جانكەشتى دەگەن ءسوزىمىزدى ءسال تارقاتىپ, ناقتىلاي تۇسسەك, قالام ۇستاعان قاراپايىم جۋرناليست ونەرى اسپانعا ورىلگەن ەرەن جۇيرىكتىڭ جان دۇنيەسىن اشۋ ءۇشىن ونىڭ ونەرىن ءتۇسىنىپ, ءبىلۋى شارت. ال اقىل-ءىلىمى التى قۇرلىققا اسىپ كەتكەن اكادەميكپەن ساليقالى اڭگىمە قۇرۋ ءۇشىن تىم قۇرىعاندا سول عىلىمنىڭ ءتۇپ-تەگىنە ۇڭىلە الاتىن ورە كەرەك. تاۋ تۇلعانىڭ ەلدەن بيىك ەڭبەگىن ءادىل باعالاۋ ءۇشىن پافوس پەن پارىقتىڭ, پايىم مەن پاراساتتىڭ اراجىگىن اجىراتا الاتىن اسا قارىمدى قابىلەت قاجەت. وسى شارتتاردىڭ ۇدەسىنەن تولىق شىققان قالامگەردى عانا جاقسى جۋرناليست دەگەن ءجون سەكىلدى.
بۇگىندە جۋرناليست جولدىباي بازار قولىنا قالام ۇستاعالى قازاقتىڭ ارىدەگى زامانىنان باستاپ, بەرىدەگى ءار كۇنگى تولعاقتى تاقىرىپتارىن تولعانا جازىپ ءجۇر. ۇنەمى جاقسى مەن جارىقتى ىزدەگەن جولدىبايدىڭ كوتەرگەن كوپتەگەن تاقىرىبىنىڭ ءبازبىرىن ءبىزدىڭ قوعام ءالى تولىق پايىمداپ ۇلگەرمەدى مە دەگەن كۇدىك بار. وسىدان جەتى-سەگىز جىل بۇرىن «Egemen Qazaqstan» گازەتىندە باسىلعان «كوردەمشە» اتتى كولەمدى ماقالاسى كوپشىلىك ورتادا توڭكەرىسشىل رەزونانس تۋدىرعانىمەن, بيلىكتىڭ بيشىگىن ۇستاعانداردىڭ كەيبىرىنىڭ مەڭىرەۋ ميشىعىنا ساۋلە بولىپ قۇيىلمادى. ايتپەسە, «قان تازالىعىن قاتتى ۇستانعان ەلمىز» دەپ ايداي الەمگە جار سالىپ, كوكىرەك كوتەرگەن قازاقتىڭ بارلىق بولمىسى مەن عۇمىرلىق ۇستىنى بولعان ۇلتتىق قۇندىلىقتارى قالاي قۇري باستاعانىن كوزگە شۇقىعانداي ەتىپ كورسەتكەن «كوردەمشە» تاقىرىبىنداعى ماتىنگە ءمان بەرگەن الاشتىڭ ءاربىر ازاماتى تاربيە مەن ءداستۇر جونىندە, تيىم مەن تەك تۋرالى سالماقتى ءسوز ايتىپ, قازاق بولىپ قالۋ تۋرالى ناقتى ىسكە ويىسا باستايتىن ەدى.
سۋدىڭ تۇنىعىن ءىشىپ, ءشوپتىڭ دارۋلىگى مول شۇيگىنىن عانا قورەك قىلاتىن, قازاققا مىنگەندە كولىك, ءيىن قاندىرىپ كيگەندە كيىم, ساۋعاندا سۋسىن, جەگەندە اسىل تاعامى بولعان جىلقى مالىنىڭ دا تىزگىن ۇستاعان بارلىق قاۋىمعا ءمالىم قاسيەتتەرىنەن ارتىعىن دا وسى جولدىبايدىڭ قالامىنان تۋعان دۇنيەلەردەن وقىپ بىلدىك. تۇيىق تا تىك تۇياقتىنىڭ ارىپتەسىمىز اسپەتتەگەن ءار قاسيەتىن تاپتىشتەي تۇسسەك, تىم ۇزاققا كەتىپ قالارىمىز انىق. ونى كەرەك قىلعان ادام ءوزى تاۋىپ الىپ, كوز جۇگىرتىپ, يگىلىگىنە جاراتىپ جاتسا, قۇبا-قۇپ.
ال ەندى ەلدىك پەن مەملەكەتتىك شارۋاعا كەلگەندە, كادىمگى وتتاي لاپىلداپ جانىپ تۇراتىن جولدىباي قاي ماسەلەنى كوتەرمەدى؟ اسىرەسە ورمانداي قالىڭ وڭتۇستىك حالقىن اراسى سيرەپ قالعان سولتۇستىكتەگى اعايىن-باۋىردىڭ اراسىنا كوشىرىپ اپارىپ, جەرسىندىرىپ, تۇراقتاندىرۋى ءۇشىن جالپاق جۇرتىنا جاريا قىلعان ماعىناسى مەن مازمۇنى عۇمىرلىق ۇسىنىس-تىلەكتەن تۇراتىن «ىشكى كوشى-قوندى قالاي رەتتەيمىز؟» اتتى تۇعىرلى ماقالاسىن بيلىكتىڭ بيشىگىن ۇستاعانداردىڭ قايسىسى پارىقتاپ, پايىمداي ءبىلدى؟ اگاراكي, ءتيىستى ورىنداعىلارعا تۇجىرىمدامالىق ءمانى بار وسىناۋ ماقالا انىق جەتىپ بارعاندا, قازىرگى كۇندە وڭتۇستىكتەن تارتىلعان كەرۋەن كوشتىڭ سالتاناتىنا قاراپ ءار قازاق مارقايا ماساتتانىپ, ماقتانىپ وتىرعان بولار ەدى.
جۋرناليست جولدىباي بازاردىڭ بەلدى تۋىندىلارىنىڭ ءبارىن بۇل ارادا تاراتىپ ايتا بەرۋگە ورىن تار. سەبەبى ونىڭ شەبەر ويىنان تۋعان پروزالىق شىعارمالارىنىڭ ءوزى ءبىر توبە. ءبىز بىلەتىن جولدىبايدىڭ عۇمىرلىق ۇستانىمى – سالاماتتى ۇرپاق تاربيەلەپ, ەلدىڭ, جەردىڭ شىن قامقورى مەن قورعانى بولاتىن وتانسۇيگىش ازاماتتى ءوسىرىپ, جەتىلدىرۋ. جولدىباي ومىرلىك جارى گۇلبالا ەكەۋى التى بىردەي پەرزەنتتى ماپەلەپ ءوسىرىپ وتىر. ەلدەگى دارىندى ءارى ادەپتى بالالارعا ارنالعان الدىڭعى قاتارلى مەكتەپتەر ساناتىنا جاتاتىن ءبىلىم جانە يننوۆاتسيا ليتسەيىن ۇزدىك تامامداعان ەكى ۇلكەن قىزدىڭ ءبىرى الماتىداعى سۇلەيمەن دەميرەل حالىقارالىق ۋنيۆەرسيتەتىندە, ال ەكىنشىسى قاراعاندىنىڭ مەديتسينا ۋنيۆەرسيتەتىندە وقىپ ءجۇر. كەيىنگى ەكى ۇل دا اتالعان ليتسەيدە ءبىلىم الىپ جاتىر. كەيىنگىلەرى ءالى بالاباقشادا.
اۋەلدە ەسىمىن ءبىلىپ, قالامىن قىزىقتاپ جۇرسەك تە, وسىدان توعىز-ون جىل بۇرىن «Egemen Qazaqstan» گازەتىندە جولدىبايمەن العاش رەت جۇزبە-ءجۇز تانىسىپ, بىلىستىك. ۇنەمى كوڭىلى گۇل, جايدارى كۇلكىسى جۇزىندە تۇراتىن جولدىبايدىڭ ومىرلىك ۇستانىمى ناعىز قازاقىلىق ەكەنىنە ءبارىمىزدىڭ كوزىمىز جەتتى. ۇلكەنگە قۇرمەتىن, كىشىگە ىزەتىن جاساپ تۇرۋدان ءبىر جاڭىلمايتىن ءىنىمىز ارالاسقان ورتادا ءوزى دە مول سىي-قۇرمەتكە يە بولدى. ۇلكەن ورىندا ءوزىنىڭ سالماقتى ءارى جۇيرىك قالام يەسى ەكەنىن انىق تانىتىپ, بىرەر جىلدا گازەتتەگى ەڭ اۋىر سانالاتىن ساياسات ءبولىمىنىڭ تىزگىنىن ۇستادى. ءبولىمنىڭ اۋىر سالماعىنا قاراماي, تاقىرىپتاردى ەركىن مەڭگەرىپ, دوڭگەلەتىپ اكەتتى. ناتيجەسىندە, سالاداعى ەرەن, ەرەك تۇلعالاردىڭ الدىندا ابىروي-بەدەلگە يە بولدى. جولدىبايدىڭ ءبىلىمى مەن بىلىگى, بويىنداعى ىزگى كىسىلىگى مەن كەمەلدەنۋى – سوعان لايىق.
ەلدەگى باس باسىلىم سانالاتىن «Egemen Qazaqstan» گازەتىنىڭ بۇگىندە مادەنيەت جانە ادەبيەت بولىمىنە جەتەكشىلىك ەتىپ وتىرعان ءىنىمىزدىڭ قازىرگى ىلگەرىندى ەڭبەگى ەل-جۇرتتىڭ نازارىندا. ونىڭ باسشىلىعىمەن ءبولىم دايىنداعان باسىلىمنىڭ تانىمدىق ادەبي, تاريحي بەتتەرىن وقىرمان قاۋىم قۇمارلانا وقيتىنىن كوز كورىپ ءجۇر. سوندىقتان ىرگەلى ازاماتتىڭ ەڭبەگىن ءادىل باعالاعان ۇجىم باسشىلارى رەداكتسيا جانىنا تۇرعىزعان جاڭا جاتاقحانادان ەكى بولمەلى ءۇي بەرىپ, استانادان 40 شاقىرىم جەردەگى اقمول قالاسىنان قالاپ كوشىرىپ العان ەدى. بۇكىل سانالى عۇمىرىن جۋرناليستيكاعا ارناپ كەلە جاتقان ابزال ازاماتتىڭ قولى بىلتىر كولەمى ات شاپتىرىم پاتەرگە جەتتى. وعان سەبەپشى بولعان, ارينە, قازىرگى گازەت باسشىلارى.
مەرەيلى بەلەستەگى جولدىباي باۋىرىمىزدىڭ ءالى دە الاتىن اسقارالى اسۋى الدا. ول اسۋلاردى قالامىمەن باعىندىراتىنىنا سەنەمىز.
