«قازاقستاننىڭ ازاماتتىق اليانسى» زتب ۇيىمداستىرعان دوڭگەلەك ۇستەلگە ساراپشىلار, ونىڭ ىشىندە ۇلتتىق قۇرىلتاي جانە قوعامدىق كەڭەس مۇشەلەرى, وڭىرلىك ازاماتتىق اليانستاردىڭ كوشباسشىلارى, ۇەۇ, ەتنومادەني بىرلەستىكتەردىڭ وكىلدەرى, دەپۋتاتتار مەن عالىمدار, ساياساتتانۋشىلار, قوعام قايراتكەرلەرى قاتىسىپ, سۇحباتتا ايتىلعان وزەكتى ماسەلەلەردى تالقىلادى.
«قازاقستان ازاماتتىق اليانسى» زتب پرەزيدەنتى بانۋ نۇرعازيەۆا كىرىسپە سوزىندە: «مەملەكەت باسشىسى سۇحباتىندا جىلدار بويى جيناقتالعان قوعامنىڭ وزەكتى ساۋالىنا جاۋاپ بەرگەن. ماقالا ءوتىپ بارا جاتقان جىلدىڭ جەتىستىكتەرى مەن الداعى جىلدارى اتقارىلۋعا ءتيىس اۋقىمدى ىستەردىڭ دە ءمانى مەن ماڭىزىن اشىپ كورسەتۋىمەن قۇندى», دەدى.
تالقىلاۋ اياسىندا دوڭگەلەك ۇستەلگە قاتىسۋشىلار مەملەكەت باسشىسى سۇحباتىنىڭ نەگىزگى تۇستارىن تالداپ, قوزعالعان ماڭىزدى تاقىرىپتار بويىنشا پىكىرلەرى مەن ويلارىن ءبىلدىردى. ءىس-شارادا ەكونوميكا, ساياسات, قوعامدىق دامۋ, ۇلتتىق مادەنيەت جانە باسقا دا ماڭىزدى ماسەلەلەر كەڭىنەن ءسوز بولدى.
استانا قالاسى قوعامدىق كەڭەسىنىڭ توراعاسى, ساياساتتانۋ عىلىمدارىنىڭ دوكتورى, ۇلتتىق قۇرىلتاي مۇشەسى زۇلفۇحار عايپوۆ سۇحباتتا ايتىلعان ءاربىر ماسەلەنىڭ ارتىندا ادىلەتتى قوعامدى قالىپتاستىرۋ يدەياسى جاتقانىن ايتتى. ادىلەتتى قوعامدى ورناتۋ ىسىنە قوعام بولىپ جۇمىلعاندا عانا جەتە الاتىنىمىزدى العا تارتا كەلىپ: «بۇل ءۇشىن پرەزيدەنت ايتىپ جۇرگەن ادال ازامات, ادال ەڭبەك پەن ادىلەتتى قوعام دەگەن ۇشتىكتىڭ ءۇنى ءبىر جەردەن شىعۋعا ءتيىس. ءار ادام ءوز كاسىبىنە ادال بولىپ, وبال-ساۋاپتىڭ ماڭىزىن ءتۇسىنىپ, ۇلتتىق قۇندىلىقتى ءسىڭىرىپ وسسە, ءوز ەلىنىڭ ەرتەڭى ءۇشىن قىزمەت ىستەيتىن ازامات بولىپ شىعارى انىق. مىسالى, بيىل جاڭا جىلداعى پرەزيدەنتتىڭ قۇتتىقتاۋىنان كەيىن ءانۇراننىڭ شارىقتاتا ورىندالۋى مەن سۇحباتتاعى ناۋرىز مەيرامىنىڭ قادىر-قاسيەتى تۋرالى ءسوزى كوپ وقىرمانعا وي سالىپ, ءوز قۇندىلىعىمىزعا ءبىر تابان جاقىنداي تۇسۋىنە جول اشتى», دەدى.
«استانا قالاسىنىڭ وزبەك ەتنومادەني ورتالىعى» قب باسشىسى, ۇلتتىق قۇرىلتاي مۇشەسى شەرزود پۋلاتوۆ ۇلتتىق مۇددەلەر جولىندا جۇدىرىقتاي جۇمىلىپ, تىرلىك ەتۋگە شاقىردى. سونداي-اق قازاقتىڭ ۇلى تۇلعالارىنىڭ ءومىر جولىن ناسيحاتتاۋ ارقىلى وسكەلەڭ ۇرپاقتى وتانشىلدىق رۋحتا تاربيەلەۋدىڭ ماڭىزدىلىعىنا توقتالدى.
قاتىسۋشىلار مەملەكەت باسشىسىنىڭ مازمۇندى سۇحباتىن پروگرەسسيۆتى ۇلتتى دامىتۋ مەن نىعايتۋداعى ماڭىزدى قادام دەپ باعالادى جانە سۇحباتتاردا ايتىلعان يدەيالار مەن دامۋ جولدارىنا قولداۋ مەن كەلىسىم تانىتتى. وزەكتى ماسەلەلەردى تالقىلاۋدىڭ ماڭىزدىلىعىنا نازار اۋدارعان جيىنعا كەلگەندەر بەلگىلەنگەن جوسپارلارعا قول جەتكىزۋ جانە قويىلعان مىندەتتەرگە سايكەس ەلدى دامىتۋ ءۇشىن بىرلەسكەن كۇش-جىگەر قاجەت ەكەنىن باسا ايتتى.
