سۋرەتتى تۇسىرگەن – دميتري ەروفەەۆ
«قامقور» تالدىقورعان ارناۋلى الەۋمەتتىك قىزمەت كورسەتۋ ورتالىعىندا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆ جانە مەكەمەدە تاربيەلەنىپ جاتقان ەرەكشە بالالاردىڭ بىرنەشە اتا-اناسى ارنايى ورتالىققا جينالدى. ءبىز دە سولارمەن بىرگە عيماراتتى ارالاپ كوردىك. سونداعى بالالاردىڭ جۇمىسىمەن تانىسىپ, ديدارلاستىق.
«بۇل جەردە 3 جاستان 18 جاسقا دەيىنگى ەرەكشە بالالاردى قامقورلىعىنا الىپ كەلسە, جاقىندا اتا-انالاردىڭ وتىنىشىمەن 18 جاستان 30 جاسقا دەيىن ۇلعايتۋ ءىسىن ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسە وتىرىپ قاراستىرىپ, جۇزەگە اسىردىق. ال وبلىسىمىزدا 21 350 مۇگەدەكتىگى بار ازامات تىركەلگەن», دەيدى ە.ميزامباەۆ.
ەكى قاباتتان تۇراتىن «قامقور» ارناۋلى ورتالىعىندا بيىلدان باستاپ 18 جاستان اسقان ازاماتتار ءۇشىن ستاتسيونار جاعدايىندا 50 ورىندى بولىمشە جۇمىسىن باستادى.
«قىزىم نازەركە تۋعاننان دەرتتى بولىپ, وسى ورتالىققا بەرگەنبىز. ەكى اي بۇرىن 18 جاسقا تولعان قىزىم بۇل مەكەمەدە 8 جىل ۋاقىتىن وتكىزدى. اراسىندا ۇيگە الىپ كەتەمىز, بىراق ءوز ورتاسىن, وسى ءبىر مەكەمەنى ساعىنىپ تۇرادى. باستاپقىدا 18 جاسقا دەيىن بولاتىن, وبلىس باسشىسىنا ءوتىنىش جازىپ, 18 جاستان اسقانداردى دا قابىلدايتىنداي مۇمكىندىك الدىق. بۇل تۇرعىدا ءوتىنىشىمىزدى ءبىر ساعاتقا جەتكىزبەي شەشىپ بەرگەن وبلىس اكىمى بەيبىت يساباەۆقا ەرەكشە العىس بىلدىرەمىن», دەيدى دينارا قۋاتبەكقىزى.
بۇگىندە «قامقور» ورتالىعىندا 104 ازامات كومەك الىپ جاتىر. بۇل ءۇشىن ورتالىقتا بارلىق جاعداي قاراستىرىلعان. مەكەمە اۋماعىندا ويىن الاڭى, سپورتتىق الاڭدار مەن جىلىجاي بار. الداعى ۋاقىتتا مونشا سالۋ جوسپارلانعان. ال قىزمەت الۋشىلاردى ەمىن-ەركىن تاسىمالداۋ ءۇشىن كولىك الۋعا قاراجات بولىنگەن. الدا ول يگىلىككە دە قول جەتەدى.
جەتىسۋ وبلىسى
