اۋىرىپ ەم ىزدەگەندە بىردەن انتيبيوتيكتەردىڭ كومەگىنە جۇگىنۋ ادەتكە اينالعان. اسىرەسە, كىشكەنتاي بالالارعا دارىگەردىڭ تاعايىنداۋىنسىز-اق بەرەتىن بولعانبىز. بىراق ونى ءجيى ءارى شەكتەن تىس پايدالانۋ دەنساۋلىققا وتە قاۋىپتى. ءتىپتى ولىمگە دەيىن اپاراتىن جاعدايلار بار. الەمدىك اۋرۋلاردى باقىلاۋ جانە الدىن الۋ ورتالىعىنىڭ مالىمەتىنشە, انتيبيوتيكتەردى قولدانۋ جاعدايلارىنىڭ ۇشتەن ءبىر بولىگى قاجەتسىز ءارى ورىنسىز بولىپ شىعادى.
دارىگەرلەر انتيبيوتيكتەردىڭ باكتەريالار تۋدىراتىن ينفەكتسيالاردى ەمدەگەنىمەن, ۆيرۋستاردان تۋىنداعان ينفەكتسيالاردى ەمدەمەيتىنىن ايتادى. مىسالى, سۋىق ءتيىپ, تۇماۋراتىپ قالعاندا, جوتەلگەندە, اسقازان اۋىرعاندا, كوروناۆيرۋس كەزىندە انتيبيوتيك ءىشۋدىڭ ەش قاجەتى جوق. ەمدەلۋشىلەر وسىنى ەسكەرمەگەندىكتەن, اۋرۋدىڭ ۇستىنە اۋرۋ جاماپ الادى ەكەن.
ال وتاندىق عالىم ازىرلەگەن ساۋمال نەگىزىندە جاسالعان مەتابيوتيك وسىنداي اۋىر ءدارى-دارمەكتەر مەن انتيبيوتيكتەردىڭ اسەرىنەن زاقىمدانعان ىشەك ميكروفلورالارىن قالپىنا كەلتىرەدى.
– كەيدە ادام قاتتى قوبالجىسا دا اسقازانى اۋرىپ قالادى, كەيدە سىرتتان تاماقتانىپ, اس قورىتا الماي قينالىپ جاتادى. مىنە, وسى كەزدە ساۋمالدان جاسالعان مەتابيوتيكتى ىشسە, دەرەۋ ىشەك ميكروفلوراسى تۇزەلەدى. بۇل دارۋمەن اس قورىتۋدى رەتتەپ, مەتابوليزمدى جاقسارتىپ, ارتىق سالماقتان ارىلتۋعا, ءارى دەنساۋلىقتى جاقسارتۋعا دا سەبەپشى, – دەيدى س.قوجاحمەتوۆ.
قازاق ساۋمالدى سۋسىن رەتىندە عانا ەمەس, ەمدىك ماقساتتا دا قولدانعانى ەجەلدەن بەلگىلى. ويتكەنى بيە ءسۇتى دارۋمەندەرگە, ميكروەلەمەنتتەرگە, بيولوگيالىق بەلسەندى زاتتارعا اسا باي. وتاندىق عالىم دا وسىنى ەسكەرگەن. سونىڭ ناتيجەسىندە ءداستۇرلى مەديتسينادا كەڭىنەن قولدانىلىپ جۇرگەن ساۋمال ەندى عىلىمي اينالىمعا ەنىپ, دارۋمەن رەتىندە ازىرلەنىپ وتىر.
– بيە ءسۇتىن زەرتتەي كەلە ونىڭ ىشەك ميكروفلوراسىنا جاعىمدى اسەر ەتەتىنىن بىلدىك. تەز ءسىڭىپ, اسقازان جۇمىسىن جاقسارتادى. بابالارىمىزدىڭ ساۋمالدى دەنساۋلىققا پايدالى دەپ بەكەر ايتپاعانىنا كوزىمىز جەتىپ جاتىر. سوندىقتان دارۋمەننىڭ ەمدىك قاسيەتىن ارتتىرا ءتۇسۋ ءۇشىن مەتابيوتيكتى ساۋمال نەگىزىندە جاساپ شىقتىق. وندا انتيبيوتيكتەردەگى سياقتى ءتىرى باكتەريالار جوق, مەتابوليتتەر بار. ادام ءتىرى باكتەريالى دارۋمەن ىشسە, اعزا قابىلداماي اۋرۋ اسقىنۋى مۇمكىن. ال مۇندا جاعىمدى مەتابيوتيك قانا بار. ول ىشەك ميكروفلوراسىن تۇزەپ, قالپىنا كەلتىرەدى, – دەيدى عالىم.
س.قوجاحمەتوۆتىڭ ايتۋىنشا, كلينيكالىق زەرتتەۋلەر الدىمەن جانۋارلارعا جاسالعان. وڭ ناتيجە بەرگەن سوڭ وتاندىق ءونىم وندىرىلگەن بەتتە دارىحانالارعا جەتكىزىلىپ, ساتىلىمعا شىعىپ تا ۇلگەرگەن. بۇل اسقورىتۋعا كومەكتەسەتىن دارۋمەن بولعاندىقتان, ءدارى رەتىندە ەشقانداي قارسى كورسەتىلىمدەرى مەن زيانى جوق.
