فوتو: pexels.com
سونىمەن قاتار «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسى دا نازارعا الىندى.
ءماجىلىس دەپۋتاتى اسحات ايماعامبەتوۆ اتاپ وتكەندەي, زاڭ جوبالارى ءماجىلىس دەپۋتاتتارىنىڭ باستاماسىمەن ازىرلەنگەن. زاڭ جوبالارى مەملەكەت باسشىسىنىڭ تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋ جونىندەگى تاپسىرماسىنا تولىعىمەن سايكەس كەلەدى.
«زاڭ جوباسىندا مىناداي نەگىزگى نورمالاردى ۇسىنىپ وتىرمىز: بىرىنشىدەن, ۇرىپ-سوعۋدى جانە دەنساۋلىققا جەڭىل زيان كەلتىرۋدى قولدانىستاعى اكىمشىلىك جاۋاپكەرشىلىكتەن قىلمىستىق جاۋاپكەرشىلىككە اۋىستىرۋ جانە جازانى قاتايتۋ ۇسىنىلادى. ەكىنشىدەن, جابىرلەنۋشىنىڭ ءوتىنىشىن كۇتپەي-اق, بۇقارالىق اقپارات قۇرالدارى مەن ينتەرنەت-پلاتفورمالارداعى زورلىق-زومبىلىق تۋرالى اقپارات نەگىزىندە سوتقا ارىز بەرۋگە مۇمكىندىك بەرۋ ۇسىنىلىپ وتىر», دەدى پالاتانىڭ جالپى وتىرىسىندا اسحات ايماعامبەتوۆ قۇجاتتاردى تانىستىرا وتىرىپ.
سونداي-اق وتباسىندا زورلىق-زومبىلىق جاساعان ادامداردىڭ اگرەسسيۆتى مىنەز-قۇلقىن وزگەرتۋ ءۇشىن سوتقا پسيحولوگيالىق كومەك كورسەتۋدى مىندەتتەۋ ۋاكىلەتتىلىگىن بەرۋ ۇسىنىلدى.
«پەدوفيلدەردى ءومىر بويى باس بوستاندىعىنان ايىرۋ تۋرالى ارنايى نورما بار. ءسۋيتسيدتى ناسيحاتتاۋ نەمەسە سۋيتسيدكە يتەرمەلەۋ ءۇشىن قىلمىستىق جاۋاپكەرشىلىك ەنگىزۋ ەسكەرىلگەن. بۇعان قوسا, بالالارعا ارنالعان ينتەرناتتىق ۇيىمداردى الدىن-الا ەسكەرتپەي-اق, كەز كەلگەن ۋاقىتتا ولاردى تەكسەرۋ جانە تاعى باسقا ماڭىزدى نورمالار ۇسىنىلدى. اتالعان زاڭ جوباسى بويىنشا ءماجىلىستىڭ الەۋمەتتىك-مادەني دامۋ كوميتەتى قورىتىندى ازىرلەۋگە دايىن», دەدى اسحات ايماعامبەتوۆ.
