فوتو: primeminister.kz
كەزدەسۋ بارىسىندا قازاقستان وڭىرلەرى مەن باشقۇرتستان اراسىنداعى ونەركاسىپ كووپەراتسياسىن نىعايتۋ جونىندەگى شارالار, سونداي-اق قازاقستان-رەسەي ىنتىماقتاستىعىن ودان ءارى تەرەڭدەتۋ ماقساتىندا اۋىل شارۋاشىلىعى, لوگيستيكا, ءبىلىم بەرۋ جانە تۋريزم سالالارىنداعى ءوزارا ءىس-قيمىل ماسەلەلەرى تالقىلاندى.
ۇكىمەت باسشىسى رەسەي قازاقستاننىڭ نەگىزگى ساۋدا-ەكونوميكالىق ارىپتەستەرىنىڭ ءبىرى ەكەنىن اتاپ ءوتتى. بۇعان 2022 جىلى تاۋار اينالىمى كولەمىنىڭ 10%-عا ءوسىپ, 27 ملرد دوللارعا جەتكەنى دالەل. وتكەن جىلدىڭ 11 ايىندا دا اراداعى ساۋدا-ساتتىق جاقسى ناتيجە كورسەتىپ, شامامەن 24 ملرد دوللاردى قۇرادى.
«قازاقستان-رەسەي ساۋدا قاتىناستارىنىڭ دامۋىنا باشقۇرتستان رەسپۋبليكاسى ەلەۋلى ۇلەس قوسىپ كەلەدى. اتالعان كەزەڭدە وڭىرلەر اراسىنداعى تاۋار اينالىمى 350 ملن دوللاردان استى. وسى رەتتە اراداعى ساۋدا-ەكونوميكالىق بايلانىستاردى ودان ءارى كەڭەيتۋ ءۇشىن زور الەۋەت بار», دەدى ءا.سمايىلوۆ.
سونىمەن قاتار پرەمەر-مينيستر استانادا ءوتىپ جاتقان بيزنەس-فورۋم مەن ىنتىماقتاستىق جونىندەگى جۇمىس توبىنىڭ وتىرىسى ەكىجاقتى ءوزارا ءىس-قيمىلعا ەلەۋلى سەرپىن بەرەتىنىنە سەنىم ءبىلدىردى.
ءوز تاراپىنان باشقۇرتستان باسشىسى ونەركاسىپ كووپەراتسياسىن ودان ءارى تەرەڭدەتۋگە جانە ساۋدا قاتىناستارىن دامىتۋعا قىزىعۋشىلىق تانىتتى.
«كاسىپورىندارىمىزدىڭ ەكونوميكالىق ىنتىماقتاستىعى ارتىپ كەلەدى. مۇمكىندىكتەر ەندى عانا ىسكە اسىرىلا باستالعانىن كورىپ وتىرمىز. تاۋار اينالىمىن ودان ءارى ۇلعايتۋ – الداعى جىلدارداعى ورتاق مىندەتىمىز. بۇل ءۇشىن ءتيىستى العىشارتتىڭ بارلىعى بار», دەدى رادي حابيروۆ.
