«قاجەت بولشەكتەردى ىزدەپ ءجۇرىپ ءار جەردەن جيناپ الدىم. «جيگۋليدىڭ» بەلدەمەسىن كەسىپ, قىسقارتىپ سالدىم, قوزعالتقىشى – موتوبلوكتىكى. قوسالقى بولشەكتەرى دە وڭاي تابىلادى. كەيبىر بولشەكتەردى مەتالل قابىلدايتىن جەردەن الۋعا تۋرا كەلدى. ەسكى بولعانىمەن, مىقتى تەمىرلەر, ارزانعا شىقتى. ءبارىن تۇگەندەپ بولعان سوڭ, بولگار كەسكىشىن, كىلت, دانەكەرلەرۋ قۇرىلعىسى كەرەك بولدى. وسى ءۇش سايماننىڭ كومەگىمەن ءبىر جىلدىڭ ىشىندە باستان-اياق قۇراستىرىپ شىقتىم. كوپ قاراجات كەتكەن دە جوق. ازىن-اۋلاق مال ۇستاپ وتىرمىز. ونىڭ قىستىق ازىعىن دايارلاۋ قيىنداپ بارادى. ءبىر توننا ءشوپتىڭ باعاسى بيىل 35-40 مىڭ تەڭگەگە جەتتى. قازىر وسى تراكتورىمنىڭ ارقاسىندا ءشوپتى دە شاۋىپ الامىن, ەكى-ءۇش ەسە ارزانعا تۇسەدى», دەيدى قايرات جۇمات ۇلى.
امبەباپ تراكتوردىڭ ەنى 90 سم, شاپ-شاعىن بولعانىمەن, بويىندا جەتى اتتىڭ كۇشى بار. وسى اۋىلداعى تالاي اۆتوكولىكتى كۇرتىك قارعا باتىپ قالعان جەرىنەن وڭاي ج ۇلىپ العان. قورانىڭ ەسىگىنە دە وپ-وڭاي سىيىپ كەتەدى. قي شىعارۋعا, اۋلانىڭ قۋىس-قۋىسىنداعى قاردى تازالاۋعا تاپتىرمايتىن تەحنيكانىڭ ناق ءوزى. ءبىر ساعات جۇمىس ىستەسە, نەبارى 1 جارىم ليتر جانارماي كەتەدى. ارتىنا تىركەيتىن شالعى, سوقا, تىرماق, كارتوپ وتىرعىزاتىن, قازاتىن, تۇپتەيتىن سايمانى, الدىنا ىلەتىن ايىر, كۇرەگى بار. ونەرتاپقىش كوكتەمگى قي شىعارۋ, جەر جىرتىپ, كارتوپ وتىرعىزۋ, جازعى ءشوپ شابۋ, ونى تىرمالاپ, جيناپ, جەتكىزۋ, قىستا قار كۇرەۋ سەكىلدى شارۋانىڭ ءبارىن وسى شاعىن تراكتورىمەن-اق تىندىرىپ وتىر.
بۇگىندە اۋىل اڭگىمەسىنىڭ ەڭ باستى تاقىرىبى دا قايراتتىڭ تراكتورى توڭىرەگىندە ءوربيدى. كورشىلەرى كومەك سۇراپ كەلەدى. كوزتانىس, بەيتانىس كىسىلەر اۋىلدىڭ ءبىر شەتىنەن ارنايى كەلىپ, تراكتوردىڭ تىنىسىن, جۇمىسىن تەكسەرىپ كورىپ, باس شايقاپ كەتەدى. ساتىپ العىسى كەلەتىندەر دە كوپ. ءتىپتى قايرەكەڭدى اۋدان اكىمى ارنايى شاقىرىپ الىپ, ورتالىق كوشەلەردىڭ مۇزىن قىرعىزىپ كورگەن سوڭ: «تروتۋارلاردىڭ قارىن ارشىپ, مۇزىن قىرىپ تۇرۋعا تەندەرگە قاتىسىپ كورسەڭىز قايتەدى؟» دەگەن ۇسىنىس ايتىپتى. الايدا ۋاقىت تاپشى بولعان سوڭ, ونەرتاپقىش اكىمنىڭ بۇل ۇسىنىسىنان باس تارتىپ وتىر. ويتكەنى اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ كولىگىن جۇرگىزەدى. بۇل دا جاۋاپتى جۇمىس, كۇنۇزاق ءبولىمنىڭ شارۋاسىمەن اندا-مۇندا شاۋىپ جۇرەدى.
«وقۋشى كەزىمىزدە مەكتەپتە «كولىكتانۋ نەگىزدەرى» دەگەن ساباق ءجۇردى. سول ءپاندى جاقسى كورەتىنمىن. اعايىمىز ءار ءتۇرلى تەحنيكانىڭ قالاي قۇراستىرىلاتىنىن ۇيرەتەتىن. كەيىن اسكەردەن كەلگەن سوڭ, اۋىلعا ورالىپ تراكتور تىزگىندەدىم. بەستاۋدا مەحانيزاتور بولىپ ەڭبەك ەتتىم. 1999 جىلى قامىستىعا كوشىپ كەلدىك. ال ەندى مەنىڭ ونەرتاپقىشتىعىما كەلسەك, مۇنىڭ ءبارى اۋىل تۇرمىسىنداعى قاجەتتىلىكتەن تۋىپ جاتىر», دەيدى تەمىردى تالداي ءيىپ, تراكتور جاساپ شىعارعان شەبەر.
قوستاناي وبلىسى,
قامىستى اۋدانى
