فوتو: senate.parlam.kz
سەناتور 3 مىڭ جىلدىق تاريحى بار ناۋرىز مەيرامىن بۇۇ باس اسسامبلەياسى مويىنداعانىن جانە ادامزاتتىڭ ماتەريالدىق ەمەس مادەني مۇراسى تىزىمىنە ەنگىزگەنىن ەسكە سالدى. قازاقستان ءۇشىن بۇل مەرەكە ەرەكشە ماڭىزعا يە ەكەنىن دە جەتكىزدى.
«حالقىمىزدا ناۋرىز – ۇلىستىڭ ۇلى كۇنى, جىل باسى, كۇن مەن ءتۇننىڭ تەڭەلگەن كۇنى دەپ ايتىلادى. ءدال وسى كۇندەرى بىتەلگەن بۇلاقتاردىڭ كوزىن اشىپ, جەرگە تال وتىرعىزىپ, اركىم ءوز اۋلاسى مەن ءۇي-جايىن تازالاعان. ەگىسكە شىعىپ ەگىن ەگىپ, مالمەن اينالىساتىندار ءتول الۋعا كىرىسىپ جىل باسى قايناعان ەڭبەككە ۇلاسقان. ياعني ناۋرىز حالقىمىزدىڭ ناعىز رۋحاني جانە ەڭبەك مەرەكەسى. سوندىقتان ناۋرىز – ءبىزدىڭ ۇلتتىق يدەولوگيامىزدىڭ نەگىزى بولۋى كەرەك. پرەزيدەنتىمىز ايتقانداي, ناۋرىز – جاڭارۋ مەن جاڭعىرۋدىڭ سيمۆولىنا اينالۋى», دەدى ءا.بەكتاەۆ.
ناۋرىز مەيرامى ىنتىماقتىڭ, جاڭارۋ مەن جاڭعىرۋدىڭ سيمۆولىنا اينالۋى ءۇشىن سەناتور وسى مەرەكەنى دارىپتەۋگە جانە ونى تويلاۋ ءداستۇرىن ىلگەرىلەتۋگە ىقپال ەتەتىن جالپى ۇلتتىق تۇجىرىمداما قابىلداۋدى ۇسىندى.
دەپۋتات ناۋرىز قارساڭىندا كوپبالالى جانە از قامتىلعان وتباسىلارعا, مۇمكىندىگى شەكتەۋلى ازاماتتارعا قولداۋ جانە كومەك كورسەتۋ بويىنشا بۇكىل حالىقتىق ءىس-شارالاردى باستاۋدى ۇسىندى. ەڭبەك ادامدارىن ماراپاتتاۋ جانە ولاردىڭ جەتىستىكتەرىن ناسيحاتتاۋ دا ماڭىزدى. سەناتوردىڭ ۇسىنىستارىنىڭ ىشىندە بۇل كۇندەرى سوعىستان زارداپ شەككەن ەلدەرگە گۋمانيتارلىق كومەك كورسەتۋ دە ەرەكشە اتاپ وتىلگەن.
