كاسىبي ۆولونتەرلەر توپتاسادى

بىلتىر رەسپۋبليكادا توتەننەن كە­لىپ, حالىقتى ابدىراتقان وقىس وقي­عالار از بولمادى. ماسەلەن, 2023 جىل­دىڭ جازىنداعى اباي وبلى­سىن­داعى الاپات ورتتەن 60 مىڭ گەكتار ورمان القابى جانىپ كەتتى. وسى تۇستا ءار ءوڭىردىڭ بەلسەندىلەرى ءبىر جا­عا­دان باس, ءبىر جەڭنەن قول شى­عا­رىپ, كومەگىن ايامادى. توتەنشە جاع­داي­لار دەپارتامەنتتەرىمەن ىنتى­ماق­تاستىقتا جۇمىس ىستەگەن ەرىك­تى­لەر قا­ۋىپ­سىزدىكتى قاداعالاپ, ايماق تۇر­عىن­­دارىن ساقتىققا شاقىردى. اپات اي­تىپ كەلمەيدى دەسەك تە حالقىمىز قا­شاندا «ساقتانساڭ – ساقتايدى» دەيدى. سوندىقتان جاۋاپتى سالا ماماندارى جان-جاقتى قامدانۋعا بىرتىندەپ كىرىسكەن. جاڭادان قۇرىلاتىن ەرىكتى­لەر­دىڭ ءموبيلدى توبى – وسىنىڭ ايعاعى.

– توتەنشە جاعدايلاردىڭ الدىن الۋ جانە ولاردىڭ سالدارىن جويۋ سالاسىنداعى ۆولونتەرلىك قىزمەتتى دامىتۋ ماقساتىندا توتەنشە جاعدايلار مينيسترلىگى ۆولونتەرلىك ۇيىمدارمەن, ونىڭ ىشىندە ۇلتتىق ۆولونتەرلىك جەلىمەن بەلسەندى ءوزارا ءىس-قيمىل جاسايدى. 2024 جىلى ۇلتتىق ۆولونتەرلىك جەلىمەن بىرلەسىپ, قاناتقاقتى جوبا اياسىندا قوستاناي وبلىسىنىڭ بازاسىندا توتەنشە جاعدايلارعا دەن قويۋ سالاسىندا ۆولونتەرلەردىڭ ءموبيلدى توبىن قۇرۋ جوسپارلانعان. وسى توپ ءۇشىن تجم كاسىبي اۆاريالىق-قۇتقارۋ قۇرالىمدارىن دايىنداۋعا ۇقساس دەنە شىنىقتىرۋ دايارلىعى بويىنشا 10 كۇندىك دايارلاۋ جانە نورماتيۆتەردى تاپسىرۋ باعدارلاماسى ازىرلەنەدى. وقىتۋ قوستاناي وبلىسى تجد بازاسىندا ۇيىمداستىرىلادى دەپ جوس­پار­لانعان. دايارلاۋ باعدارلاماسى توتەن­شە جاعدايلاردىڭ سالدارىن جويۋ ماق­ساتىندا ۆولونتەرلەردىڭ وسىنداي ءموبيلدى توپتارىن قۇرۋ ءۇشىن وڭىر­لەر­گە جىبەرىلەدى. ءىس-شارا 2024-2026 جىلدارعا ارنالعان ۆولونتەرلىكتى دا­مىتۋ مەن قولداۋدىڭ جول كارتاسى ايا­سىن­دا ىسكە اسىرىلادى دەپ كوزدەلىپ وتىر, – دەدى توتەنشە جاعدايلار مي­­نيس­تر­لىگىنىڭ رەسمي وكىلى جاننا داۋرەنبەكوۆا.

بۇگىندە ەلىمىزدەگى 136 ۆولونتەرلىك ۇيىم, ونىڭ ىشىندە 47 مىڭنان اسا ۆولونتەر توتەنشە جاعدايلار مينيسترلىگى قۇرىلىمدارىمەن بىرلەسە جۇمىس ىستەيدى. ولار تۇراقتى دايىندىقتان دا ءوتىپ وتىرادى. كەيىنگى ءۇش جىلدى ەسەپكە الساق, 3,5 مىڭنان اسا قو­عام بەلسەندىسى سالاعا قاتىستى ۆەدومستۆولاردا وقىس وقيعا كەزىندەگى قارىم-قابىلەتى مەن ءبىلىم-بىلىگىن شىڭ­داعان.

– توتەنشە جاعدايلار مينيسترلىگى ۇكىمەتتىك ەمەس ۇيىمدارمەن بىرلەسە بىرنەشە باعىت بويىنشا جۇمىستى ۇيىم­داستىرادى. اتاپ ايتقاندا, تا­بيعي اپاتتاردان زارداپ شەككەن ادام­دارعا كومەك كورسەتۋگە قاتىسۋ, گۋ­مانيتارلىق كومەك كورسەتۋ. ەكىن­شى­دەن, توتەنشە جاعدايلاردىڭ الدىن الۋعا جانە ولاردىڭ سالدارىن جويۋعا قاتىسۋ. ۇشىنشىدەن, جوعالعان ادامداردى ىزدەۋ بويىنشا ىزدەۋ-قۇتقارۋ جۇمىستارىنا قاتىسۋ, – دەدى ءباسپاسوز حاتشىسى.

ۆولونتەرلەر  –  ەلدىڭ ۇيىمشىلدىعى مەن بىرلىگىن قاجەت ەتەتىن ءىس-شارالاردان تىس قالمايتىن جاندار. كۇنى بۇگىنگە دەيىن وسى جاناشىرلار ءورتتىڭ, گاز­دىڭ شىعۋىنىڭ الدىن الۋ, سۋ ايدىن­دا­رىنداعى قاۋىپسىزدىكتى ساقتاۋ باعى­تىن­داعى ءتۇرلى جيىنعا بەلسەنە قاتىس­قان. وتكەن جىلدىڭ وزىندە 1 700-دەن استام پروفيلاكتيكالىق ءىس-شارادا بوي كورسەتكەن.

قازىرگى تاڭدا بىلتىر ەرىكتى­لەر­دىڭ حالىقارالىق فورۋمنىڭ قورى­تىن­دىسى بويىنشا مينيسترلىك تو­تەنشە جاعدايلاردىڭ سالدارىن جويۋ كەزەڭىندە ۆولونتەرلەردىڭ قاۋىپ­سىز­دىگىن قامتاماسىز ەتۋ ءۇشىن مەم­لە­كەت­تىك ورگاندارمەن جانە ۆولون­تەر­لىك ۇيىمدارمەن بىرلەسىپ, وقىس وقي­عا­لاردىڭ الدىن الۋ جانە ولاردىڭ زاردابىمەن كۇرەسۋ جولىنا ۆولون­تەر­لەردى تارتۋ الگوريتمى جان-جاقتى تالقىلانىپ, ازىرلەنىپ جاتىر.