سولتۇستىك قازاقستان وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى اسەت جۇماتاەۆتىڭ ايتۋىنا قاراعاندا, وبلىستاعى 13 اكىمشىلىك ءبولىنىستىڭ 10-ىندا قىزىلشامەن اۋىرۋ دەرەگى تىركەلگەن. تەك ءۇش-اق اۋدان بۇل دەرتتەن ادا.
قىزىلشانىڭ نەگىزگى وشاعى پەتروپاۆل قالاسىندا شوعىرلانعان. بارلىق سىرقاتتىڭ 270-ءى, ياعني 86%-ى قالانىڭ ۇلەسىندە. اۋداندار اراسىنان ەسىلدە – 12 ادام, ال ماعجان جۇماباەۆ, قىزىلجار, مامليۋت اۋداندارىندا 6 ادامنىڭ قىزىلشا جۇقتىرىپ العانى بەلگىلى بولىپ وتىر.
جاس شاماسى بويىنشا ەڭ كوپ اۋىرعاندار – 15 جاسقا دەيىنگى جاسوسپىرىمدەر. بۇل جاستاعىلاردىڭ اراسىندا سىرقاتتانعاندار سانى – 184 ادام, ياعني 58%. ودان كەيىنگى ەڭ كوپ اۋىرعاندار – 15 پەن 19 جاستاعىلار, بۇلاردىڭ سانى – 66. سىرقاتقا ۇشىراعانداردىڭ 87%-ى, ياعني 274 ادام – ەكپە الماعاندار. سونىڭ ىشىندە 58 سىرقات ۆاكتسينادان باس تارتۋى سەبەبىنەن اۋرۋ جۇقتىرعان.
وبلىستىڭ دارىگەرلەرى قىزىلشانىڭ شىعۋ وشاقتارىن قۇرتۋعا تىرىسىپ جاتىر. بۇگىنگى تاڭدا قىزىلشانىڭ 15 بەلسەندى وشاعى انىقتالىپ, قاتاڭ باقىلاۋعا الىنعان. سونىمەن بىرگە 99 ۇيىشىلىك وشاقتار انىقتالعان. قازىر سىرقاتتانعاندارمەن قارىم-قاتىناس جاساعان 22 132 ادام انىقتالعان. سونىڭ ىشىندە 72 ساعات ىشىندە قاتىناستا بولعان بارلىق 1 602 ادامنىڭ 1 282-سىنە ەكپە ەگىلدى.
«جىعىلعانعا – جۇدىرىق» دەگەندەي, قىزىلشانىڭ ۇستىنە تۇماۋدىڭ دا ماۋسىمدىق كوبەيۋى ارتىپ وتىر. 2023 جىلدىڭ 1 قازانى مەن 2024 جىلدىڭ 17 قاڭتارى ارالىعىندا تۇماۋ تيگەن 55 687 ادام تىركەلگەن. بۇل بىلتىرعى ەپيدەميالىق ماۋسىمنىڭ سايكەس مەرزىمىنە قاراعاندا 1,7 ەسە ارتىق. جاس شاماسىنا قاراعاندا اۋىراتىنداردىڭ نەگىزگى ۇلەسى 14 جاسقا دەيىنگى بالالار اراسىندا. بارلىق سىرقاتتىڭ 66 پايىزى وسى جاستاعىلاردىڭ ۇلەسىندە. تۇماۋدىڭ دا نەگىزگى وشاعى پەتروپاۆل قالاسى بولىپ وتىر. بارلىق سىرقاتتىڭ 37%-ى پەتروپاۆل قالاسىنىڭ ۇلەسىندە. اۋداندار اراسىندا قىزىلجار العا شىققان. بۇل اۋداندا بارلىق سىرقاتتىڭ 30%-ى تۇرادى. ال ماعجان جۇماباەۆ, عابيت مۇسىرەپوۆ, اققايىڭ اۋداندارىندا 5-6 سىرقاتتان بار ەكەنى انىقتالعان. وسىعان بايلانىستى اسەت جۇماباەۆ حالىققا كوپ ادام شوعىرلانعان جەرگە بارماۋدى جانە مۇمكىندىگىنشە قوعامدىق كولىككە مىنبەۋدى ۇسىنىپ وتىرمىز دەيدى. سونىمەن بىرگە ول حالىققا بەتپەردە تاعىپ ءجۇرۋدىڭ پايدالى ەكەنىن جەتكىزدىك دەدى.
سولتۇستىك قازاقستان وبلىسى
