«قالانى ءوزىم تالاي ارالاعانمىن. سوندا ەسىرتكىنى قايدان الۋعا بولاتىنى تۋرالى بەلگىلەردى جول بويىنداعى نىسانداردان, كوپقاباتتى ۇيلەردىڭ قابىرعالارىنان كوپ كوردىم. مۇنىڭ الدىن الماسا بولمايدى. نەگىزىنەن سينتەتيكالىق ەسىرتكىنى ءبىر جەردە جاسايدى. ول قالا ىشىندەگى نەمەسە سىرتىندا ورنالاسقان جاسىرىن زەرتحانا بولۋى مۇمكىن. ەسىرتكى دايىندايتىن ورىن كەزىندە تۇلكىباس اۋدانىندا دا انىقتالعان ەدى. جالپى, تەك قابىرعاداعى بەلگىلەرمەن ەسىرتكى تاۋىپ, تۇتىنىپ جۇرگەن تاۋەلدى ازاماتتاردى ۇستاي بەرمەي, ولاردى تاراتۋشىلاردى, قويمالاردى, زەرتحانالاردى, ول جەرگە شيكىزات قايدان كەلىپ جاتقانىن انىقتاپ, ناعىز كىنالىلەردى جازاعا تارتۋ كەرەك. پوليتسيانىڭ جەدەل ارەكەت ەتۋ قىزمەتى مەن اكىمشىلىك پوليتسيا جۇمىسىن كۇشەيتۋ قاجەت. ەسىرتكىگە قارسى كۇرەس پوليتسيانىڭ, قالا اكىمدىگىنىڭ باستى مىندەتى بولۋعا ءتيىس. ويتكەنى ادامدى ساناسىنان ايىراتىن پسيحوتروپتى زات قوعام, اسىرەسە جاستار ءۇشىن وتە قاۋىپتى», دەدى ب.ناجمەتدين ۇلى.
«قىلمىستىڭ كوبىرەك اشىلعانى جۇمىستىڭ ءجۇرىپ جاتقانىن كورسەتپەي مە؟» دەگەن سۇراققا دەپۋتات: «كورسەتكىشتىڭ ءوسۋى قالاعا كەلىپ جاتقان ەسىرتكى سانىنىڭ ارتقانىن بىلدىرەدى. بۇل جەردە سالدارمەن كۇرەسپەي سەبەبىن انىقتاپ, كورسەتكىشتىڭ وسۋىنە جول بەرمەۋ ماقساتىندا الدىن الۋ شارالارىنا كوپ كوڭىل ءبولۋ كەرەك», دەپ جاۋاپ بەردى. سونىمەن بىرگە عيماراتتارداعى ەسىرتكىگە قالاي قول جەتكىزۋگە بولاتىن جازبا بەلگىلەردى انىقتاۋ پوليتسيانىڭ ەمەس, كوممۋنالدىق قىزمەت سالاسىنىڭ جۇمىسى بولۋ كەرەك دەگەندى ايتتى.
ءماجىلىس دەپۋتاتى ءوز سوزىندە قۇقىق قورعاۋ سالاسىنا قوماقتى قارجى ءبولىنىپ جاتقانىن مالىمدەدى. ماسەلەن, 2012 جىلى مەگاپوليس ءالى ەنشىسىن الماي تۇرعان كەزدە وڭتۇستىك قازاقستان وبلىسى پوليتسيا دەپارتامەنتىنىڭ بيۋدجەتى 11 ملرد تەڭگە بولسا, وسى كۇندە ءبىر عانا شىمكەنتتىڭ قۇقىق قورعاۋ قىزمەت سالاسىنا 20 ملرد تەڭگەدەن استام قارجى بولىنەدى. سونىمەن بىرگە حالىق قالاۋلىسى 1 ملن 200 مىڭنان استام حالىق تۇراتىن مەگاپوليستە باسقا دا زاڭ بۇزۋشىلىق تۇرلەرىنىڭ الدىن الۋ كەرەكتىگىن ەسكە ءتۇسىردى. «ايتالىق, زاڭسىز كولىك تاسىمالى. بىلتىر تۇركىستان وبلىسىنىڭ بايدىبەك اۋدانىنا قاراستى شايان اۋىلىنا بارا جاتقان جولدا جولاۋشىلار كولىگى ورتەنىپ كەتىپ, 9 ادام كۇيىكتەن قازا بولعان. وسىنداي جاعدايلار قايتالانباس ءۇشىن زاڭسىز كولىك تاسىمالىن رەتتەۋ قاجەت», دەپ مالىمدەدى دەپۋتات.
سونداي-اق ءماجىلىستىڭ تاعى ءبىر دەپۋتاتى دانابەك يسابەكوۆ «Amanat» پارتياسىنىڭ شىمكەنتتەگى سايلاۋالدى باعدارلاماسى اياسىندا سالىنىپ جاتقان وقۋشىلار سارايىنىڭ قۇرىلىس جۇمىسىمەن تانىستى.
مەردىگەر مەكەمە – «BI-Global» سەرىكتەستىگى. 500 ورىنعا ارنالعان عيمارات بيىل ناۋرىز ايىندا پايدالانۋعا بەرىلۋگە ءتيىس ەدى. قۇرىلىس نىسانىنىڭ جالپى قۇنى – 9,5 ملرد تەڭگە. جەرگىلىكتى بيۋدجەتتەن 1 ملرد تەڭگەگە جۋىق قارجى ءبولىندى. كومپانيا ءوزىنىڭ 3 ملرد تەڭگە قاراجاتىنا ءبىراز قۇرىلىس جۇمىستارىن جۇرگىزدى. الايدا ءارى قاراي قاراجاتتىڭ دەر كەزىندە تۇسپەۋىنەن نىساننىڭ قۇرىلىسى توقتاپ قالعان ەدى. وسى ورايدا دەپۋتات قارجى ماسەلەسىن شەشىپ بەرۋگە ۋادە بەردى. ءوز كەزەگىندە مەردىگەر كومپانيا دا جىل اياعىنا دەيىن عيماراتتى تولىق سالىپ بىتىرۋگە ۋاعدالاستى.
«پارتيانىڭ سايلاۋالدى باعدارلاماسىنداعى ۇلكەن باسىمدىققا يە باعىتتاردىڭ ءبىرى – ءبىلىم سالاسى. باعدارلامادا جاڭا وقۋشىلار سارايى, جاس تەحنيكتەر ستانساسى, بالالار تەحنوپاركى, مۋزىكا, ونەر مەكتەپتەرى بوي كوتەرەدى دەپ كورسەتىلگەن. ءار بالا سپورت سەكتسياسىنا, شىعارماشىلىق ستۋدياعا, تەحنيكالىق ۇيىرمەگە تەگىن قاتىسۋعا قۇقىلى. «ارت سپورت» باعدارلاماسى دا جالعاسادى. جالپى, شىمكەنت سەكىلدى ميلليوننان استام حالقى بار مەگاپوليستە وقۋشىلار سارايى كوپ بولۋعا ءتيىس دەپ ەسەپتەيمىن. ونىڭ ۇستىنە بۇگىنگى تاڭدا شاھار بالا تۋ كورسەتكىشى بويىنشا وڭىرلەر اراسىندا جوعارى ناتيجە كورسەتىپ كەلەدى. ال تۇران شاعىن اۋدانىندا سالىنىپ جاتقان وقۋشىلار سارايى بالالار مەن پەداگوگتەر ءۇشىن يننوۆاتسيالىق الاڭعا اينالادى دەگەن ۇمىتتەمىن. جاستار بولاشاق ماماندىعىن ءوز قالاۋىمەن تاڭداي الاتىن, كرەاتيۆتى, بەلسەندى ءارى ازاماتتىق ۇستانىمى بيىك بولۋعا ءتيىس. ءبىلىمدى جاستار – ەلدىڭ زياتكەرلىك الەۋەتى. ءبىز وسىنى ۇمىتپاۋىمىز كەرەك», دەدى ءماجىلىس دەپۋتاتى.
شىمكەنت
