋسسيا دورتمۋند), كريستوف باۋمگارتنەر مەن كونراد لايمەردىڭ (لەيپتسيگ) ورنى بولەك.
سلوۆەنيا 1991 جىلدان باستاپ حالىقارالىق دودالارعا قاتىسا باستادى. سول ارالىقتا الەم جانە ەۋروپا چەمپيوناتتارىنا ەكى رەتتەن قاتىسىپ ۇلگەردى. فيفا رەيتينگىندە ولار 54-ورىندى ەنشىلەپ تۇر. سلوۆەنيالىقتاردىڭ ساپىنداعى «اتلەتيكو» ءمادريدتىڭ قاقپاشىسى يان وبلاك, «فەنەرباحچەنىڭ» جارتىلاي قورعاۋشىسى ميحا زايتس جانە «لەيپتسيگتىڭ» 20 جاستاعى شابۋىلشىسى بەنيامين شەشكو ورەلى ونەرلەرىمەن كوزگە ءتۇسىپ ءجۇر.
باق وكىلدەرىنە بەرگەن سۇحباتىندا ماگومەد اديەۆ وسى توپتاعى كوماندالاردىڭ مىقتى ەكەنىن اتاپ ءوتتى. ء«ار قارسىلاسقا جەكە-جەكە دايىندالىپ, ءاربىر ماتچتا جەڭىسكە جەتۋ ءۇشىن بارىنشا كۇش سالامىز. ءيا, حولاند, الابا سەكىلدى جۇلدىزدارعا قارسى ويناعاندا كۇللى الەم جانكۇيەرلەرىنىڭ نازارى وسى ماتچتارعا اۋاتىنى انىق. ال سلوۆەنيا – ءبىزدىڭ سىرالعى قارسىلاسىمىز. بۇل جولى ولاردىڭ سازايىن بەرۋگە تىرىسامىز», دەيدى قازاقستان ۇلتتىق قۇراماسىنىڭ باس باپكەرى.
ۆ ليگاسىندا بىزدەن بولەك مىنا كوماندالار ءوزارا كۇش سىناسادى: 1-توپتا – چەحيا, ۋكراينا, البانيا, گرۋزيا. 2-توپتا – انگليا, فينليانديا, يرلانديا, گرەكيا. 4-توپتا – ۋەلس, يسلانديا, چەرنوگوريا جانە تۇركيا. ال ەڭ مارتەبەلى ا ليگاسىندا مىنا مەملەكەت فۋتبولشىلارىنىڭ تارتىسىن تاماشالايمىز: 1-توپتا – حورۆاتيا, پورتۋگاليا, پولشا, شوتلانديا. 2-توپتا – يتاليا, بەلگيا, فرانتسيا, يزرايل. 3-توپتا – نيدەرلاند, ماجارستان, گەرمانيا, بوسنيا مەن گەرتسەگوۆينا. 4-توپتا – يسپانيا, دانيا, شۆەيتساريا جانە سەربيا.
