«بايقاۋ ونلاين وتەدى. وقىلاتىن كىتاپتار دا, قازىلار القاسىنىڭ قۇرامى دا انىقتالدى. كىتاپتاردىڭ ءتىزىمى سايتتا جاريالانادى. وقىرماندار سول سايتقا تىركەلگەن سوڭ, ۇسىنىلعان كىتاپتى بەرىلگەن ۋاقىت ىشىندە وقىپ شىعادى. ودان كەيىن ونلاين تەست تاپسىرادى. ال وسى ءۇش كەزەڭنەن ءوتىپ, ىرىكتەلىپ شىققاندار فينالدىق كەزەڭدە ەسسە جازادى. قورىتىندى كەزەڭ وفلاين رەجىمدە وتەدى. وسىلايشا, كىتاپ وقيتىن ورتانى قالىپتاستىرىپ, كوپشىلىكتىڭ كوركەم ادەبيەتكە دەگەن قىزىعۋشىلىعىن ارتتىرا تۇسپەك نيەت بار», دەيدى وبلىستىق كىتاپحانا باسشىسى داريعا دۇيسەباەۆا.
«وقى جانە جەڭ» ونلاين بايقاۋىن ۇيىمداستىرۋشىلار وقۋعا ۇسىنىلعان كىتاپتاردى وقىرمانداردىڭ جاس ەرەكشەلىگىن ەسكەرە وتىرىپ تاڭداعانى كورىنىپ تۇر. مىسالى, ءبىرىنشى كەزەڭدە 10 جاستان 14 جاسقا دەيىنگى بالالارعا بەردىبەك سوقپاقباەۆتىڭ «بالالىق شاققا ساياحات» پوۆەسى, 15-تەن 18 جاسقا دەيىنگى ءجاسوسپىرىم وقىرمانعا باققوجا مۇقايدىڭ ء«ومىرزاياسى», ال 19-عا تولعان جانە ودان جوعارى جاستاعى ەرەسەك وقىرماندارعا سماعۇل ەلۋبايدىڭ ايگىلى «اقبوز ءۇي» تراگەدياسى ۇسىنىلىپ وتىر.
«وسى بايقاۋعا دايىندىق بارىسىندا وبلىس اكىمىنىڭ ورىنباسارى رينات زاكي ۇلى ءبارىمىزدى كىتاپحاناعا بىرنەشە رەت جيناپ, وقىرمانعا قانداي كىتاپ ۇسىنامىز دەگەن ماسەلەنى ابدەن ءپىسىرىپ, پىسىقتاپ الدىق. وقىرماننىڭ جاس ەرەكشەلىگىن, كىتاپتاردىڭ ەلەكتروندىق نۇسقاسىنىڭ بولۋىن ەسكەردىك. ءار كىتاپتىڭ وزىندىك جۇگى, ايتار ويى بار. تاياۋدا عانا بايقاۋدىڭ سايتى اشىلدى. وعان قازىردىڭ وزىندە 500-دەن استام ادام تىركەلگەن. وسىعان قاراعاندا, اتالعان جوبا ۇلتتىق ادەبيەتىمىزدى ناسيحاتتاپ, وقىرماندارىمىزدى وياتاتىن ءساتتى جوبا بولاتىن سياقتى», دەيدى قازىلار القاسىنىڭ مۇشەسى شىنار تولەگەنوۆا.
بايقاۋدىڭ جۇلدە قورى دا قوماقتى. جەڭىمپازدارعا 150 مىڭ تەڭگەدەن اقشالاي سىيلىق بەرىلەدى. جۇلدەگەرلەرگە 100 مىڭ, 50 مىڭ تەڭگەنىڭ سىيلىعى دايىن تۇر. مۇنىڭ سىرتىندا, كامەلەتكە تولماعان 4 وزىق وقىرمان ەلىمىزدەگى ەڭ ۇزدىك بالالار لاگەرىنە جولداما الادى. ال ەرەسەكتەر ءۇشىن مەڭدىقاراداعى م.قاراباەۆ اتىنداعى شيپاجايعا 2 جولداما قاراستىرىلعان.
قوستاناي وبلىسى
