كەسەنە كوپجىلدار بويى جوندەۋ كورمەي, جۇدەۋ كۇيدە تۇرعان. 2022 جىلى بارعانىمىزدا كۇمبەزىنىڭ ج ۇلىم-ج ۇلىمى شىعىپ, قوتىرلانىپ قالعانىن, سىرتىنداعى تاسقابىنىڭ قۇلاپ جاتقانىن كورىپ كوڭىل قۇلازىپ قالعان-دى. تاياۋدا كەسەنەگە تاعى ءبىر بارىپ, اسىلدىڭ ارۋاعىنا قۇران باعىشتاپ, تاعزىم ەتىپ قايتتىق.
بيدايىقتىڭ ىرگەسىنە كەلىپ توقتاعانىمىزدا, كەسەنەنىڭ كۇمبەزى بۇرىنعىداي ەمەس, انادايدان كوز تارتىپ جارقىراپ تۇرعانىن كورىپ, «بارەكەلدى, باسە» دەسىپ قۋانىسىپ قالدىق.
مۇنىڭ ءمان-جايىن كەيىن بىلدىك, بيىل جازدا جۇرتقا جاناشىر كاسىپكەر باقبەرگەن وتەۋلين مەن گۇلنار اپايدىڭ ۇلى, باسپاگەر ەرلان ساتىبالديەۆ باشقۇرتستاننان ەكى شەبەر الدىرتىپ, توزعان كۇمبەزدىڭ قابىعىن ارشىتىپ, تازالاتىپ, سىرتىن كۇن كوزىنە ءتوزىمدى ءارى توزبايتىن اسپان تۇستەس تىسپەن قاپتاتىپ قويعان ەكەن.
كەسەنەنىڭ كىرەبەرىسىندەگى وڭ جاق قابىرعاعا ىلىنگەن ءمارمار تاقتاعا «مىرجاقىپ دۋلات ۇلى. 1885.25.11 – 1935.5.10. كارەليادان 1992 جىلدىڭ 18 قىركۇيەگىندە اكەلىنىپ, قايتا جەرلەندى» دەپ جازىلعان. كەسەنەنىڭ ىشىندەگى كولدەنەڭ ق ۇلىپتاسقا اياۋلى الاش اقىنىنىڭ:
«كوزىڭدى اش, ويان, قازاق, كوتەر باستى,
وتكىزبەي قاراڭعىدا بەكەر جاستى.
جەر كەتتى, ءدىن ناشارلاپ, حال ھارام بوپ,
قازاعىم, ەندى جاتۋ جاراماس-تى.
بىرلىك جوق, التى اۋىزدى حالىقپىز عوي,
قاتاردان سول سەبەپتى قالىپپىز عوي», –
دەگەن ولەڭى قاشالعان.
كەسەنەنىڭ ىشىنەن كۇمبەزىنىڭ كىرپىشتەن ءورىلىپ كوتەرىلگەنى انىق كورىنەدى. تىك قابىرعاسىنىڭ جوعارى جاعىنداعى ەكى بۇرىشقا, كۇمبەزدىڭ ۇشار باسىنا قارلىعاش ۇيا سالىپتى.
قوستاناي وبلىسى,
جانگەلدين اۋدانى
