فوتو: primeminister.kz
توتەنشە جاعدايلار ءمينيسترى سىرىم ءشارىپحانوۆ 23 قاڭتار ساعات 00:09-دا الماتىدان 264 شاقىرىم جەردە قىرعىزستان مەن قىتاي شەكاراسىندا جەر سىلكىنىسى بولعانىن مالىمدەدى. ناتيجەسىندە الماتىدا 5 بالل, شىمكەنتتە 2 بالل, جامبىل وبلىسىندا 2-3 بالل جانە جەتىسۋ وبلىسىندا 4 بالل بولىپ سەزىلگەن بىرقاتار سەيسميكالىق فاكتى تىركەلدى. الدىن الا مالىمەتتەر بويىنشا عيماراتتار مەن قۇرىلىستار قيراعان جوق.
تجم-دە دەرەۋ رەسپۋبليكالىق جەدەل شتاب قۇرىلىپ, وسىنداي شتابتار اۋماقتىق دەڭگەيدە جۇمىس ىستەدى. تجم پسيحولوگتارىن تارتا وتىرىپ, «جەدەل جەلى» تەلەفوندارى ۇيىمداستىرىلدى.
وڭىرلەردى ازاماتتىق قورعاۋدىڭ مەملەكەتتىك جۇيەسىنىڭ كۇشتەرى مەن قۇرالدارى جوعارى دايىندىقتا جۇمىس ىستەدى, كوماندالىق-شتابتىق ماشينالار ورنالاستىرىلدى, قۇتقارۋ بولىمشەلەرىنىڭ توپتارى جانە حالىقتى حاباردار ەتۋ جۇيەسى – تولىق دايىندىقتا.
سەيسميكالىق بولجاۋ كوميسسياسى الماتى اۋماعىندا كۇشتى جانە جويقىن جەر سىلكىنىستەرى كۇتىلمەيتىنىن ايتتى. وسىعان بايلانىستى تجم وڭىرلەردىڭ تۇرعىندارىنان قورقىنىشقا بوي الدىرماي, تەك رەسمي اقپارات كوزدەرىنە سەنۋدى سۇرايدى.
پرەمەر-مينيستر تجم-نەن اكىمدىككە جانە باسقا دا مەملەكەتتىك ورگاندارعا دەيىنگى بارلىق قىزمەت بولعان جاعدايعا دەن قويعانىن اتاپ ءوتتى.
«قازا تاپقاندار جوق, اۋقىمدى زيان كەلمەدى. الايدا زارداپ شەككەندەر بار. ۋاقتىلى اقپارات الماعان ادامدار ناقتى ارەكەتسىز دۇربەلەڭگە جول بەردى. ولار 2, 3 قاباتتاردان سەكىرگەن كەزدە زارداپ شەكتى. بۇل ەسكەرتۋ جۇيەلەرىن ۋاقتىلى قوسىپ, حالىققا مۇمكىندىگىنشە ەرتەرەك اقپارات بەرىپ, حابارلامالار جىبەرۋ قاجەت ەكەنىن كورسەتتى», دەدى ءاليحان سمايىلوۆ.
پرەمەر-مينيستر بارلىق سەيسميكالىق قاۋىپتى وڭىردە جاتتىعۋلار ءجيى وتكىزىلۋى كەرەك ەكەنىن اتاپ ءوتتى.
«حالىق ءىس-قيمىل الگوريتمىن ءبىلۋى كەرەك», دەدى ۇكىمەت باسشىسى.
ۇكىمەت باسشىسى وڭىرلەردىڭ اكىمدىكتەرىنە مۇددەلى مەملەكەتتىك ورگاندارمەن بىرلەسىپ, وسىنداي تج-نى جويۋ جونىندەگى ءىس-قيمىل جوسپارلارىن تۇزەتۋدى تاپسىردى.
«جاقىن ارادا جەدەل دەن قويۋ ءۇشىن باسقارۋ ورگاندارى مەن ازاماتتىق قورعاۋ كۇشتەرى باسشىلارى مەن جاۋاپتى تۇلعالارىنىڭ باسقارۋ بەكەتتەرىندەگى كەزەكشىلىگى ەنگىزىلسىن. بۇل تىرشىلىكتى قامتاماسىز ەتەتىن بارلىق ۇيىمعا قاتىستى», دەدى ءاليحان سمايىلوۆ.
ول سونداي-اق زارداپ شەككەندەردى ەمدەۋ ءۇشىن بارلىق شارانى قابىلداۋ قاجەتتىگىن اتاپ ءوتتى.
«تجم قىزمەتتەرى جاعدايدى تۇراقتى باقىلاۋدا ۇستاۋى ءتيىس. بارلىق ءتيىستى قىزمەت اراسىندا, سونىڭ ىشىندە جەر سىلكىنىستەرى وشاقتارى ورنالاسقان كورشى مەملەكەتتەرمەن ناقتى ءوزارا ءىس-قيمىل جاساۋ كەرەك», دەپ تۇيىندەدى پرەمەر-مينيستر.
