فوتو: gov.kz
Adal Adam يۋتۋب ارناسىنا سۇحبات بەرگەن جاقسىلىق دوسقاليەۆ ءمايىت دونورلىعىن جانداندىرماي ترانسپلانتاتسيا زارۋلىگى ازايمايتىنىن ايتتى.
«سالاماتتى قازاقستان» باعدارلاماسى بويىنشا مەديتسينالىق قۇرال-جابدىقتار الىندى, ترانسپلانتاتسيا جاساۋ ۇدەرىسى دامىعان ەلدەردە ماماندارىمىز بىلىكتىلىگىن ارتتىرىپ, تاجىريبە جيناپ قايتتى. ەلىمىزدە سەگىز جەردە ترانسپلانتاتسيا جاسايتىن دەڭگەيگە جەتتىك. ونىڭ ىشىندە اسا اۋىر وتا ءتۇرى سانالاتىن جۇرەك الماستىرۋدى تەك استانا قالاسىندا اتقارىپ كەلسەك, الماتى مەن شىمكەنت قالاسىندا دا جۇرەك الماستىرۋ وتاسى ءوتتى», دەگەن ەكس-مينيستر ەندىگى ماسەلە دونور تاپشىلىعى ەكەنىن ايتتى.
«2019 جىلعا دەيىن ادام ءتىرى كەزىندە كەلىسىم بەرسە دە, قارسى بولسا دا قايتىس بولعان سوڭ ء مايىتتىڭ اعزا مۇشەلەرى دونورلىققا الىناتىن, ودان كەيىن زاڭعا جاڭا كودەكس ەنگىزىلىپ, مارقۇم بولعان ادامنىڭ الدىن-الا كەلىسىمى نە بولماسا تۋىستارىنان رۇقسات سۇرالادى. ەگەر ولار كەلىسىم بەرمەسە ءمايىتتىڭ ورگاندارىن الا المايسىڭ», دەگەن ترانسپلانتولوگ جىلىنا 2-3 مايىتتەن عانا اعزا الىناتىندىقتان ترانسپلانتاتسيا كەزەگى كۇرت ارتقانىن ايتتى. زاڭعا جاڭا كودەكس ەنگىزىلگەنگە دەيىن جىل سايىن 20-23 ءمايىتتىڭ اعزاسىن دونورلىققا جاراپ كەلگەن.
ج.دوسقاليەۆ حالىقارالىق تاجىريبەگە ساي دامىعان ەلدەردىڭ باسىم كوپشىلىگى ءمايىت دونورلىعىن پايدالاناتىندىقتان, بىزگە دە وسى جولدى تاڭداعان دۇرىس دەيدى. مارقۇمنىڭ اعزاسىن الىپ, كەزەكتە تۇرعان ناۋقاسقا الماستىرۋ ارقىلى كوپتەگەن ادامعا ەكىنشى عۇمىر سىيلاۋ ساۋاپتى ءىس ەكەنىن العا تارتتى.
«دونورعا ءزارۋ, كەزەكتە تۇرعان 4 مىڭ ادامنىڭ ارقايسىنىڭ ارتىندا وتباسى مۇشەسى دەگەن 5 ادام بار. ولاردىڭ دا ۋايىمى باسىم. ترانسپلانتاتسيا كەزەگىن كۇتۋشىلەردىڭ اراسىندا ءبىر ءۇيدىڭ جالعىز قىزى نە ۇلى, وتباسىنىڭ اسىراۋشىسى دا ءجۇر. ۋايىمنان ەگىلگەن قام كوڭىل جانعا ءمايىت دونورلىعى ارقىلى ەكىنشى عۇمىر سىيلاۋ ىزگى امال ەمەس پە؟ مايىتكە اعزا قاجەت ەمەس, بىرنەشە جىلدان كەيىن جەر استىندا تەك سۇيەگى قالادى, اعزاسى تۇگەل ەرىپ كەتەدى. سوندىقتان زاڭدى قايتا وزگەرتىپ, بۇرىنعىداي كوزى تىرىسىندە كەلىسىم بەرسە دە, قارسى بولسا دا ءمايىتتىڭ اعزاسىن الۋدى ىسكە قوسقان دۇرىس. ءبىر ءمايىتتىڭ اعزالارى بەس ادامنىڭ ءومىرىن ساقتاپ قالا الادى», دەدى ج.دوسقاليەۆ.
