الدەنەشە جىل بۇرىن جامبىل وبلىسىنداعى تەحنيكانىڭ 80 پايىزىنىڭ توزىعى جەتىپ تۇرعاندىعى تۋرالى مالىمەت تاراعان ەدى. كەيىنگى جىلدارى بۇل كورسەتكىش ەداۋىر جاقسارا تۇسكەنى سىڭايلى. وتكىر ماسەلە پرەزيدەنتتىڭ دە تىكەلەي نازارىندا ەكەنى انىق. ويتكەنى بۇل پروبلەمانى قاسىم-جومارت توقاەۆ بىرنەشە مارتە ەسكە سالدى, ەسكەرتتى دە.
پرەزيدەنت قازاقستان حالقىنا ارناعان «ادىلەتتى قازاقستاننىڭ ەكونوميكالىق باعدارى» اتتى جولداۋىندا اۋىل شارۋاشىلىعى سالاسىنداعى توزىعى جەتكەن تەحنيكالاردى جىل سايىن 8-10 پايىزعا جاڭارتىپ وتىرۋ قاجەتتىگىن ايتتى.
«اۋىل-ايماقتى دامىتۋ ءۇشىن شاعىن شارۋاشىلىقتاردى قولداۋ وتە ماڭىزدى. «اۋىل اماناتى» باعدارلاماسىنىڭ ەلگە قاجەت ەكەنى ايقىن كورىندى. ونىڭ كەلەسى كەزەڭىندە جەڭىلدەتىلگەن نەسيە بەرۋمەن شەكتەلىپ قالماۋ كەرەك. جەكە قوسالقى شارۋاشىلىق يەلەرى ءوزارا بىرىگۋى قاجەت. وسىعان قاجەتتى جاعداي جاسالۋعا ءتيىس», دەگەن مەملەكەت باسشىسىنىڭ ءسوزى جەرگىلىكتى اتقارۋشى بيلىك وكىلدەرىنە دە وي سالدى.
سوڭعى دەرەككە سەنسەك, وڭىردەگى اۋىل شارۋاشىلىعى تەحنيكا پاركى 13,1 پايىزعا جاڭارىپتى. ارينە, ءبىر قاراعاندا بۇل كورسەتكىش كادىمگىدەي كوڭىل توعايتادى. وبلىس اكىمدىگى اۋىل شارۋاشىلىعى باسقارماسىنىڭ ءباسپاسوز قىزمەتى كەلتىرگەن دەرەككە جۇگىنسەك, پرەزيدەنت تاپسىرماسىن ورىنداۋ بويىنشا ناقتى جۇمىستار قولعا الىنىپ جاتىر ەكەن. كوڭىلگە قوناتىن ناتيجە دە جوق ەمەس.
«وڭىردە 13,8 مىڭ دانا تەحنيكا تىركەلسە, ونىڭ 4 570 داناسى تراكتور, 985 داناسى كومباين جانە 8 281 داناسى باسقا تەحنيكالار. بۇل رەتتە تىركەلگەن بارلىق اۋىل شارۋاشىلىعى تەحنيكالارىنىڭ 9,5 مىڭنان استامىنىڭ پايدالانۋ مەرزىمى 10 جىلدان اسقان. ياعني 68,7 پايىزىنىڭ توزىعى جەتكەن.
ال 10 جىلعا دەيىنگى پايدالانۋداعى تەحنيكا ۇلەسى – 31,3,% نەمەسە 4,3 مىڭ دانا. ونىڭ ىشىندە 4,6 مىڭ تراكتوردىڭ 2,4 مىڭنان استامىنىڭ پايدالانۋ مەرزىمى 10 جىلدان اسقان. ياعني 52,6 پايىزىنىڭ توزىعى جەتىپ تۇر», دەيدى جاۋاپتى باسقارمانىڭ ءباسپاسوز قىزمەتى.
ناقتى دەرەككە جۇگىنسەك, بارلىق اۋىل شارۋاشىلىعى تەحنيكالارىنىڭ 68,7 پايىزىنىڭ توزىعى جەتكەن ەكەن. ياعني 9,5 مىڭنان استام تەحنيكانىڭ پايدالانۋ مەرزىمى ون جىلدان اسىپ كەتكەن. سونداي-اق وڭىردەگى تراكتوردىڭ 52,6 پايىزى ەسكىرگەن. بۇل تەحنيكالاردى جاڭالاۋعا ءالى دە بىرنەشە جىل ۋاقىت كەتەتىن سەكىلدى.
قالاي دەسەك تە ون جىلعا دەيىنگى پايدالانۋداعى تراكتوردىڭ ۇلەسى سوڭعى ۋاقىتتا ەداۋىر ارتقانى بايقالادى. سالىستىرمالى تۇردە ايتساق, بىرنەشە جىل بۇرىنعى كورسەتكىشتەن ەداۋىر جاقسارعان. بۇگىندە جىلى جاڭا تراكتوردىڭ سانى 47,4 پايىزعا جەتكەن. ارينە, ءالى دە بولسا جالپى كورسەتكىشتىڭ جارتىسىنا جەتكەن جوق. ايتكەنمەن وسى جىلى تاعى دا تەحنيكا پاركى جاڭالاناتىنىن ەسكەرسەك, ەسكى تەحنيكانىڭ سانى تام-تۇمداپ بولسا دا ازاياتىن سەكىلدى.
«مەملەكەت باسشىسى قاسىم-جومارت توقاەۆتىڭ اۋىل شارۋاشىلىعى تەحنيكاسىن جاڭارتۋ بويىنشا تاپسىرماسىنا سايكەس وبلىستا جۇيەلى جۇمىستار جۇرگىزىلىپ جاتىر.
وتكەن جىلى وبلىس بويىنشا 1 642 تەحنيكا (8 بىرلىك كومباين, 380 بىرلىك تراكتور, 1 254 بىرلىك باسقا دا تەحنيكالار) ساتىپ الىنىپ, تەحنيكا پاركىنىڭ جاڭارتىلۋ دەڭگەيى 13,1 پايىزدى قۇرادى. ال وسى جىلى تەحنيكا پاركىنىڭ جاڭارۋ كورسەتكىشىن 13,5 پايىزعا جەتكىزۋدى جوسپارلاپ وتىرمىز.
جالپى, وتكەن جىلى وڭىرىمىزدە «اۋىل اماناتى» باعدارلاماسى اياسىندا 18,4 ملرد تەڭگەگە 3 مىڭنان استام جوبا قارجىلاندىرىلدى. بۇل, ارينە – ۇلكەن قولداۋ. ناتيجەسىندە, قۇرىلعان اۋىل شارۋاشىلىعى كووپەراتيۆتەرىنە 352 بىرلىك تەحنيكا ساتىپ الىندى. ونىڭ ىشىندە جامبىلدىق ديقاندار جالپى قۇنى 803 ميلليون تەڭگەنى قۇرايتىن «لوۆول», «زۋمليون», «يۋتو» جانە «متز» ماركالى 55 تراكتورعا قول جەتكىزدى», دەيدى وبلىس اكىمدىگى اۋىل شارۋاشىلىعى باسقارماسىنىڭ باسشىسى نۇربي جىگىتەكوۆ.
قالاي الىپ قاراساق تا, پرەزيدەنت پارمەنىنەن كەيىن تەحنيكا پاركىن جاڭالاۋ جۇمىسىنىڭ بويىنا قان جۇگىرگەن سەكىلدى. ارينە, توزعان تەحنيكانىڭ سانى ءالى دە از ەمەس. ولاردى جاڭارتۋ جۇمىستارى تولاسسىز جالعاسا بەرمەك.
جامبىل وبلىسى
