«Study UK Alumni Award جەڭىمپازدارى مەن فيناليستەرى قوعامعا, يندۋسترياعا, جالپى ەلدىڭ دامۋىنا وڭ ۇلەستەرىن قوسۋ ءۇشىن ۇلىبريتانيا ۋنيۆەرسيتەتىندە العان ءبىلىمى مەن تاجىريبەسىن ءتيىمدى پايدالانعان ءوز سالاسىنىڭ كوشباسشىلارى. بۇل بەدەلدى سىياقى ۇلىبريتانيانىڭ جوعارى ءبىلىمىنىڭ قۇندىلىعى مەن تۇلەكتەردىڭ مانساپتىق جانە جەكە دامۋلارىنا ىقپالىن بايقاتادى, سونداي-اق, بريتاندىق تۇلەكتەر مەن وقىعان ۋنيۆەرسيتەتتەرىنىڭ حالىقارالىق بەدەلىن ارتتىرادى. اتالعان سىياقىنى بريتان كەڭەسى توعىز جىل قاتارىنان دۇنيە جۇزىندەگى ۇلىبريتانيانىڭ حالىقارالىق تۇلەكتەرىنە جوعارى جەتىستىكتەرى ءۇشىن تابىستاپ كەلەدى. ال, قازاقستاندا بۇل بايقاۋ بيىل ءتورتىنشى رەت ۇيىمداستىرىلىپ وتىر», دەدى بريتان كەڭەسىنىڭ كوممۋنيكاتسيا بويىنشا كەڭەسشىسى شىنار شاكەنوۆا.
بيىل اتالعان بايقاۋعا 43 ۇمىتكەر قاتىسىپ, 12 فيناليست تاڭداپ الىنعان, ونىڭ ىشىندە ءتورت سانات بويىنشا ءتورت جەڭىمپاز انىقتالدى.
ايتا كەتەيىك, «Culture and Creativity» نوميناتسيا بويىنشا فيناليستەر اراسىندا «Egemen Qazaqstan» گازەتىنىڭ «ساياسات جانە قۇقىق» ءبولىمىنىڭ اعا ءتىلشىسى گۇلنار جولجان بار. ول 2017 جىلى ۇلىبريتانيانىڭ Newcastle ۋنيۆەرسيتەتىندە «بولاشاق» باعدارلاماسىمەن ءبىلىم الدى.
ال «Social Action» نوميناتسياسىنىڭ جەڭىمپازى حاليدا اجىعۇلوۆا «بولاشاق» باعدارلاماسىمەن 2019 جىلى ۇلىبريتانيانىڭ Leicester ۋنيۆەرسيتەتىنىڭ دوكتورانتۋراسىندا ءبىلىم الىپ, زاڭ دوكتورى دارەجەسىن يەلەنگەن. حاليدا – ادام قۇقىقتارى جونىندەگى زاڭگەر, الماتى قالاسىنىڭ بالا قۇقىقتارى جونىندەگى ۋاكىل جانە شىعىس ەۋروپا مەن ورتالىق ازياداعى سەكسۋالدىق قاناۋشىلىق پەن زورلىق-زومبىلىقتىڭ الدىن الۋ بويىنشا حالىقارالىق كەڭەسشى. حاليدانىڭ قوعامدىق جۇمىسى بالالاردى قورلاۋعا تىيىم سالاتىن جانە بارلىق قازاقستان مەكتەپتەرىندە زورلىق-زومبىلىققا قارسى ىشكى ساياساتتى جۇرگىزۋگە مىندەتتەيتىن زاڭنامانى قابىلداۋعا نەگىز بولدى. قازىر ول قازاقستانداعى بالالاردىڭ ءال-اۋقاتى مەن قورعالۋى تۋرالى ءتيىمدى زاڭداردى قابىلداۋ ءۇشىن زەرتتەۋ جانە اقپاراتتىق-ناسيحاتتاۋ جۇمىستارىن جۇرگىزىپ ءجۇر.
«قازاقستانداعى Study UK Alumni Awards سىيلىعىنىڭ جەڭىمپازدارىن شىن جۇرەكتەن قۇتتىقتايمىن! ۇلىبريتانيا ۋنيۆەرسيتەتتەرىن تامامداعان قازاقستان تۇلەكتەرى بريتان ءبىلىمىنىڭ وزىقتىعىن كورسەتىپ, ەكى ەل اراسىنداعى بايلانىستى بۇرىنعىدان دا نىعايتىپ جاتىر. ەڭ باستىسى, ءبىزدىڭ تۇلەكتەردى قازاقستاندى يننوۆاتسيالار مەن وزگەرىستەرگە جەتەلەيتىن تۇلعالار, ءوز سالالارىنىڭ ناعىز ساراپشىلارى جانە ويشىل كوشباسشىلارى دەۋگە بولادى. مەن وسىنداي تاماشا جاستاردىڭ قازاقستاننىڭ بولاشاعىن قۇرۋدا ۇلىبريتانيانىڭ ءبىلىمى مەن وزىق تاجىريبەسىن اكەلىپ جاتقانىن ماقتان تۇتامىن», دەدى ۇلىبريتانيانىڭ قازاقستانداعى ەلشىسى كەتي ليچ.
سونىمەن قاتار قازاقستانداعى بريتان كەڭەسىنىڭ ديرەكتورى روبەرت تەيلور: «بريتان كەڭەسىنىڭ ءبىلىم بەرۋ بويىنشا جۇمىسى ءبىلىم بەرۋ مەن داعدىلاردى دامىتۋدى ينتەرناتسيونالداندىرۋعا, ۇلىبريتانيانىڭ تاجىريبەسى مەن يننوۆاتسياسىن الەممەن بولىسۋگە جانە بىرلەسكەن جوبالاردا ىسكە اسىرۋ ءۇشىن سەرىكتەستەردى بىرىكتىرۋگە باعىتتالعان. بيىل بريتان كەڭەسى حالىقارالىق قىزمەتىنىڭ 90 جىلدىعىن, سونداي-اق, قازاقستانداعى ۇزاق مەرزىمدى ديپلوماتيالىق قاتىناسىنىڭ 30 جىلدىعىن اتاپ وتەدى. بايقاۋ فيناليستەرى ۇلىبريتانياداعى ءبىلىم بەرۋ تاجىريبەسىن ۇلكەن جەتىستىكتەرگە جەتۋ ءۇشىن ءتيىمدى قولدانا بىلگەن دارىندى تۇلەكتەردىڭ شاعىن وكىلدەرى», دەپ اتاپ ءوتتى.
