شۋ اۋدانىنىڭ ورتالىق اۋرۋحاناسىندا داۋن سيندرومى جانە باسقا دا اۋىر پاتولوگياسى بار نارەستە دۇنيەگە كەلگەن. ماماندار كىشكەنتاي ءسابيدىڭ تۋا بىتكەن انالدى اترەزيا (ىشەكتىڭ تومەنگى جاعىندا تەسىك بولمايتىن تۋا بىتكەن اقاۋ) جانە اسقازان-ىشەك جولدارىندا اقاۋ بار ەكەنىن دەر كەزىندە انىقتاپ, شۇعىل تۇردە وعان وپەراتسيا جاساۋ كەرەك ەكەنىن ايتىپ, جامبىل وبلىستىق پەريناتالدىق ورتالىعىنا جولداعان.
ماماندار كەلتىرگەن دەرەككە جۇگىنسەك, ىشەك ارتەزياسى دەپ ۇرىق ىشەكتىڭ دامىماعان بولىگىن ايتادى ەكەن. سالدارىنان ىشەك جولدارى جارتىلاي نەمەسە تولىق بىتەلىپ قالاتىن كورىنەدى. ءبىر سوزبەن ايتقاندا, بەيكۇنا ءسابيدىڭ بويىنداعى دەرت جەڭىل ەمەس. نارەستەنى ەمدەۋ جۇمىستارى بىرنەشە كەزەڭدى قامتيدى.
جاڭا تۋعان نارەستەنىڭ جاعدايى ءماز ەمەستىگىن تۇسىنگەن دارىگەرلەر ابىگەرگە تۇسكەن. وبلىستىڭ شتاتتان تىس باس نەوناتولوگى تالعات تولىقباەۆ پەن نەوناتالدىق حيرۋرگ نۇرتۋعان القۋاتوۆتىڭ قاتىسۋىمەن وتكەن تەكسەرۋ بارىسىندا ماماندار تەز ارادا وپەراتسيا جاساۋ كەرەك دەگەن شەشىمگە كەلگەن. ساراپشىلار كەلتىرگەن دەرەككە سەنسەك, ۋاقىتتى وتكىزىپ الۋ بالا دەنساۋلىعى ءۇشىن ايتارلىقتاي زور قاۋىپ تۋدىرعان ەكەن. سەبەبى ىشەكتىڭ بەلگىلى ءبىر قۇرامى سىرتقا شىقپاي, توق نەمەسە اش ىشەك قابىرعالاردىڭ بۇزىلۋىنا اكەلىپ سوقتىرۋى مۇمكىن. ول ۋاقىتتا ناۋقاس ومىرمەن قوش ايتىسۋى دا ىقتيمال. سوندىقتان دا تاۋەكەلگە بەل بۋعا تۋرا كەلگەن. مامانداردىڭ ايتۋىنشا, بۇل پاتولوگيانى ەمدەۋ, ءسابي بويىنداعى قاۋىپتى ازايتۋ ءۇشىن بىرنەشە وپەراتسيا جاساۋ قاجەتتىلىگى تۋىندايتىن كورىنەدى.
دارىگەرلەردىڭ مۇقيات تەكسەرۋىنەن كەيىن حيرۋرگيالىق وپەراتسيانىڭ العاشقى كەزەڭىنە بالالار حيرۋرگى شاۆكات قۇدايبەرگەنوۆ, انەستەزيولوگ مۇرات رۇستەموۆ جانە مەيىربيكە گۇلزيرا قابىلبەكوۆا جەدەل كىرىسىپ كەتكەن. حيرۋرگيالىق ەمدەۋدىڭ العاشقى ساتىسىندا ماماندار ءىش قۋىسىن قايتا قاراۋ, ستومانى جويۋ جۇمىسىن جۇزەگە اسىرعان. دەرەككە جۇگىنسەك, وپەراتسيا ج ۇلىننىڭ انالگەزياسىمەن جاسالعان. بۇل وپەراتسيادان كەيىنگى اسقىنۋلاردىڭ قاۋپىن ەداۋىر تومەندەتەتىن كورىنەدى.
دارىگەرلەر بەكەر ابىگەر بولماپتى. جاسالعان وپەراتسيادان كەيىن ءسابيدىڭ جاعدايى تۇراقتالعان. نارەستە ۋاقتىلى تاماقتانادى ەكەن. ال ىلەسپە اۋرۋلار بويىنشا ماماندار قوسىمشا تەكسەرۋ جۇمىستارىن جۇرگىزىپ جاتىر. ش.قۇدايبەرگەنوۆتىڭ ايتۋىنشا, نارەستە 6 ايعا تولعاندا ەمدەۋدىڭ كەلەسى كەزەڭى, ياعني پروكتوپلاستيكا جاسالادى.
جامبىل وبلىسى
