الماتىلىقتار ونلاين راسىمدەگەن قۇجاتتارىن اۆتوحقو-عا بارماي-اق الادى

«قالا تۇرعىندارى ونلاين راسىمدەگەن قۇجاتتارىن الىسقا بارماي, قالا ورتالىعىنان الۋ ءۇشىن ارنايى سەكتور اشتىق. مۇندا كولىك قۇرالدارىنا قاتىستى ونلاين راسىمدەلگەن قۇجاتتاردىڭ دايىن نۇسقاسىن الادى. وسىلايشا, كولىك يەلەرى ۋاقىتىن ۇنەمدەيدى. قالا تۇرعىندارى مۇنىڭ ىڭعايلى ەكەندىگىن سەزىنە باستادى. ءبىر اي ىشىندە مۇندا 2 مىڭعا جۋىق (1787 قۇجات. ونىڭ 771-ءى كولىك قۇرالىن مەملەكەتتىك تىركەۋ بويىنشا, 1016-سى جۇرگىزۋشى كۋالىكتەرى) اۆتوكولىك يەلەرى ءوز قۇجاتتارىن الدى», دەيدى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالى ديرەكتورىنىڭ ورىنباسارى ايناش اۋباكىروۆا.

دايىن قۇجاتتاردى بەرۋ سەكتورى دۇيسەنبى مەن جۇما ارالىعىندا تاڭعى 9:00-دەن 18:00-گە دەيىن ءۇزىلىسسىز جۇمىس ىستەيدى. الماتى فيليالىنىڭ اۆتوكولىك يەلەرىنە جاساعان جاعدايلارى تەك بۇل عانا ەمەس. «AllurAuto», «حيۋنداي», «Mycar», «Aster auto», «Chanqan» سياقتى 9 اۆتوسالوندا اۆتوحقو ماماندارى كولىك قۇرالدارىن مەملەكەتتىك تىركەۋ بويىنشا قۇجاتتاردى قابىلداپ وتىر.

قازىرگى تاڭدا الماتى قالاسىندا اۆتوكولىك يەلەرىنە ارنالعان 4 مامانداندىرىلعان حقو جۇمىس ىستەيدى. وتكەن جىلى الماتى قالاسىنىڭ مامانداندىرىلعان حالىققا قىزمەت كورسەتۋ بولىمدەرى ارقىلى 1,3 (1 280 252)  ميلليونعا جۋىق مەملەكەتتىك قىزمەت كورسەتىلگەن.