الماتى اكىمدىگى «Qazaq Stroy Almaty» كومپانياسى تۇرعىن ءۇي كەشەنىن سالۋ ءۇشىن اعاشتاردىڭ ءبىر بولىگىن كەسۋگە قولدانىستاعى زاڭناماعا سايكەس رۇقسات العانىن اتاپ ءوتتى. الايدا اعاش كەسۋ كەزىندە قۇرىلىس كومپانياسى تاعى 170-تەن استام اعاش پەن 40 شاقتى بۇتانى زاڭسىز وتاپ, جالپى العاندا 216 جاسىل جەلەكتى جويىپ جىبەرگەن.
«وسىعان بايلانىستى ەكولوگيا جانە قورشاعان ورتانى قورعاۋ باسقارماسى مامانداندىرىلعان تابيعاتتى قورعاۋ پروكۋراتۋراسى جانە تابيعاتتى قورعاۋ پوليتسياسىنىڭ قىزمەتكەرلەرىمەن بىرلەسىپ, كەلتىرىلگەن زالالدى ەسەپتەيتىن جاسىل جەلەكتەردى تەكسەرۋ اكتىسىن تولتىردى. انىقتالعان فاكتى بويىنشا الماتى قالاسى الاتاۋ اۋدانىنىڭ پوليتسيا باسقارماسى قىلمىستىق كودەكستىڭ 340-بابى بويىنشا قىلمىستىق ءىس قوزعادى», دەپ حابارلادى اكىمدىك.
ءوز كەزەگىندە اتالعان قۇرىلىس كومپانياسى 2023 جىلعى ماۋسىمنان باستاپ «مەملەكەتتىك قىزمەتتەر» پورتالى ارقىلى (Elicense.kz) الماتى قالاسىنىڭ ەكولوگيا جانە قورشاعان ورتا باسقارماسىنا تۇرعىن ءۇي كەشەنى قۇرىلىسىنىڭ اۋماعىنداعى اعاشتاردى كەسۋگە رۇقسات الۋ ءۇشىن 6 رەت ءوتىنىم بەرگەنىن ايتادى. دەگەنمەن بارلىق وتىنىمگە ۇسىنىلعان ماتەريالداردا جاسىل جەلەكتەر تۋرالى اقپاراتتىڭ مازمۇنى بار ساراپتاما قورىتىندىسىنىڭ بولماۋى سەبەبىنەن اعاشتاردى كەسۋگە رۇقسات بەرىلمەگەن.
دەسە دە قۇرىلىس جۇرگىزۋشى كومپانيا وتكەن جىلدىڭ جەلتوقسان ايىندا ءتيىستى ساراپتاما قورىتىندىسىن قايتا ۇسىنىپ, مامانداردىڭ وڭ شەشىمىن العان. «اعاشتاردى كەسۋگە رۇقسات بەرۋ مەملەكەتتىك قىزمەت بولىپ تابىلادى. سوندىقتان قاجەتتى قۇجاتتار ۇسىنىلعان جاعدايدا اعاشتاردى كەسۋگە رۇقسات بەرۋدەن باس تارتۋ مۇمكىن ەمەس», دەپ مالىمدەدى الماتى اكىمدىگى.
ەكولوگيا جانە قورشاعان ورتانى قورعاۋ باسقارماسى كەسۋگە رۇقسات بەرىلگەن 2 797 اعاشتىڭ وتەمى رەتىندە 27 970 جاسىل جەلەك وتىرعىزىلاتىنىن ايتتى. باسقارما سونىمەن قاتار 100 دانا كولەمىندەگى جاسىل جەلەكتى باسقا جەرگە وتىرعىزۋ جونىندەگى جۇمىستارعا كەلىسىم بەرگەن. باسقارماداعىلار بۇل جۇمىستاردىڭ جاسىل جەلەكتەردى كۇتىپ ۇستاۋ جانە قورعاۋ ەرەجەلەرىنىڭ بارلىق تالابىنا ساي جۇزەگە اساتىنىنا سەندىردى.
ال ءوز كەزەگىندە سانجار بوقاەۆ باستاعان قوعام بەلسەندىلەرى الماتى اكىمدىگى اتالعان جاعدايعا بايلانىستى ارەكەتسىزدىك تانىتىپ, قۇرىلىس كومپانياسىنىڭ مۇددەسى ءۇشىن جاسىل جەلەكتى جويۋعا جول بەردى دەپ سىنعا الىپ وتىر.
الماتى
