قوعامدىق پىكىردى بارىنشا قامتۋ جانە شەشىمدەر قابىلداۋدىڭ اشىقتىعىن قامتاماسىز ەتۋ ماقساتىندا كولىك مينيسترلىگىنىڭ اۆتوموبيل كولىگى جانە كولىكتىك باقىلاۋ كوميتەتى وتاندىق كولىك-لوگيستيكالىق بيزنەس جانە جۇكتەردى حالىقارالىق اۆتوموبيلمەن تاسىمالداۋ ماسەلەلەرى بويىنشا لوگيستيكا وكىلدەرىمەن ارنايى كەڭەيتىلگەن كەڭەس ۇيىمداستىردى. وندا سالاعا قاتىستى بىرقاتار ماسەلەلەر تالقىلاندى.
اتاپ ايتقاندا, ءىس-شارا الماتىداعى لوگيستيكا جانە كولىك اكادەمياسىنىڭ عيماراتىندا ءوتتى. كولىك ءمينيسترىنىڭ جەلتوقسان ايىندا مەگاپوليس تۇرعىندارىمەن كەزدەسۋىندە بەرگەن ۋادەسىنە سايكەس قازاقستاننىڭ بارلىق وڭىرىنەن تاسىمالداۋشىلار ادەيىلەپ شاقىرىلعان. باسقوسۋ بارىسىندا كاسىپكەرلەرگە, ساراپشىلارعا جانە سالالىق قاۋىمداستىقتاردىڭ (Kazlogistics, KazATO) جانە «اتامەكەن» اەس وكىلدەرىنە قازاقستاندىق تاسىمالداۋشىلار اراسىندا شەتەلدىك رۇقسات بلانكىلەرىن تاراتۋدىڭ جاڭا ءتارتىبى مۇقيات تانىستىرىلدى.
تاقىرىپتى تالقىلاۋ اياسىندا قاتتك توراعاسى التاي ءالى نارىق قاتىسۋشىلارىن كولىك ءمينيسترىنىڭ «قازاقستان رەسپۋبليكاسى ينۆەستيتسيالار جانە دامۋ ءمينيسترى مىندەتىن اتقارۋشىسىنىڭ شەتەلدىك رۇقسات بلانكىلەرىن بەرۋدىڭ جاڭا تەتىگىن قامتيتىن «قازاقستان رەسپۋبليكاسىندا حالىقارالىق قاتىناستا اۆتوموبيل كولىگىمەن تاسىمالداۋعا رۇقسات بەرۋ جۇيەسىن قولدانۋ قاعيدالارىن بەكىتۋ تۋرالى» جوباسىن قاراستىرۋدى ۇسىندى.
دايىندالعان قۇجاتتا مەملەكەتتىك ورگان رۇقسات بلانكىلەرىن تاراتۋ جۇيەسىندەگى ەركىن باسەكەنى قامتاماسىز ەتەدى. سونداي-اق قازاقستاندا شاعىن جانە ورتا بيزنەستى دامىتۋدى شەكتەيتىن, ياعني, كولەڭكەلى نارىقتا بلانكىلەردىڭ جاساندى تاپشىلىعىن تۋعىزاتىن ماسەلەلەردى تولىق جويادى جانە ولاردى قايتا ساتۋعا مۇمكىندىك بەرمەيدى.
شارتتىڭ ءار تارماعىنا نازار سالساق, كولىك قۇرالدارىنىڭ تاسىمالداۋ تاريحى مەن قىزمەتىنە شەكتەۋلەردى الىپ تاستاۋدى, بەلگىلى ءبىر تاپسىرىس بولعان جاعدايدا كەز كەلگەن وتاندىق تاسىمالداۋشىعا بلانكىلەردى بەرۋدى, بلانكىلەردى كولەڭكەلى نارىقتا قايتا ساتۋدىڭ بارلىق العىشارتتارىن جويۋدى, بلانكىلەردى بەرۋ تۋرالى شەشىمدەر قابىلداۋ ۇدەرىستەرىنەن كولىكتىك باقىلاۋ ينسپەكتسيالارىن الىپ تاستاۋدى, سونداي-اق بلانكىلەردى پايدالانۋدى قاشىقتىقتان باقىلاۋدى ەنگىزۋ كوزدەلگەن.
كەلەلى كەڭەستە, سونىمەن قاتار نارىق قاتىسۋشىلارىمەن حالىقارالىق جۇك تاسىمالداۋدىڭ باسقا دا وزەكتى ماسەلەلەرى دە اشىق تالقىلاندى.
