كوللاجدى جاساعان – قونىسباي شەجىمباي, «EQ»
پرەزيدەنت تاپسىرماسىنا سايكەس تۇرمىستىق زورلىق-زومبىلىق جاساۋ فاكتىسى ءۇشىن جاۋاپكەرشىلىك كۇشەيتىلىپ, قىلمىستىق جانە اكىمشىلىك كودەكستەرگە تۇزەتۋلەر ەنگىزىلدى. اكىمشىلىك پوليتسيا كوميتەتى توراعاسىنىڭ ورىنباسارى رەنات زۇلقايىروۆتىڭ ايتۋىنشا, بىلتىر 1 شىلدەدەن باستاپ پوليتسيا تۇرمىستىق قۇقىق بۇزۋشىلىقتاردى تىركەۋدى ءوتىنىش بەرۋ سيپاتىنان انىقتاۋ سيپاتىنا كوشىردى. ءاربىر فاكتى بويىنشا اكىمشىلىك ءىس قوزعالادى. ال سوڭعى قۇقىقتىق باعالاۋدى سوت بەرەدى. بۇل رەتتە قۇقىق بۇزۋشىنىڭ سوتتا ءبىر رەت قانا تاتۋلاسۋعا قۇقىعى بار.
جاڭا زاڭناما اياسىندا بىلتىر ەكىنشى جارتىجىلدىقتا عانا تۇرمىستىق جانجالدار تۋرالى 50 مىڭ ءوتىنىش قارالسا, 64 پايىز ماتەريال بويىنشا اكىمشىلىك ءىس جۇرگىزۋ قوزعالدى. اكىمشىلىك قاماۋعا الىنعان ادامداردىڭ سانى 2 ەسەگە ارتقان. سوتتا 27 مىڭنان استام وتباسى تاتۋلاسىپتى. سونىمەن قاتار مينيسترلىك زورلىق-زومبىلىققا ۇشىراعان وتباسىلارمەن پروفيلاكتيكالىق جۇمىستى جانداندىرۋعا دەن قويىپ وتىر. جابىرلەنۋشىلەردىڭ قاۋىپسىزدىگىن قامتاماسىز ەتۋ ماقساتىندا بىلتىر 87 مىڭ قورعاۋ نۇسقاماسى شىعارىلىپ, قۇقىق بۇزۋشىنىڭ مىنەز-قۇلقىنا 15 مىڭ ەرەكشە تالاپتار بەلگىلەندى. بۇگىنگى كۇنى ولارعا پوليتسيانىڭ كۇشەيتىلگەن باقىلاۋى جۇزەگە اسىرىلادى. ال شەكتەۋلەردى بۇزعان 12 مىڭ فاكتىنىڭ جولى كەسىلگەن.
«قوعامدا قۇقىق بۇزۋشىلىقتارعا توزبەۋشىلىك قاعيداتى قالىپتاسىپ كەلەدى. وسى سالاداعى قۇقىق بۇزۋشىلىقتار تۋرالى حابارلامالاردى تىركەۋ 14 پايىزعا, ونىڭ ىشىندە تۇرمىستىق قىلمىستاردىڭ تومەندەۋ ءۇردىسى بايقالادى. كەيبىر پوليتسيانىڭ رەپرەسسيۆتىك شارالارى تۇرمىستىق زورلىق-زومبىلىق ماسەلەسىن شەشە المايدى. وسىعان بايلانىستى ۇكىمەت تۇرمىستىق زورلىق-زومبىلىقتىڭ الدىن الۋ بويىنشا, ياعني وسى سالاداعى ساياساتتى قايتا قاراۋ جونىندەگى جول كارتاسىن ىسكە اسىرىپ جاتىر», دەيدى ر.زۇلقايىروۆ.
وڭىرلەردە ومىرلىك قيىن جاعدايعا تاپ بولعان وتباسىلاردى انىقتاۋ بويىنشا ءموبيلدى توپتار قۇرىلعان. ۋچاسكەلىك ينسپەكتورلار 150 مىڭ وتباسىن ارالاپ, مەملەكەتتىڭ كومەگىنە مۇقتاج 500-دەن استام وتباسى انىقتالعان. اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقمارال سەرىكباەۆانىڭ سوزىنشە, قازىر تاۋلىك بويى «111» جانە «150» جەدەل جەلىسىنىڭ تەلەفوندارى جۇمىس ىستەپ تۇر. ءاربىر قوڭىراۋ سوققان جابىرلەنۋشى دەر كەزىندە ءتيىستى كەڭەس نەمەسە قولداۋ الا الادى. سونداي-اق بىلتىر ايەلدەر مەن بالالاردىڭ قۇقىقتارىن قورعاۋ, وتباسىلىق قۇندىلىقتاردى ىلگەرىلەتۋ جونىندەگى شارالاردى كۇشەيتۋ جونىندە زاڭنامالىق تۇزەتۋلەر ازىرلەنگەن. بۇل بويىنشا دەنساۋلىققا قاساقانا جەڭىل زيان كەلتىرۋدى جانە ۇرىپ-سوعۋدى قىلمىستىق جاۋاپكەرشىلىككە تارتۋ جوسپارلانىپ وتىر. «ەندىگى جەردە قۇقىق بۇزۋشىنىڭ مىنەز-قۇلقىنا بايلانىستى تالاپ سوتقا جىبەرىلىپ, اگرەسسوردى تۇرعىن ۇيدەن ۋاقىتشا شىعارۋ ماسەلەسى قارالادى. سونىمەن قاتار وعان الەۋمەتتىك بەيىمدەلۋ ورتالىقتارىندا ءوز ءىس-ارەكەتتەرىن ۋاقىتشا قاراستىرۋ ۇسىنىلادى. سونداي-اق سوت اگرەسسوردىڭ دەنساۋلىق ساقتاۋ ۇيىمدارىندا مىندەتتى پسيحوكوررەكتسيالىق كۋرستاردان ءوتۋىن تاعايىنداۋعا قۇقىعى بار. ءدال وسىنداي ەرەكشە تالاپتار قىلمىستىق كودەكس شەڭبەرىندە دە بەلگىلەنەدى», دەيدى ا.سەرىكباەۆا.
اينالادا بولىپ جاتقان زاڭ بۇزۋشىلىقتارعا كوز جۇما قاراماۋعا شاقىرعان ءىىم وكىلى ءتارتىپتىڭ باسى تاربيەدەن باستالاتىنىن تۇسىنگەن قوعامدا قىلمىسقا توزبەۋشىلىك قاعيداتى قاتاڭ ساقتالاتىنىن جەتكىزدى. «ال پوليتسيا ەلدەگى وتباسىنداعى ءاربىر ادامنىڭ قۇقىعى اياققا تاپتالماۋىن قاداعالاپ, كەز كەلگەن زورلىق-زومبىلىقتان قورعاۋعا ارقاشان دايىن», دەدى سپيكەر.
