ايتۋلى شەبەر شىعارماشىلىق ومىرىندە 150-گە جۋىق تۋىندىنى جارىققا شىعاردى. ساندىك-قولدانبالى ونەرىنىڭ شەبەرى, مازمۇنى تەرەڭ, كومپوزيتسيالىق قۇرىلىمى كەڭ «جاڭا قالا», «مەنىڭ باعىم», «توميريس», «شاماندار», «ماڭگىلىك», «اڭىراقاي شايقاسى» سىندى ءىرى گوبەلەندەردىڭ اۆتورى. كورمەدە ونەر يەسىنىڭ «عاسىرلار جاڭعىرىعى» (1995), «دومبىرا» (1985), «كۇز» (1985) اتتى گوبەلەندەرى ايرىقشا كوزگە تۇسەدى. كورمەنىڭ نەگىزگى بولىگىنەن سۋرەتشىنىڭ كەسكىندەمەلىك تۋىندىلارى ورىن العان.
اۆتور ءوز شىعارماشىلىعىندا حالىقتىڭ ءداستۇرلى تۇرمىسى مەن كونە دالا وركەنيەتىنىڭ ميفولوگياسىنا, تاريحى مەن مادەنيەتىنە باستى نازار اۋدارادى. اسىرەسە «عاسىرلار توعىسىندا», «ابىلايحان شايقاس الدىندا» (1998), «توميريس» (2011), « ۇلى دالا جادىگەرى» (2014), ء«ايشابيبى» (2015), «ارۋ سەزىمى» (2016), «تۇرىك قاعاناتى» (2019), «ۇماي – انا» (2019) سەكىلدى كەڭ تىنىستى شىعارمالارى ونەر كەڭىستىگىندە مويىندالعان ىرگەلى ىزدەنىستەر.
«راقىمجان سادىعۇلوۆ – بەينەلەۋ ونەرىنىڭ بىرنەشە جانرىن شەبەر مەڭگەرگەن, ءارتۇرلى تەحنيكادا ەركىن جۇمىس ىستەي الاتىن تالانت يەسى. سۋرەتشى شىعارماشىلىعىن شابىتتاندىراتىن باستاۋلار قازاقتىڭ حالىق ونەرى مەن تاريحي تۇلعالارى. اۆتوردىڭ شىعارماشىلىعىنا ءتان ەرەكشەلىكتەر – قانىق كولوريت, تۇستىك قاتاردىڭ باتىل كونتراستى. ونىڭ كەسكىندەمەسى تۇستىك جارىقپەن نۇرلانعان ستيليستيكاسى ساندىلىككە جاقىن. اۆتوردىڭ وي-ساناسى مەن رۋحىن عاسىرلىق مادەني قۇندىلىقتارمەن سۋسىنداتقان ءداستۇرلى قازاق الەمىنىڭ بەينەلەرى رۋحتاندىرادى», دەيدى كورمە جەتەكشىسى, ونەرتانۋشى لاۋرا ابىلداەۆا.
ونەرتانۋشى اتاپ وتكەندەي, ر.سادىعۇلوۆ تەوريا مەن تاجىريبەنى, ارنايى پاندەردى وقىتۋ ادىستەمەسىن جەتىك مەڭگەرگەن كاسىبي دەڭگەيى جوعارى مامان. ول «ساندىك-قولدانبالى ونەر» ماماندىعى بويىنشا بىرنەشە وقۋ-ادىستەمەلىك قۇرالداردىڭ, عىلىمي ماقالالاردىڭ جانە بەينەلەۋ ونەرى مامانداندىرىلعان تەرميندەرىنىڭ قازاقشا-ورىسشا-اعىلشىنشا تۇسىندىرمە سوزدىگىنىڭ, و.تاڭسىقباەۆ شىعارماشىلىعىنا ارنالعان كىتاپتىڭ اۆتورى.
سۋرەتشى 30 جىلدان بەرى ءوز شىعارماشىلىعىمەن بىرگە ۇستازدىق قىزمەتتى دە قاتار الىپ ءجۇر. ونىڭ جان دۇنيەسى, كاسىبى, ءومىر تىنىسى ونەردەن ءورىس تاپقان. مازمۇندى ءىس-شارانىڭ اشىلۋ سالتاناتىنا قاتىسقان زيالى قاۋىم سادىعۇلوۆ قولتاڭباسى حاقىندا پايىمدى پىكىر ايتتى.الماتىلىقتار مەن قالا قوناقتارى ەكسپوزيتسيانى 16 اقپانعا دەيىن تاماشالاي الادى.
الماتى
