فوتو: Turizm_jane_sport_ministrligi
جيىندا ترياتلوننان قازاقستان قۇراماسىنىڭ بىلتىر حالىقارالىق جارىستاردا ءتاۋىر ناتيجە كورسەتكەنىمەن, قىتايداعى ازيا ويىندارىندا باسەكە الدىنداعى ءوز مىندەتتەمەلەرىن ورىنداي الماعانى دا ايتىلدى. ياعني, ۇلتتىق قۇرامانىڭ باس جاتتىقتىرۋشىسى ازيادانىڭ الدىندا 1 كۇمىس مەدال جەڭىپ الۋعا ۋادە بەرگەنىمەن, ءىس جۇزىندە تەك 1 قولا جۇلدەگە قول جەتكىزدى.
«قازاقستان ترياتلونىنىڭ حالىقارالىق ارەنادا جەڭىسپەن ورىلگەن جاقسى ءداستۇرى بار. اتاپ ايتار بولساق, ەلىمىزدىڭ داڭقتى ترياتلونشىسى گااگ دميتري 1999 جىلى الەم چەمپيوناتىندا توپ جارىپ, سيدنەي وليمپياداسىندا ونەر كورسەتتى. وكىنىشكە قاراي, جاسىل قۇرلىقتاعى الاماندا جەرلەسىمىز 4-ورىندى قاناعات تۇتۋعا ءماجبۇر بولدى. سونىمەن قاتار وتاندىق سپورتشىلاردان وليمپيا ويىندارىنا ميحايل كۋزنەتسوۆ (سيدنەي) پەن دانيل ساپۋنوۆ (افينى) تا قاتىسقان ەدى. الايدا, ولار دا جۇلدەلى ورىنداردان كورىنە المادى. 2012 جىلدان بەرى جەرلەستەرىمىز ترياتلون سپورتىنان وليمپيادا ليتسەنزياسىن جەڭە الماي كەلەدى. سوندىقتان الداعى ۋاقىتتا وتاندىق ترياتلوندى جانداندىرىپ, ناتيجەگە جۇمىس ىستەۋ كەرەك», دەدى ەرمەك مارجىقپاەۆ.
سونىمەن قاتار مينيستر وليمپيا ويىندارى قارساڭىندا ترياتلون فەدەراتسياسىنا وليمپيادا جولداماسىن يەلەنۋگە مۇمكىندىگى بار ۇلتتىق قۇراما كوشباسشىلارىن جەكە جوسپار بويىنشا دايىنداۋ, 2024 جىلعا ارنالعان سپورتتىق-بۇقارالىق ءىس-شارالاردىڭ كۇنتىزبەسىن جۇيەلەۋ, حالىقارالىق ۇيىمدارداعى وكىلدەرىمىزدىڭ سانىن ارتتىرۋ جانە الەمدىك دەڭگەيدەگى تورەشىلەردى دايارلاۋ جونىندەگى جۇمىستى جالعاستىرۋ تاپسىرىلدى.
