ءماجىلىس سپيكەرى ەرلان قوشانوۆتىڭ توراعالىعىمەن وتكەن پالاتالاردىڭ بىرلەسكەن وتىرىسىندا ءماجىلىس پەن سەنات دەپۋتاتتارى مەملەكەت باسشىسىنىڭ قازاقستان قارۋلى كۇشتەرىنىڭ بىتىمگەرشىلىك كونتينگەنتىن بىرىككەن ۇلتتار ۇيىمى ميسسيالارىنا قاتىسۋ ءۇشىن جىبەرۋ تۋرالى ۇسىنىسىن قارادى. مەملەكەت باسشىسىنىڭ پارلامەنتكە ۇندەۋىن قورعانىس ءمينيسترى رۋسلان جاقسىلىقوۆ وقىپ بەردى.
«اسكەري قىزمەتشىلەردى بەيبىتشىلىك پەن قاۋىپسىزدىكتى قولداۋ جونىندەگى حالىقارالىق مىندەتتەمەلەردى ورىنداۋ ءۇشىن بۇۇ بىتىمگەرلىك ميسسياسىنا جىبەرۋ پارلامەنتتىڭ بۇرىن قابىلداعان بىرنەشە قاۋلىسىنا سايكەس جۇرگىزىلەدى. 2014 جىلدان باستاپ 57 قازاقستان وفيتسەرى بۇۇ-نىڭ باتىس ساحاراداعى, كوت-د’يۆۋارداعى, ماليدەگى, ورتالىق افريكا رەسپۋبليكاسىنداعى جانە ليۆانداعى ميسسيالارىنا اسكەري بايقاۋشى جانە شتابتىق وفيتسەر رەتىندە قاتىستى. 2017 جىلدان باستاپ 538 قازاقستان اسكەري قىزمەتشىسى بىتىمگەرشىلىك بولىمشە قۇرامىندا «بۇۇ-نىڭ ليۆانداعى ۋاقىتشا كۇشتەرى» ميسسياسىنا تەر توكتى. قازىرگى ۋاقىتتا قازاقستان اسكەريلەرى بۇۇ-نىڭ ميسسيالارىندا: باتىس ساحارادا 6 وفيتسەر, ورتالىق افريكا رەسپۋبليكاسىندا 2 وفيتسەر, كونگو دەموكراتيالىق رەسپۋبليكاسىندا 2 وفيتسەر, ليۆاندا 9 اسكەري قىزمەتشى قىزمەت ەتىپ جاتىر.
ۇيىم باسشىلىعى وفيتسەرلەردىڭ جاۋىنگەرلىك ماشىعىنا جوعارى باعا بەرىپ, ۇيىمنىڭ ميسسياسىندا قازاقستان بىتىمگەرشىلەرىنىڭ سانىن ۇلعايتۋدى قولداۋعا دايىن ەكەنىن ءبىلدىردى. ءبىزدىڭ كوپتەگەن وفيتسەر بىتىمگەرلىك قىزمەتكە ۇلەس قوسقانى ءۇشىن مەدالمەن ماراپاتتالىپ, العىسحات الدى. بىتىمگەرلىكتى قىزمەتتى قولداۋ, جانجالدى رەتتەۋ حالىقارالىق قوعامداستىق نازارىندا ەكەنىن اتاپ ءوتۋ ماڭىزدى. كونتينگەنتتى ميسسياعا جىبەرۋ حالىقارالىق قاۋىپسىزدىكتى نىعايتۋعا ايتارلىقتاي ۇلەس قوسىپ, قازاقستاننىڭ جاھاندىق ارەناداعى ءرولىن ارتتىرۋعا ىقپال ەتەدى», دەدى ر.جاقسىلىقوۆ.
سالا باسشىسىنىڭ سوزىنە سۇيەنسەك, بىتىمگەرلىك ميسسياسىنا اسكەري كونتينگەنت جەتكىزۋ بويىنشا باسەكەلەستىك بار. وسى ورايدا قورعانىس ءمينيسترى قارۋلى كۇشتەردى تاياۋ شىعىستاعى, وڭتۇستىك سۋدان رەسپۋبليكاسىنداعى جانە ابەيدەگى ميسسياعا جىبەرۋدىڭ ماڭىزىنا توقتالدى.
«گەوساياسي شيەلەنىس جاعدايىندا وڭىرلىك جانە ۇلتتىق قاۋىپسىزدىككە تونەتىن سىن-قاتەر پايدا بولادى. ونىڭ ءبىر بولىگى اسكەري ءادىس پەن دەن قويۋدى تالاپ ەتەدى. اسكەردىڭ دايارلىعىن ودان ءارى نىعايتۋ جانە قازىرگى زامانعى قاتەرگە قارسى ارەكەت ەتۋدە تاجىريبە الۋ ماسەلەسى وزەكتى. ميسسياعا قاتىسۋ اسكەردىڭ جاۋىنگەرلىك دايىندىعىن جەتىلدىرۋگە, بىتىمگەرشىلىك وپەراتسياعا ءتان داعدىدا قول جەتكىزۋگە مۇمكىندىك بەرەدى. قارۋلى كۇشتەر اسكەري بايقاۋشى, شتابتىق وفيتسەر رەتىندە اسكەري قىزمەتشىلەردى ميسسيادا سۇرانىسقا يە جاياۋ اسكەر, مەديتسينالىق, بارلاۋ, ينجەنەرلىك بولىمشەنى بولۋگە دايىن», دەدى ر.جاقسىلىقوۆ.
ءمينيستردىڭ ايتۋىنشا, گولان بيىكتىگىنە رەزەرۆتىك روتا رەتىندە 139 اسكەري قىزمەتشىدەن تۇراتىن ءبىرىنشى دەربەس كونتينگەنتتى تەحنيكاسىمەن, قارۋ-جاراعىمەن, مۇلكىمەن جىبەرىلمەك. العاشقى بىتىمگەرلەر ناۋرىزدا جولعا شىعادى. بۇۇ-مەن حالىقارالىق شارت اياسىندا تاراپتاردىڭ مىندەتتەمەسى, كونتينگەنتى تولىق قامتاماسىز ەتۋ ماسەلەسى ايقىندالادى. كونتينگەنت پەن مۇلىكتى تاسىمالداۋ قازاقستان تاراپى ەسەبىنەن جۇزەگە اسىرىلادى.
ۇسىنىسقا سايكەس رەزەرۆتەگى روتا, شتاب وفيتسەرلەرى, اسكەري باقىلاۋشىلار جانە مامانداندىرىلعان بولىمشەلەر سانى 430 ادامعا دەيىنگى بىتىمگەرشىلىك كونتينگەنتىن مىنا باعىتتار بويىنشا جىبەرۋ جوسپارلانعان: «گولان بيىكتەرىندەگى بۇۇ-نىڭ ءبولۋدى بايقاۋ كۇشتەرى» (UNDOF, سيريا-يزرايل), «بۇۇ بىتىمگە كەلۋ شارتتارىنىڭ ورىندالۋىن بايقاۋ جونىندەگى ورگانى» (UNTSO, پالەستينا-يزرايل), «بۇۇ-نىڭ وڭتۇستىك سۋدان رەسپۋبليكاسىنداعى ميسسياسى» (UNMISS, وڭتۇستىك سۋدان), «بۇۇ-نىڭ ابەيدەگى قاۋىپسىزدىكتى قامتاماسىز ەتۋ جونىندەگى ۋاقىتشا كۇشتەرى» (UNISFA, سۋدان).
بۇۇ-نىڭ ميسسيالارىنا قاتىسۋ قازاقستان قارۋلى كۇشتەرىنە اسكەرلەردىڭ جاۋىنگەرلىك ماشىقتارىن جەتىلدىرۋ ءۇشىن پايدالانىلاتىن بىتىمگەرشىلىك وپەراتسيالارعا ءتان قاجەتتى جاۋىنگەرلىك داعدىلارعا قول جەتكىزۋگە مۇمكىندىك بەرەدى.
ماجىلىستەگى حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ايگۇل قۇسپان قازاقستان ءوزىن بۇۇ-نىڭ جاھاندىق بەيبىتشىلىك پەن قاۋىپسىزدىكتى قامتاماسىز ەتۋ جونىندەگى ميسسيالارىنىڭ جاۋاپتى قاتىسۋشىسى رەتىندە تانىتا بىلگەنىن, از ۋاقىتتا حالىقارالىق بىتىمگەرشىلىك ۇدەرىستەرگە وزىق پوزيتسيالارعا يە بولعانىن اتاپ ءوتتى.
«بۇگىنگى ەل پرەزيدەنتىنىڭ ۇسىنىسى مەملەكەتتىڭ تاۋەلسىزدىك العان العاشقى كۇندەرىنەن باستاپ جۇرگىزىپ كەلە جاتقان بەيبىتشىلىك پەن حالىقارالىق قاۋىپسىزدىكتى نىعايتۋ جونىندەگى ەل ساياساتىنىڭ ءسوزسىز جالعاسى ەكەنى انىق», دەدى ا.قۇسپان.
تالقىلاۋ قورىتىندىسى بويىنشا پارلامەنت دەپۋتاتتارى مەملەكەت باسشىسىنىڭ بۇۇ ميسسيالارىنا قاتىسۋ ءۇشىن قازاقستان رەسپۋبليكاسى قارۋلى كۇشتەرىنىڭ بىتىمگەرشىلىك كونتينگەنتىن جىبەرۋ تۋرالى ۇسىنىسىن قولداۋ تۋرالى شەشىم قابىلدادى.
