17 قاڭتار كۇنى قازتالوۆ, جالپاقتال, جاڭاجول, بولاشاق, تالدىقۇدىق, قاراوزەن, قوشانكول اۋىلدارىنان 22 تۇرعىن ءۇي جاڭا يەسىن تاپتى. بۇل ۇيلەر اۋداندىق تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمى ارقىلى كەزەكتە تۇرعان تۇرعىندارعا بەرىلدى. 22 پاتەردىڭ 18-ءى – جەكەلەردەن ساتىپ الىنعان, ال 4-ەۋى جاڭادان سالىنعان.
بۇل قۋانىشتى جاعداي حالىقتىڭ الەۋمەتتىك وسال توپتارى ءۇشىن جالعا بەرىلەتىن تۇرعىن ۇيلەر ساتىپ الۋ ءۇشىن رەسپۋبليكالىق بيۋدجەتتەن بولىنگەن 192 ملن تەڭگە قاراجاتتىڭ ەسەبىنەن جۇزەگە استى.
– بۇگىن ءبىز ونەگەلى ءىستىڭ كۋاسى بولىپ وتىرمىز. ەل پرەزيدەنتى قاسىم-جومارت توقاەۆتىڭ تاپسىرماسىنا سايكەس وڭىرلەردى دامىتۋ, اۋىلدىق ەلدى مەكەندەردى گۇلدەندىرۋ ماقساتىندا بىرقاتار باعدارلاما جۇزەگە اسىپ جاتىر. سونىڭ ناتيجەسىندە بۇگىن تۇرعىن ءۇي كەزەگىندە 4 سانات بويىنشا تۇرعان 22 وتباسىنا جاڭا باسپانا بەرىپ وتىرمىز. بۇگىنگى پاتەر يەلەرىن قۋانىشىمەن قۇتتىقتايمىن! جاڭا باسپانا تاتۋلىق پەن بەرەكەنىڭ ورداسى بولىپ, قۋانىش پەن باقىت, قۇت پەن ىرىس سالتانات قۇرسىن! – دەدى اۋدان اكىمى اسلانبەك سارقۇلوۆ.
2020-2025 جىلدارعا «نۇرلى جەر» مەملەكەتتىك باعدارلاماسى شەڭبەرىندە كوممۋنالدىق تۇرعىن ءۇيىن سالۋ جانە رەكونسترۋكتسيالاۋ ماقساتتا قۋاتتى ايماقتار مەن دامىعان ينفراقۇرىلىم قالىپتاستىرۋ ءىسى اقجايىق اۋدانىندا دا جۇيەلى تۇردە جۇزەگە اسىپ كەلەدى. وسىنىڭ دالەلىندەي اۋدان ورتالىعىندا ءۇش قاباتتى 24 پاتەرلىك تۇرعىن ءۇي قۇرىلىسى اياقتالدى. بۇعان قوسا تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسىنا سايكەس رەسپۋبليكالىق بيۋدجەت ەسەبىنەن تۇرعىن ءۇي كەزەگىندە تۇرعان ازاماتتارعا كوممۋنالدىق تۇرعىن ءۇي قورىنىڭ ۇيلەرىن ساتىپ الۋ باعدارلاماسى اياسىندا اۋىلدىق وكرۋگتەر بويىنشا 12 تۇرعىن ءۇي پاتەرى پايدالانۋعا بەرىلدى.
باتىس قازاقستان وبلىسى
