اتالعان جارىسقا ەلىمىزدىڭ ءبىرىنشى راكەتكاسى الەكساندر بۋبليك قاتىسپايدى. سەبەبى ول پاريج وليمپياداسىنىڭ جولدامالارى ساراپقا سالىناتىن مونپەلەدەگى تۋرنيردە باق سىناۋدى قۇپ كورىپ وتىر. سونىمەن قاتار بەيبىت جۇقاەۆتى دا روساريو كورتىنان كورمەيمىز. رەسمي دەرەكتەرگە سۇيەنسەك, اسا دارىندى قانداسىمىز اۋسترالياداعى دودادا العان جاراقاتىنان ءالى دە ايىعا الماي جۇرگەن كورىنەدى. ءسويتىپ, ارگەنتيناعا قارسى كەزدەسۋدە دەنيس ەۆسەەۆ (الەمنىڭ 184-راكەتكاسى), تيموفەي سكاتوۆ (الەمنىڭ 227-راكەتكاسى), دميتري پوپكو (الەمنىڭ 358-راكەتكاسى) جانە الەكساندر نەدوۆەسوۆ ((جۇپتىق سايىستا الەمنىڭ 46-راكەتكاسى) ەل نامىسىن قورعايدى.
ال قارسىلاستارىمىز جايىندا نە بىلەمىز؟ ارگەنتينا قۇراماسىنىڭ دەۆيس كۋبوگىنە قاتىسىپ كەلە جاتقانىنا تۋرا ءبىر عاسىردان استى. العاش رەت ولار 1923 جىلى باق سىنادى. سول كەزدەن بەرى بەس رەت اقتىق سىنعا دەيىن القىنباي جەتتى. 1981 جىلى وڭتۇستىك امەريكانىڭ وعلاندارى فينالدا اقش-تان (1:3) ۇتىلدى. 2006 جىلى رەسەيگە (2:3) جول بەردى. 2008 جانە 2011 جىلدارى يسپانيانىڭ (1:3, 1:3) وسال تۇسىن تابا المادى. ەسەسىنە 2016 جىلى ارگەنتينالىقتاردىڭ اسىعى الشىسىنان ءتۇستى. تۋرنير بارىسىندا پولشا (3:2), يتاليا (3:1), ۇلىبريتانيا (3:2) جانە حورۆاتيادان (3:2) باسىم ءتۇسىپ, باس جۇلدەنى ولجالادى. سول جۇلدىزدى كوماندانىڭ ساپىندا حۋان مارتين دەل پوترو, فەدەريكو دەلبونيس, لەوناردو مايەر جانە گيدو پەليا سىندى ساڭلاقتار جاسىنداي جارقىلداعان ەدى.
قازىرگى كەزدە ارگەنتينانىڭ ساپىندا ءۇش مىقتى تەننيسشى بار. ولار – فرانتسيسكو چەرۋندولو, سەباستيان باەس جانە توماس مارتين ەتچەۆاري. بارلىعى دا – 23–25 جاس ارالىعىنداعى ورىمدەي جاستار. اتر رەيتينگىندە 22-ورىنعا تۇراقتاعان چەرۋندولو بىلتىر رولان گارروستىڭ ءتورتىنشى كەزەڭىنە دەيىن جەتتى. ول بوستادا مەن يستبورندەگى تۋرنيرلەردە توپ جارىپ, بۋەنوس-ايرەس پەن ليونداعى باسەكەلەردىڭ فينالىندا وينادى.
ۇزدىكتەر تىزىمىندە 25-ورىندى يەلەنىپ وتىرعان باەس كەزىندە جاسوسپىرىمدەردىڭ دۇنيەجۇزىلىك وليمپياداسى مەن رولان گارروستىڭ اقتىق سىنىندا ونەر كورسەتىپ, ءوز قاتارلاستارى اراسىندا الەمدىك رەيتينگتە كوش باستادى. اتر ساناتىنداعى تۋرنيرلەردە ءتورت رەت قارسىلاس شاق كەلىرمەدى. بيىل اۋستراليانىڭ اشىق بىرىنشىلىگىنىڭ ءۇشىنشى اينالىمىندا ءسۇرىندى.
2023 جىلى ەتچەۆاري رولان گارروستىڭ شيرەك فينالىندا ويناسا, كۇنى كەشە عانا مەلبۋرندەگى جارىستىڭ ءۇشىنشى كەزەڭىندە جەڭىلىس تاپتى. بۇل كۇندەرى ول اتر رەيتينگىندە 28-ورىندى ولجالاپ تۇر. بۇعان قوسا 28 جاستاعى پەدرو كاچين مەن 23 جاستاعى فاكۋندو دياستى دا اتاپ وتۋگە بولادى. ەكەۋى دە توپ-100 تەننيسشىنىڭ قاتارىندا.
شەشۋشى تۇستا ارگەنتينا قۇرماسىنىڭ كاپيتانى گيلەرمو كوريا قاتارعا تاجىريبەسى ابدەن تولىسقان ديەگو شۆارتسماندى قوسۋى مۇمكىن. قازىرگى كەزدە ول اتر تىزىمىندە 126-ورىندا تۇرعانىمەن, وسىدان ءۇش جىل بۇرىن عانا الەمنىڭ سەگىزىنشى راكەتكاسى اتاندى. ءداۋىرى ءجۇرىپ تۇرعان كەزىندە 31 جاستاعى شۆارتسمان رولان گارروستىڭ جارتىلاي فينالىنا دەيىن جەتىپ, US Open دوداسىندا ەكى رەت سەگىز مىقتى ويىنشىنىڭ قاتارىنا قوسىلدى. اتر تۋرنيرلەرىن ول ءتورت رەت ۇتىپ, 10 رەت اقتىق ايقاستا ەسە جىبەردى. مىنە, روساريودا جەرلەستەرىمىزگە وسىنداي قارۋلى كوماندامەن كۇش سىناسۋعا تۋرا كەلەدى.
