مىڭ كوشباسشى

مەملەكەت باسشىسىنىڭ تاپسىرماسى بويىنشا وقۋ-اعارتۋ مينيسترلىگى 2023 جىلدان باستاپ پرەزيدەنتتىك جاستار كادرلىق رەزەرۆىنىڭ ۇلگىسى بويىنشا ءبىلىم بەرۋدەگى وزگەرىستەر كوشباسشىلارىن ىرىكتەۋ جانە دايارلاۋ تەتىگىن ازىرلەۋ ءارى بەكىتۋ جونىندەگى جوبانى ىسكە اسىرىپ جاتىر. بۇل جوبا ءبىلىم سالاسىن ىلگەرىلەتۋگە باعىتتالعان. سوندىقتان مامانداردى ىرىكتەۋگە ءجىتى كوڭىل ءبولىندى. ۇمىتكەرلەردى ىرىكتەۋ جانە بىلىكتىلىگىن ارتتىرۋ بويىنشا ءىس-شارالاردى نازارباەۆ زياتكەرلىك مەكتەپتەرىنىڭ پەداگوگيكالىق شەبەرلىك ورتالىعى وتكىزدى.

پەداگوگيكالىق شەبەرلىك ورتالىعىنىڭ مالىمەتى بويىنشا, باستاپقى كەزەڭدە جوباعا قاتىسۋعا 8 068 ادام تىركەلىپ, ونىڭ 2 838-ءى تەستىلەۋدەن ءوتتى. تەستىلەۋ ناتيجەسى بويىنشا وقۋعا ۇسىنىلعان ۇمىتكەرلەردىڭ سارالانعان ءتىزىمى قالىپتاستىرىلدى. ولاردىڭ اراسىنان ىرىكتەلگەن 500-ءى ارنايى وقىتۋدان ءوتتى. ءارى قاراي باعدارلامانىڭ ەكىنشى كەزەڭىنە سايكەس ۇمىتكەرلەردى ىرىكتەۋ ءۇش دەڭگەيلى (بازالىق, ىلگەرى, كاسىبي) وقىتۋ نەگىزىندە جۇزەگە استى. وقىتۋ بارىسىندا توپ-مەنەدجەرلەر زاماناۋي مەكتەپتەگى ۇردىستەر, مۇعالىمنىڭ ۇزدىكسىز دامۋى مەن كاسىبي ءال-اۋقاتى, بالاعا قولايلى ورتا قۇرۋ, ستراتەگيالىق جوسپارلاۋ, تابىستى ديرەكتور رەتىندەگى بەدەل, كاسىبي ەكولوگيا, الەۋمەتتىك كاپيتال جانە الەۋمەتتىك ارىپتەستىك, جوبالىق مەنەدجمەنت, اناليتيكالىق قۇزىرەتتەر سىندى تاقىرىپتاردى تەرەڭىرەك زەرتتەدى.

ال ءۇشىنشى كەزەڭدە – ەلدىڭ جەتەكشى مەكتەپتەرىندە تاعىلىمدامادان ءوتۋ, ءتورتىنشى كەزەڭدە – قورىتىندى باعالاۋ, قورىتىندى كەزەڭدە مينيسترلىك جانىن­داعى كوميسسيامەن اڭگىمەلەسۋ بولدى. بارلىق بەس كەزەڭنىڭ قورىتىندىسى بو­يىنشا رەسپۋبليكالىق كادر رەزەرۆىنە 208 كانديدات قابىلداندى.

ىرىكتەۋدىڭ بارلىق كەزەڭىنەن وتكەن­­­دەرگە سەرتيفيكات تابىستالدى. سال­تاناتتى ءراسىم استانا قالاسىندا وقۋ-اعارتۋ ءمينيسترى عاني بەيسەمباەۆتىڭ قاتىسۋىمەن ءوتتى. مينيستر كادرلىق رەزەرۆكە وتكەن ۇمىتكەرلەرگە ارناعان سوزىندە وتاندىق ءبىلىم ساپاسىن ارتتىرۋ جانە پەداگوگ كادرلاردى كاسىبي دايارلاۋداعى نەگىزگى باعىتتاردى اتادى.

– وتكەن جىلدىڭ باسىندا وقۋ-اعارتۋ مينيسترلىگى ەلىمىزدەگى ءبىلىم ساپا­سىن ودان ءارى ارتتىرۋ ءۇشىن 5 نەگىزگى باعىتتى ايقىندادى. ولاردىڭ ىشىندە مەنەدجمەنتتى نىعايتۋ جانە كادرلىق رەزەرۆتى قالىپتاستىرۋ دا بار. مەملەكەت باسشىسىنىڭ تاپسىرماسى بويىنشا ءبىز «جاڭا وزگەرىستەردىڭ 1000 كوشباسشىسى» جوباسىن ىسكە قوستىق. بۇل – وتاندىق ءبىلىم جۇيەسىن دامىتۋدىڭ جاڭا كەزەڭى. سەگىز ايدىڭ ىشىندە سىزدەر ىرىكتەۋدەن ءوتىپ, جەكە, كاسىبي, باسقارۋشىلىق, اناليتيكالىق داعدىلار مەن قۇزى­رەتتەرىڭىزدى دامىتتىڭىزدار. ەندى ناعىز كوشباسشىلار رەتىندە ەلىمىزدەگى ءبىلىم بەرۋ جۇيەسىنىڭ ساپاسىن ارتتىرۋعا ۇلەس قوسۋلارىڭىز كەرەك. ەڭ باستىسى, بالالارىمىز بەن پەداگوگتەرىمىزگە جايلى جانە قاۋىپسىز ورتا قالىپتاستىرۋ, – دەدى ع.بەيسەمباەۆ.

اتالعان جوبانى شەتەلدىك ساراپ­­شىلار جوعارى باعالاپ, وڭ پىكىر ءبىل­دىرىپ وتىر. كەمبريدج ۋنيۆەرسيتەتى حومەرتون كوللەدجىنىڭ پروفەسسورى ەلەين ۋيلسوننىڭ ايتۋىنشا, بۇل – كادرلىق رەزەرۆتى دايىنداۋ بويىنشا جاسالعان بىرەگەي جوبا. «اتالعان ماڭىزدى باعىتقا مەملەكەت وقۋ-اعارتۋ مينيسترلىگى دەڭگەيىندە كوڭىل ءبولىپ جاتقانى قۋانتادى. بۇل وتاندىق ءبىلىم بەرۋدە جاۋاپكەرشىلىك الا الاتىن, بولاشاعى زور مامانداردىڭ بازاسىن قالىپتاستىرۋدىڭ ءتيىمدى جولى», دەدى ول.

پەداگوگيكالىق شەبەرلىك ورتالىعى ديرەكتورىنىڭ ورىنباسارى تولقىن قايىربەكقىزى وقىتۋ بارىسىندا قاتىسۋشىلاردىڭ پراكتيكالىق تۇرعىدان شىڭدالعانىن اتاپ ءوتتى. ء«بىز جاي تەوريامەن شەكتەلمەي, ساباق ۇمىتكەرلەردىڭ «ەگەر مەن وسى تەوريانى مەكتەپكە بارىپ ەنگىزەتىن بولسام, نە ىستەر ەدىم, نەنى جاقسارتۋىم كەرەك؟» دەگەن سياقتى رەفلەكسيالىق ويلاۋ داعدىلارىن دامىتۋعا باعىتتالدى», دەدى ول.

بارلىق كەزەڭنىڭ قورىتىندىسى بويىنشا كادر رەزەرۆىنە ەنگەن 208 كانديداتتىڭ اراسىندا استانا قالا­سىنداعى ا.سەيدىمبەك اتىنداعى №54 مەكتەپ-ليتسەي ديرەكتورىنىڭ وقۋ-تاربيە ءىسى جونىندەگى ورىنباسارى قايرات مۇقاشەۆ تا بار. «جوباعا قاتىسۋ باسقارۋ ءتاسىلىمدى تۇبەگەيلى وزگەرتتى. مەن بالالارىمىزعا قولايلى جاعداي جاساۋ جانە ۇجىممەن بىرگە قاي باعىتتا داميتىنىمىز تۋرالى ويلانا باستادىم. ەڭ باستىسى, بۇل جوبا ارىپتەستەرىمنىڭ بولاشاققا جانە ءوز كۇشتەرىنە دەگەن سەنىمىن ارتتىردى», دەيدى ۇمىتكەر.

كادرلىق رەزەرۆ باعدارلاماسىنىڭ قاتىسۋشىسى سايات ەسەمبەك تە جوبا جاڭا ىزدەنىسكە جول اشقانىن ايتتى. ء«بىز وقىتۋ كۋرسىندا «قازىرگى مەكتەپ قانداي بولۋى كەرەك؟» دەگەن سۇراققا جاۋاپ بەرە وتىرىپ, مەكتەپتى باسقارۋدىڭ قازىرگى زامانعا ساي فورمالارىن, تاسىلدەرىن, قۇرالدارىن قاراستىردىق. بۇل الداعى ۋاقىتتا تاجىريبەدە قولداناتىن پايدالى ءبىلىم بولدى», دەيدى ول.

تابىستالعان سەرتيفيكات نەگىزىندە ۇمىتكەرلەر كونكۋرستىق راسىمدەردەن وتپەي-اق ءبىرىنشى باسشىنىڭ بوس ورنىنا تاعايىندالاتىن بولادى. سونداي-اق ولارعا «جەتەكشى-كوشباسشى» بىلىكتىلىك ساناتى بەرىلەدى. جاڭا بۋىن مەنەدجەرلەرى جاڭا مەكتەپتەردى, ونىڭ ىشىندە «جايلى مەكتەپ» ۇلتتىق جوباسى اياسىندا سالىنىپ جاتقان ءبىلىم وشاقتارىن كادرلىق جاعىنان قامتاماسىز ەتۋگە جىبەرىلەدى. ايتا كەتەيىك, بۇل جوبا بيىل دا جالعاسادى. وعان تىلەك بىلدىرگەن بارلىق پەداگوگ قاتىسا الادى.