ايماقتاعى جاۋاپتى ماماندار اققۋلاردىڭ ولەكسەسى تۋرالى دەرەكتەر كۇن ساناپ ارتىپ جاتقانىن مالىمدەدى.
«2023 جىلعى 21 جەلتوقساندا قاراكول كولىندە اققۋلار ولگەنى تۋرالى العاشقى حابارلاما كەلىپ ءتۇستى. 6 قاڭتارداعى جاعداي بويىنشا ءبىز 601 اققۋ ولگەنىن انىقتادىق. قىرىلعان اققۋلاردىڭ 90%-تەن استامى – جاس تولدەر», دەدى ماڭعىستاۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى عابباس دوساتوۆ اپپاراتتىق كەڭەستە.
اپپارات كەڭەسىنە جينالعاندار قاراكول جاعالاۋىنان ولەكسەسى تابىلعان اققۋلار قازاقستاننىڭ قىزىل كىتابىنا ەنگىزىلمەگەنىن ەسكە سالدى.
«الدىن الا مالىمەتتەرگە سۇيەنسەك, قاراكول كولىندە اققۋلاردىڭ جاپپاي قىرىلۋى قۇس تۇماۋىنىڭ ورشۋىنەن بولعانىن كورسەتەدى. ولاردان H5N1 ازيالىق شتاممى تابىلدى. بۇل ۆيرۋستىڭ ادامدارعا جۇقپالىلىعى تومەن, قۇستارعا اسەر ەتەدى, باسقا جانۋارلار جۇقتىرعان جاعدايدا سيمپتومسىز وتەدى. وتكەن جىلى ۆەتەريناريالىق-پروفيلاكتيكالىق ءىس-شارالار جوسپارىنا سايكەس قاۋىپ تونگەن ايماقتا التى مىڭ باس قۇس ۆاكتسيناتسيالاندى. وبلىستا بارلىعى ءۇش قۇس شارۋاشىلىعى بار, بىراق ولاردا شارۋاشىلىقتىڭ جابىق ءتۇرى بولعاندىقتان قۇستاردى ەگۋدەن باس تارتتى», دەدى قازاقستان رەسپۋبليكاسى اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ ماڭعىستاۋ وبلىستىق اۋماقتىق ينسپەكتسياسىنىڭ باسشىسى تەمىربەك نۇرتازين.
ال ايماق باسشىسى نۇرلان نوعاەۆ قۇستاردىڭ قىرىلۋ سەبەبىن جان-جاقتى زەردەلەۋدى تاپسىردى.
«ەكولوگتار مەن بىلىكتى ماماندار ماسەلەنىڭ ءمان-جايىن بىرگە انىقتاپ, مۇنىڭ ودان ءارى تارالۋىن بولدىرماۋ ءۇشىن شارالار قابىلداۋى كەرەك. ورنيتولوگتار قۇستاردىڭ تاماقتانۋى تۋرالى ناقتى ۇسىنىستار بەرۋى كەرەك. كەيبىر ساراپشىلار اققۋلاردى تاماقتاندىرۋ قولداسا, ال باسقالارى, كەرىسىنشە, قاۋىپ دەپ سانايدى. اسىعىس قورىتىندى جاساۋعا بولمايدى, الدىمەن انىقتاۋ كەرەك», دەدى نۇرلان نوعاەۆ.
