جىلدا وسى ۋاقىتتا وزەن-كولگە باي قوستاناي وبلىسىندا تابيعات جاناشىرلارى كول بەتىندە مۇز بۇرعىلاپ, سۋ استىنا اۋا جىبەرۋگە كىرىسىپ كەتەتىن. بيىلعى بۇرعىلاۋ جۇمىستارى زارەچنىي اۋىلىنىڭ ماڭىنداعى شاعىن كولدەن باستالدى. مامانداردىڭ ايتۋىنشا, قىس مەزگىلىندە مۇز قالىڭداعان سايىن, بالىقتارعا وتتەگى جەتپەي قالاتىن كورىنەدى.
«سودان جاپپاي قىرىلىپ قالۋى مۇمكىن. وسىعان بايلانىستى بالىق شارۋاشىلىعى ينسپەكتسياسى, اۋەسقوي بالىقشىلار قاۋىپتىڭ الدىن الۋ ءىس-شارالارىن وتكىزۋدى داستۇرگە اينالدىرعان. مۇزدى بۇرعىلاپ, ويىق جاسايمىز دا, وعان قامىس باۋ سالامىز. وسىلايشا, سۋ استىنا اۋا جىبەرىپ, بالىقتى امان ساقتاپ قالامىز. بۇعان قوسا اەراتور سياقتى قوندىرعىلاردى دا پايدالانىپ جاتىرمىز», دەيدى تابيعي رەسۋرستار جانە تابيعات پايدالانۋدى رەتتەۋ باسقارماسى بالىق, اڭشىلىق جانە ەرەكشە قورعالاتىن تابيعي اۋماقتار ءبولىمىنىڭ باسشىسى امانگەلدى يسمايىلوۆ.
بۇرعى تەسكەن ويىق ءبىر تۇندە مۇز بولىپ قاتىپ قالۋى مۇمكىن. ال ويىققا وتىرعىزىلعان قامىستىڭ ءتۇبى سۋعا مالىنىپ تۇرعاندىقتان وڭايلىقپەن قاتا قويمايدى. وسىلايشا, قۋىس وزەك قامىس سۋعا وتتەگى جىبەرىپ تۇراتىن تۇتىكشە قىزمەتىن اتقارادى.
جالپى, وبلىس اۋماعىندا شامامەن 8 مىڭنان اسا سۋ ايدىنى بار. ونىڭ 384-ءى جەرگىلىكتى ماڭىزى بار بالىق شارۋاشىلىعى ايدىندارىنىڭ تىزىمىنە ەنگىزىلگەن. بۇگىندە وڭىردە 173 كاسىپكەر 245 سۋ ايدىنىن پايدالانىپ وتىر. وزدەرىنە بەكىتىلگەن كولدىڭ تازالىعى مەن سۋ استىنداعى تىرشىلىكتىڭ اماندىعى وسى كاسىپكەرلەردىڭ موينىنا جۇكتەلگەن.
اۋەسقوي بالىقشىلار وڭىردەگى سۋ ايدىندارىندا نەگىزىنەن موڭكە, تابان, شورتان, الابۇعا, وڭعاق, تۇقى بالىق مەكەندەيتىنىن ايتادى.
قوستاناي وبلىسى
