رەسەيدىڭ ورىنبور وبلىسىندا تۋىپ-وسكەن 33 جاستاعى دامير يسماعۇلوۆتىڭ وسى سپورت ءتۇرىن سەرىك ەتكەنىنە 10 جىلعا تايادى. سول ارالىقتا 27 جەكپە-جەك وتكىزگەن قانداسىمىز 24 رەت جەڭىسكە جەتىپ, 13 باسەكەنى مەرزىمىنەن بۇرىن اياقتادى. 2017 جىلى ول ءوزىنىڭ تۋعان ولكەسىندە ماكسيم ءديۆنيچتى نوكاۋتقا جىبەرىپ, م-1 Global نۇسقاسى بويىنشا جەڭىل سالماقتىڭ چەمپيوندىق بەلبەۋىن يەلەندى. سودان كەيىن دامير ءوز اتاعىن ەكى رەت ءساتتى قورعادى.
ول 2018 جىلى UFC-مەن كەلىسىمشارتقا وتىردى. الەمنىڭ ەڭ بەلدى پروموۋشەنىندە د.يسماعۇلوۆ جەتى جەكپە-جەك وتكىزدى. العاشقى كەزدەرى ول جانكۇيەرلەرىن تەك جارقىن جەڭىستەرىمەن قۋانتتى. دامير اۋستراليالىق الەكس گوردجيس, يسپانيالىق حوەل الۆارەس, برازيليالىق تياگۋ مويزەس پەن رافاەل الۆيس, شۆەتسيالىق گۋرام كۋتاتەلادزەنى قاپى قالدىرىپ, ءوز سالماق دارەجەسىندە توپ-15 سپورتشىنىڭ قاتارىنا ەركىن قوسىلدى. بىراق كەيىنگى ەكى كەزدەسۋىندە قانداسىمىز جەڭىلىستىڭ كەرمەك ءدامىن تاتتى. اتاپ ايتساق, 2022 جىلدىڭ جەلتوقسانىندا رەسەيلىك ارمان تسارۋكيان مەن بىلتىر جازدا امەريكالىق گراند دوۋسونعا ۇپاي سانىمەن ەسە جىبەردى. سودان كەيىن يسماعۇلوۆ UFC-دەن كەتتى.
ەدۋارد ۆارتانيان – 1991 جىلدىڭ تۋماسى. ول ارمەنيادا دۇنيەگە كەلگەنىمەن, بالا كەزىندە اتا-اناسىمەن بىرگە رەسەيگە قونىس اۋداردى. 2011 جىلى ارالاس جەكپە-جەكتەن وتكەن جارىستارعا شىعا باستادى. سول كەزدەن بەرى 29 كەزدەسۋ وتكىزىپ, 25 مارتە جەڭىس تويىن تويلادى. 14 قارسىلاسىن ەسىنەن تاندىردى. وسى تابىسى ارقىلى اسا چەمپيونى اتاندى. ەدۋارد تەك ابدۋل-ازيز ابدۋلۆاحابوۆتان ەكى رەت, اليم كوكوۆ پەن الي باگوۆتان جەڭىلدى. 2018 جىلدان بەرى ارميان فايتەرى سەگىز رەت وكتاگونعا شىعىپ, بارلىعىندا باسىمدىق تانىتتى.
كوپشىلىك ۆارتانياننىڭ قانشالىقتى قارۋلى جىگىت ەكەنىنە بىلتىر 16 ماۋسىمدا سوچيدە ۇيىمداستىرىلعان اسا گران-پري ءتۋرنيرىنىڭ فينالىندا انىق كوز جەتكىزدى. جەڭىل سالماقتىڭ باس جۇلدەسى ءۇشىن ول قازاقستاننىڭ تانىمال سپورتشىسى ارتەم رەزنيكوۆپەن كۇش سىناستى. باسەكە باستالعان بەتتە تىزگىندى قولىنا العان ەدۋارد جەرلەسىمىزدى وڭدىرماي سابادى. ءۇشىنشى راۋندتىڭ بەل ورتاسىندا تورەشى جەكپە-جەكتى توقتاتۋعا ءماجبۇر بولدى.
ارينە, دامير ارتەم ەمەس ەكەنى انىق. قازاق فايتەرىنىڭ UFC-دە جيعان مول تاجىريبەسى بار. ونىڭ ۇستىنە د.يسماعۇلوۆ بىردە-ءبىر رەت ايقىن ۇتىلعان جوق. قانداسىمىز وكتاگوندا ارميان جىگىتىنىڭ ەركىن ويقاستاۋىنا مۇمكىندىك بەرە قويماس. سوندىقتان دا ءبىزدى الدا وتە قىزىقتى ءارى تارتىستى جەكپە-جەك كۇتىپ تۇر دەپ ويلايمىز.
