قارقارالى اۋدانىنا جۇمىس ساپارىمەن بارعان وبلىس اكىمىنىڭ ورىنباسارى ەرلان قۇسايىن مەن اۋدان اكىمى ءادىلجان ارعىنوۆ پاتەر كىلتتەرىن سالتاناتتى تاپسىرۋ شاراسىنا قاتىسىپ, باسپانالى بولعان وتباسىلارعا اق تىلەگىن جاۋدىردى.
ءسويتىپ, 18 پاتەرلى ەكى جاپ-جاڭا ۇيگە قونىستانعان 36 وتباسى كورشى-قولاڭ بولىپ شىعا كەلدى.
الەۋمەتتىك ساناتتارى بويىنشا ايتا وتسەك, پاتەر العانداردىڭ سەگىزى – اتا-اناسىنىڭ قامقورلىعىنسىز قالعان بالالار, تاعى ءبىر سەگىزى – كوپبالالى وتباسىلار جانە جيىرما ادام – الەۋمەتتىك وسال توپقا جاتاتىن جاندار.
بىلتىر دا قارقارالىدا 10 وتباسى باسپانامەن قامتاماسىز ەتىلگەن ەدى. ولاردىڭ ەكەۋىنىڭ بۇرىنعى باسپاناسى اپاتتى جاعدايدا دەپ تانىلعان, ۇشەۋى كوپبالالى انا, ەكەۋى اتا-اناسىنىڭ قامقورلىعىنسىز قالعان وتباسى, تاعى دا ەكەۋى تولىق ەمەس وتباسى جانە بىرەۋى زەينەتكەر كىسى. الداعى ۋاقىتتا دا وسىنداي باسپانالار وڭىردەگى مۇقتاج جاندارعا كەزەكپەن, اۋداندىق تۇرعىن ءۇي كوميسسياسىنىڭ قاداعالاۋىمەن بەرىلە بەرەدى.
قاراعاندى وبلىسى,
قارقارالى اۋدانى
