وتىرىسقا وڭىرلىك قولباسشىلىقتاردىڭ قولباسشىلارى, ۇلتتىق ۇلان اكادەمياسىنىڭ باستىعى, اسكەري ءبولىم كومانديرلەرى, باس باسقارمالار مەن باسقارمالاردىڭ, سونداي-اق اسكەري پوليتسيا قىزمەتتەرىنىڭ, ورتالىقتاردىڭ جانە دەربەس بولىمدەردىڭ باستىقتارى قاتىستى.
ايتا كەتەيىك, وڭىرلىك قولباسشىلىقتار مەن بارلىق اسكەري ءبولىم كومانديرلەرى وتىرىسقا ونلاين-رەجيمدە قوسىلدى.
اسكەري كەڭەستە 2023 جىلعى اسكەردىڭ قىزمەتتىك-جاۋىنگەرلىك ءىس-ارەكەتى قورىتىندىلانىپ, الداعى كەزەڭگە ارنالعان مىندەتتەر قويىلدى.
باس قولباسشىنىڭ ورىنباسارلارى بولىمدەر مەن بولىمشەلەردىڭ قىزمەتتىك-جاۋىنگەرلىك ءىس-ارەكەتىن ۇيىمداستىرۋ, كادرلاردى نىعايتۋ, اسكەري ءتارتىپ پەن قۇقىقتىق ءتارتىپتى ساقتاۋ بويىنشا ماسەلەلەر كوتەردى.
ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور قايرات ۇمبەتوۆ «تاربيە جۇمىسىن ۇيىمداستىرۋ, جەكە قۇرامنىڭ مورالدىق-جاۋىنگەرلىك رۋحىن ارتتىرۋ جانە اسكەري ۇجىمداردى بىرىكتىرۋدەگى ەلەۋلى كەمشىلىكتەر» تۋرالى بايانداما جاسادى.
«مەملەكەت باسشىسى ءىىم مەن ۇلتتىق ۇلان باسشىلىعىنا قازاقستاندىق ءپاتريوتيزمدى نىعايتۋ بويىنشا بىرقاتار تاپسىرما جۇكتەگەن ەدى. بۇل باعىتتا اۋقىمدى جۇمىستار ءجۇرىپ جاتىر. وتكەن جىلى 11 اسكەري قىزمەتشى مەملەكەتتىك ناگرادامەن ماراپاتتالدى. ۇلتتىق ۇلاننىڭ ارنايى جاساق بولىمشەسى تۋرالى «بۇركىت» كوركەم ءفيلمى كورەرمەندەرگە جول تارتتى. «جاس بۇركىت» اسكەري-پاتريوتتىق قوزعالىسىنىڭ 20 جىلدىعىن اتاپ وتتىك. ۇلتتىق ۇلان بويىنشا 40-قا جۋىق اشىق ەسىك كۇنى ۇيىمداستىرىلدى», دەدى بايانداما بارىسىندا اسكەردىڭ باس تاربيەشىسى.
ءوز كەزەگىندە «جەكە قۇرام اراسىنداعى اسكەري ءتارتىپتىڭ, زاڭدىلىق پەن قۇقىقتىق ءتارتىپتىڭ جاي-كۇيى» تاقىرىبىندا اسكەري پوليتسيا باستىعى پولكوۆنيك قۋات توماشينوۆ بايانداما جاسادى.
ۇلتتىق ۇلان باس قولباسشىسى باياندامالار اياقتالعان سوڭ ءتارتىپ پەن تاربيە جۇمىسىنا قاتىستى بىرقاتار تاپسىرما بەردى. سونداي-اق قۇقىق بۇزۋشىلىققا ءجيى جول بەرگەن اسكەري ءبولىم كومانديرلەرىن تىڭداپ, ولقىلىقتاردى اقپاندا وتەتىن كومانديرلەر دايىندىعىندا ەگجەي-تەگجەيلى قاراستىراتىنىن ەسكەرتتى.
جيىن بارىسىندا اسكەردىڭ جاۋىنگەرلىك جانە جۇمىلدىرۋ دايىندىعىن ارتتىرۋ, جەكە قۇرامنىڭ مورالدىق-پسيحولوگيالىق جاي-كۇيىن نىعايتۋ ماسەلەلەرىنە ەرەكشە نازار اۋدارىلدى.
شارا سوڭىندا 2024 جىلعى جاۋىنگەرلىك سايىس باستاماشىسى «شىعىس» وڭىرلىك قولباسشىلىعىنا قاراستى 5511 اسكەري ءبولىمىنىڭ كومانديرى پولكوۆنيك ايبەك يسەنوۆ اسكەر جەكە قۇرامىنا ۇندەۋ جاسادى.
القالى جيىن قورىتىندىسى بويىنشا باسشىلىق ەتۋ جانە ورىنداۋ ءۇشىن وڭىرلىك قولباسشىلىقتار مەن اسكەري بولىمدەرگە جىبەرىلەتىن اسكەري كەڭەس قاۋلىسى قابىلداندى. ءىس-شارادا باس قولباسشى سپارتاكيادا جانە سپورتتىق-بۇقارالىق جۇمىس جەڭىمپازدارىن ديپلومدارمەن جانە كۋبوكتارمەن ماراپاتتادى.
