فوتو: primeminister.kz
كەزدەسۋ بارىسىندا تاراپتار ساۋدا-ەكونوميكالىق ىنتىماقتاستىقتى نىعايتۋ, اۋىل شارۋاشىلىعى, ترانزيتتىك-كولىكتىك جانە گاز سالالارىنداعى ءوزارا ءىس-قيمىل ماسەلەلەرىن تالقىلادى. اتاپ ايتقاندا, ەكىجاقتى تاۋار اينالىمىن ارتتىرۋ بويىنشا جول كارتاسىنىڭ جۇزەگە اسىرىلۋ بارىسى جانە كووپەراتسيالىق ونەركاسىپتىك جوبالار جۇمىسىنىڭ ناتيجەلەرى قارالدى. جيىندا مەملەكەتارالىق سۋ قاتىناستارىن كەڭەيتۋگە دە ەرەكشە نازار اۋدارىلدى. تاراپتار قالىپتاسقان ارىپتەستىك جوعارى دەڭگەيدە ەكەنىنە توقتالىپ, بۇرىن قول جەتكىزىلگەن ۋاعدالاستىقتاردى ورىنداۋعا جانە ءوزارا ءىس-قيمىلدى ودان ءارى كۇشەيتۋگە دايىن ەكەندەرىن راستادى. بۇل, باسقا ورتاق ماسەلەلەر قاتارىندا ترانسشەكارالىق سۋ وبەكتىلەرىن بىرلەسىپ باسقارۋعا جانە پايدالانۋعا قاتىستى دا ايتىلدى. قازاقستان وزبەكستانمەن ستراتەگيالىق ارىپتەستىكتى دامىتۋعا ەرەكشە كوڭىل بولەدى.
«مەملەكەت باسشىلارىمىزدىڭ ەرىك-جىگەرىنىڭ ارقاسىندا ءبىزدىڭ ءوزارا ءىس-قيمىلىمىز بۇكىل ءوڭىر ءۇشىن ۇلگى بولدى», دەدى ۇكىمەت باسشىسى.
پرەمەر-ءمينيستردىڭ ايتۋىنشا, وزبەكستان – قازاقستاننىڭ ءىرى ساۋدا سەرىكتەستەرىنىڭ ءبىرى. 2022 جىلى تاۋار اينالىمىنىڭ كولەمى جوسپارلانعان 5 ملرد دوللارعا جەتتى. وتكەن جىلدىڭ 11 ايىندا ءوزارا ساۋدا دا جاقسى ناتيجە كورسەتىپ, 4.1 ملرد دوللارعا جەتتى.
ء«بىزدىڭ الدىمىزدا تاۋار اينالىمىن 10 ملرد دوللارعا دەيىن جەتكىزۋ مىندەتى تۇر, سوندىقتان ساۋدا-ەكونوميكالىق بايلانىستاردى كەڭەيتۋ بويىنشا جۇيەلى شارالار قابىلداۋ قاجەت. قازاقستان ۇكىمەتى بەلگىلەنگەن بارلىق ماقساتتارعا قول جەتكىزۋ ءۇشىن بىرلەسىپ بەلسەندى جۇمىس ىستەۋگە دايىن», دەپ اتاپ ءوتتى ءاليحان سمايىلوۆ.
ءوز كەزەگىندە ابدۋللا اريپوۆ وزبەكستان مەن قازاقستان اراسىنداعى ستراتەگيالىق ارىپتەستىك دوستىق پەن تاتۋ كورشىلىك جانە ءوزارا قۇرمەت رۋحىندا قارقىندى دامىپ كەلە جاتقانىن اتاپ ءوتتى.
«مەملەكەتتەرىمىزدىڭ باسشىلارى ەكى ەل اراسىنداعى كوپقىرلى قارىم-قاتىناستاردى ودان ءارى دامىتۋدىڭ ناقتى مىندەتتەرىن ايقىندادى. ءبىز سىزدەرمەن بىرگە وسى مىندەتتەردى ورىنداۋ ءۇشىن بارلىق قاجەتتى شارالاردى قابىلداۋعا دايىنبىز», دەدى وزبەكستان پرەمەر-مينيستر.
