فوتو: olympic.uz
كورشى ەلدىڭ بوكس قۇراماسىن 1,5 جىلدان بەرى باپتاپ كەلە جاتقان تولقىن قىلىشەۆ «Egemen Qazaqstan» گازەتىنە بەرگەن سۇحباتىندا وزبەك بوكسىنىڭ كەلەشەگى تۋرالى ءسوز قوزعايدى. ءار سالماقتاعى فينالدىق جەكپە-جەكتەرگە جەكە توقتالعان باپكەردىڭ 86 كيلو تارتاتىن بوكسشىلار تۋرالى ايتقانى قىزىق. وسى سالماقتىڭ فينالدىق ايقاسى تۋرالى باس باپكەر سۇحباتىندا بىلاي دەيدى.
«86 كيلودا ونەر كورسەتكەن شوحجاحون ابدۋللاەۆ پەن ساماندار جالولوۆ اراسىنداعى جەكپە-جەك ءبىرىنشى راۋندتان كەيىن اياقتالدى. شوحجاحون – جاستار اراسىندا الەم چەمپيونى, ازيا چەمپيونى. بىراق بۇل جولى سامانداردىڭ ساعىن سىندىرماس ءۇشىن جەڭىستى وعان «سىيلادىق». وعان سەبەپ تە كوپ. بىرىنشىدەن, ساماندور – باحودير جالولوۆتىڭ تۋعان ءىنىسى. جاس بالا. قازىردىڭ وزىندە بويى – 193 سم. ول بولاشاقتا 92 كيلوعا اۋىسادى. ەكىنشىدەن, ەكەۋىن دە ءبىر باپكەر جاتتىقتىرادى. ايتپەسە, شوحجاحوننىڭ ساماندورعا شاماسى جەتىپ تۇر».
قازاق مۇندايدا «ماتا داڭقىمەن ءبوز وتەدى» دەگەن. اعاسى الەم, وليمپيادا چەمپيونى ەكەن دەپ كوپە-كورنەۋ جىعىپ بەرىپ, «جەڭىستى سىيلاپ جىبەرۋ» سپورتشىنىڭ بويىنا ساۋداگەرلىكتى ءسىڭىرۋى دە عاجاپ ەمەس.
«Egemen Qazaqstan» گازەتىندە جارىق كورگەن جۋرناليست الماس ماناپتىڭ وزبەكستان ۇلتتىق قۇراماسىنىڭ باس باپكەرىنەن العان سۇحباتىن تومەندەگى سىلتەمەدەن وقيسىز. «تولقىن قىلىشەۆ, بوكستان وزبەكستان قۇراماسىنىڭ باس باپكەرى: بىزگە قازاق بوكسىنىڭ مىقتى بولعانى كەرەك»
