فوتو: syrboyi.kz
ءوڭىر باسشىسى سوڭعى ەكى جىلدا ايماقتىڭ مادەنيەت پەن رۋحانيات سالاسىندا اۋقىمدى جۇمىستار اتقارىلعانىن اتاپ ءوتتى. قىزىلوردادا مەتسەنات مارات دۇيسەنباەۆتىڭ دەمەۋشىلىگىمەن قۇنى 1 ملرد 700 ملن تەڭگە بولاتىن «اناعا تاعزىم» ورتالىعى اشىلىپ, 1 ملرد 500 ملن تەڭگەگە سالىنعان «وتباسى ورتالىعى» ءوز قىزمەتىن باستادى. ارحەولوگتەردىڭ ۇزاق جىلعى ەڭبەگى ارقاسىندا بۇرىننان بۇگىنگە جەتكەن شىرىك-راباتتاعى ساق جاۋىنگەرى مەن سىعاناق حانشايىمىنىڭ التىنداتقان مۇسىندەرى جاسالىپ, وبلىستىق مۋزەيدىڭ قۇندى مۇراسىنا اينالدى.
– الدا تاريحشىلاردىڭ عىلىمي نەگىزدەمەلەرى مەن ارحەولوگيالىق قازبا ناتيجەلەرىنە سۇيەنىپ, التىن كيىمدى «تۇگىسكەن كوسەمى», «جەتىاسار اقسۇيەك ايەلى» رەكونسترۋكتسيالارى جاسالادى. سونىمەن قاتار, وسى كۇنگە دەيىن شەتەلدەردە ساقتالعان ءبىزدىڭ وڭىرگە قاتىستى جادىگەرلەردىڭ كوشىرمەلەرى ەل نازارىنا ۇسىنىلاتىن بولادى. ۇلتتىق قۇندىلىقتارىمىزدى دارىپتەپ, سالت-داستۇرلەرىمىزدى ناسيحاتتاۋ ماقساتىندا حالقىمىزدىڭ جىل باسى جانە جاڭارۋ ايى – ناۋرىزدان باستاپ سىر وڭىرىندە «رۋحانيات جىلى» باستاۋ الادى. جىل اياسىندا تەك مادەني-كوپشىلىك شارالار عانا ەمەس, اۋقىمدى جوبالار جۇزەگە اسىرىلادى, – دەدى نۇرلىبەك ماشبەك ۇلى.
جۇرتشىلىق سوڭعى جىلدارى بۇل سالادا ءۇزىلىپ قالعان ۇردىستەردىڭ قايتا جالعاسقانىن دا جاقسىلىققا بالاپ وتىر. مىسالى, بىلتىر ون جىل بۇرىنعى باستاما قايتا جاڭعىرىپ, مادەنيەت سالاسىن دامىتۋعا ۇلەس قوسقان ونەر جانە ادەبيەت وكىلدەرىنە «تۇران» سىيلىعى تابىستالدى. وبلىس تاريحىندا تۇڭعىش رەت 50-دەن اسا كاسىبي مۋزىكانتتان جاساقتالعان سيمفونيا وركەسترى قۇرىلدى. مۇمكىندىگى شەكتەۋلى ونەرپازداردىڭ شىعارماشىلىعىن شىڭداۋعا ارنالعان ينكليۋزيۆتى تەاتر ۇيىرمەسى جۇمىسىن باستادى. ءوز الدىنا كاسىبي ۇجىم بولىپ قايتا قۇرىلعان قالالىق «جاستار تەاترى» سىردا ساحنا ونەرىن ورىستەتۋدە جاڭا لەپ اكەلدى.
وتكەن جىل تۇيىندەلەر تۇستا ەلوردادا قىزىلوردا وبلىسىنىڭ مادەنيەت جانە ونەر كۇندەرى ءوتتى. استانا جۇرتى سىر ونەرپازدارىنىڭ شىعارماشىلىعىنا ەرەكشە ىقىلاس ءبىلدىرىپ, وڭ باعا بەردى. الدا وسىنداي مادەني شارا الماتى قالاسىندا ۇيىمداستىرىلادى.
جاقىن كۇندەرى 1000 ورىندىق ونەر ورتالىعى قىزمەتىن باستايدى, جىراۋلار ءۇيى اشىلادى. بارلىق اۋداندا نەكە قيۋ زالى, كىتاپحانا, مۋزەي, ارحيۆ, جاستار سارايى, ارداگەرلەر مەن انالار ءۇيى ورىن تەبەتىن «رۋحانيات» ورتالىقتارى سالىنادى. بالالار مەن جاسوسپىرىمدەردىڭ شىعارماشىلىعىن شىڭداۋ ماقساتىندا وبلىس ورتالىعىنان «شىعارماشىلىق اكادەمياسى» بوي كوتەرەدى.
سوڭعى جىلدارى حالىق ءجيى قونىستانا باستاعان سول جاعالاۋدان جاڭا ولكەتانۋ مۋزەيى سالىناتىنى دا سىر رۋحانياتىنداعى سەرپىندى جاڭالىق بولىپ وتىر.
قىزىلوردا
