ەكونوميكالىق زەرتتەۋلەر ينستيتۋتىنىڭ حابارلاۋىنشا, 2023 جىلدىڭ 11 ايىندا قازاقستانعا يمپورت 54,6 ملرد دوللارعا جەتتى, بۇل 2022 جىلدىڭ وسى كەزەڭىمەن سالىستىرعاندا 20,4 پايىزعا ارتىق. يمپورتتىڭ رەكوردتىق كولەمىنىڭ قالىپتاسۋىنا شەتەلدەن ەلگە اۆتوموبيلدەر مەن جوعارى تەحنولوگيالىق تاۋارلاردى جەتكىزۋدى ۇلعايتۋ اسەر ەتتى.
2022 جىلعا دەيىن ەلدىڭ نەگىزگى ساۋدا سەرىكتەسى رەسەي فەدەراتسياسى بولدى, ونىڭ ۇلەسى جىل سايىن 20-24 پايىزعا دەيىن جەتەتىن ەدى. الايدا 2022 جىلعى گەوساياسي وزگەرىستەرگە بايلانىستى 2023 جىلى ەلىمىزدىڭ باس ساۋدا سەرىكتەسى مارتەبەسىن 22 پايىز ۇلەسپەن قىتاي يەلەندى, ال رەسەي فەدەراتسياسىنا تيەسىلى ۇلەس – 19 پايىز.
ەكسپورتتىڭ تومەندەۋى مۇناي باعاسىنىڭ تومەندەۋىمەن بايلانىستى. قازاقستان ەكسپورتى 11 ايدا 8,5 پايىزعا, 71,3 ملرد دوللارعا دەيىن تومەندەدى. بۇل, ەڭ الدىمەن, مۇناي كىرىستەرىنىڭ – 12,4 پايىزعا, 38,3 ملرد دوللارعا دەيىن تومەندەۋىمەن بايلانىستى. بۇل رەتتە توننامەن ساناعاندا قازاق مۇنايىنىڭ ەكسپورتى – 7,2 پايىزعا, 60,5 ملن توننادان 64,9 ملن تونناعا دەيىن ءوستى.
شيكىزاتتىق ەمەس تاۋارلاردىڭ ەكسپورتى تومەندەدى. وسى جىلدىڭ قاڭتار-قاراشا ايلارىندا قازاقستان رەسپۋبليكاسىنان شيكىزاتتىق ەمەس تاۋارلاردىڭ ەكسپورتى – 4,5 پايىزعا, ياعني 22,8 ملرد دوللارعا دەيىن ءتۇستى. بۇل نەگىزىنەن ارالىق تاۋارلار (جارتىلاي فابريكاتتار) ەكسپورتىنىڭ – 7,2 پايىزعا, 18,2 ميلليارد دوللارعا دەيىن تومەندەۋىمەن بايلانىستى. مىسالى, نەگىزگى مەتالداردىڭ شەتەلدىك ساتىلىمى – 9,3 پايىزعا, 12,4 ملرد دوللارعا دەيىن, ال مۇناي وڭدەۋ ونىمدەرىنىڭ ەكسپورتى – 34,2 پايىزعا, 1,5 ملرد دوللارعا دەيىن تومەندەدى.
