سۋرەتتەردى تۇسىرگەن – جەڭىس ىسقاباي
بۇل اقجولتاي جاڭالىقتى, اسىرەسە وبلىس ورتالىعىنان الىستا ورنالاسقان اۋىل تۇرعىندارى قۋانىشپەن قابىلدادى. وڭىردەگى مەديتسينا الەۋەتىن ارتتىرۋ ماقساتىندا بيۋدجەتتەن 750 ملن تەڭگە شاماسىندا قارجى بولىنگەن. وسى ورايدا ارنايى سالتاناتتى ءىس-شارا ءوتىپ, وبلىس اكىمى بەيبىت يساباەۆ اۆتوكولىك كىلتتەرىن دارىگەرلەرگە تاپسىردى.
ون ءۇش اۋداندىق جانە وبلىستىق اۋرۋحاناعا, سونداي-اق كارديولوگيالىق ورتالىققا, كوپسالالى بالالار اۋرۋحاناسىنا, پسيحيكالىق دەنساۋلىق ورتالىعىنا بارلىعى 29 اۆتوكولىك بەرىلدى. بۇل سانيتارلىق اۆتوكولىك وتتەگى باللوندارىمەن, وتتەگى قىسىمىن رەتتەگىشتەرمەن, ينفۋزيالىق جۇيەگە ارنالعان كرونشتەيندەرى بار لەەر-تۇتقالارمەن, قولدى دەزينفەكتسيالاۋعا ارنالعان ديسپەنسەرلەرمەن, روليكتى اربالارمەن جانە باسقا دا قاجەتتى زاتتارمەن جابدىقتالعان.
ءوڭىر باسشىسى بەيبىت يساباەۆ دەنساۋلىق ساقتاۋ مەكەمەلەرىنىڭ باسشىلارىنا اۆتوكولىكتەردىڭ كىلتتەرىن تاپسىرۋ راسىمىندە سويلەگەن سوزىندە حالىقتىڭ دەنساۋلىعىن نىعايتۋ, مەديتسينالىق قىزمەتتەردىڭ ساپاسىن ارتتىرۋ مەملەكەت باسشىسىنىڭ اتقارۋشى ورگانداردىڭ الدىنا قويعان باستى مىندەتتەرىنىڭ ءبىرى ەكەنىن اتاپ ءوتتى.
«ۇلتتىڭ ساۋلىعى – مەملەكەتتىڭ ساۋلىعى. سوندىقتان بۇل ماسەلەگە ءبىز تۇراقتى نازار اۋدارىپ, ءاردايىم قولداۋ كورسەتىپ كەلەمىز. اتاپ ايتقاندا, مەديتسينالىق نىساندار سالۋعا, ارنايى قۇرال-جابدىقتار ساتىپ الۋعا, كادرلاردى وقىتۋعا قوماقتى قاراجات جۇمسالىپ كەلەدى. بيىل جەرگىلىكتى بيۋدجەت ەسەبىنەن 3,6 ملرد تەڭگەگە مەديتسينالىق جابدىقتار ساتىپ الىنىپ, جابدىقتالۋ كورسەتكىشى 93%-عا جەتكىزىلدى. وتكەن جىلى بۇل كورسەتكىش 87 پايىز بولعان. سونداي-اق مەديتسينادا كادر تاپشىلىعى پروبلەماسىن شەشۋ ءۇشىن كەلەسى جىلدان باستاپ وڭىرگە كەلگەن ماماندارعا 5 ملن تەڭگەدەن 10 ملن تەڭگەگە دەيىنگى مولشەردە بىرجولعى ماتەريالدىق كومەك كورسەتىلەتىن بولادى», دەدى ب.يساباەۆ.
ءوڭىر اكىمى ءباسپاسوز قىزمەتىنىڭ مالىمەتىنشە, جەدەل جانە شۇعىل مەديتسينالىق كومەك كورسەتۋ جانە مەديتسينالىق قىزمەتتەردىڭ ساپاسىن ودان ءارى ارتتىرۋ ءۇشىن جەتىسۋ وبلىسىندا 67 جەدەل جاردەم بريگاداسى جاساقتالعان (نورماتيۆ – 10 مىڭ تۇرعىنعا 1 بريگادا). شالعاي اۋدانداردا «103» بريگادالارىنىڭ ۋاقتىلى جەتۋى ءۇشىن قوسىمشا 12 ديسلوكاتسيا قۇرىلدى. «103» بىرىڭعاي ديسپەتچەرلىك قىزمەتى» ۇيىمداستىرىلدى. ول وبلىستىڭ تۇكپىر-تۇكپىرىنەن قوڭىراۋ قابىلدايدى. تاۋلىك ىشىندە كەلىپ تۇسەتىن ءوتىنىش سانى 2 مىڭعا دەيىن بارادى. سونداي-اق «103» بىرىڭعاي كەزەكشى ديسپەتچەرلىك قىزمەتىنىڭ بازاسىندا تاۋلىك بويى جۇمىس ىستەيتىن سall-ورتالىق بار. وندا حالىققا جوعارى بىلىكتى مەديتسينا قىزمەتكەرلەرى كەڭەس بەرەدى.
ايتا كەتەيىك, بيىل «جەدەل جاردەم» الەۋمەتتىك-قايىرىمدىلىق جوباسى اياسىندا قايتارىمسىز نەگىزدە «Samruk-Kazyna Trust» كورپوراتيۆتىك قورىنىڭ قولداۋىمەن ءوڭىردىڭ 5 اۋداندىق اۋرۋحاناسىنا «JAC Sunray 6C» ماركالى جەدەل جاردەم كولىگى بەرىلگەن بولاتىن. بۇگىن وبلىستىق جەدەل جاردەم اۆتوپاركى بيۋدجەت قاراجاتى ەسەبىنەن ساتىپ الىنعان تاعى 29 جاڭا اۆتوكولىكپەن تولىعىپ وتىر.
وسى رەتتە ايتا كەتەيىك, جاقىندا الاكول اۋدانىنىڭ بايزەرەك, قارلىعاش, ىنتالى, قامىسقالا اۋىلدارىندا بلوكتى-مودۋلدىك مەديتسينالىق عيماراتتار حالىق يگىلىگىنە بەرىلدى. اۋدان ورتالىعىنان شالعاي جاتقان بۇل اۋىل تۇرعىندارى ەندى بۇرىنعى ەسكى عيماراتتىڭ ورنىنا جاڭا فەلدشەرلىك-اكۋشەرلىك پۋنكتتە ەم الادى.
الاكول اۋداندىق اكىمدىگىنىڭ مالىمەتىنشە, قامىسقالا اۋلى اۋدان ورتالىعىنان 60 شاقىرىم قاشىقتىقتا ورنالاسقان. قامىسقالا اۋىلدىق وكرۋگىندە 840 ادام تۇرادى. بۇل اۋىلدا قولدانىستا بولعان دارىگەرلىك امبۋلاتوريا 1978 جىلى سالىنعان, كەزىندە بالىق زاۋىتىنا قاراستى عيمارات ەدى. اۋىل تۇرعىندارىنىڭ ساپالى مەديتسينالىق ەم الۋىنا جاعداي جاساۋ ماقساتىندا جاڭا نىساننىڭ قۇرىلىسىنا جەرگىلىكتى بيۋدجەتتەن 143 ملن تەڭگە ءبولىنىپ, فاپ تۇرعىزىلدى. نىساندى «گولدەن ستروي» جشس مەردىگەر كومپانياسى سالدى. ونداعى ارنايى بولمەلەر قاجەتتى قۇرالدارمەن جابدىقتالعان. مەديتسينالىق مەكەمە ءبىر اۋىسىمدا 15 ەمدەلۋشىگە مەديتسينالىق كومەك كورسەتە الادى.
بۇرىنعى عيماراتىمىز ءتيىستى تالاپتارعا سايكەس كەلمەيتىندىكتەن, ەم جاساۋدا قولايسىزدىق تۋدىراتىن. ماتەريالدىق-تەحنيكالىق بازاسى دا توزىپ تۇرعان. ەندى, مىنە, زامان تالابىنا ساي ساپالى دارىگەرلىك كومەك كورسەتۋگە لايىقتالعان فەلدشەرلىك پۋنكت اشىلدى. مۇندا قازىر جۇمىسشىلاردى قوسپاعاندا 4 بىلىكتى مامان – ءبىر فەلدشەر, ءبىر اكۋشەر, ەكى مەدبيكە قىزمەت كورسەتەدى», دەيدى اۋداندىق ورتالىق اۋرۋحانا ديرەكتورى اسحات بۇتاباەۆ.
ونىڭ ايتۋىنشا, مۇندا اۋىل تۇرعىندارى العاشقى مەديتسينالىق-سانيتارلىق كومەك, ەكپە ەكتىرۋ, سكرينينگ, اكۋشەرلىك جانە ەكگ اپپاراتىنا جۇرەك قاعىسىن تەكسەرتۋ سەكىلدى قىزمەتتەر بويىنشا ەم-دوم الا الادى. وعان قوسا اۋداندىق ورتالىق اۋرۋحانادان ارنايى بىلىكتى ماماندار بەلگىلەنگەن كەستەگە سايكەس اۋىلعا كەلىپ, تۇرعىنداردىڭ دەنساۋلىعىن قارايدى.
قامىسقالالىقتار بۇل جايدارمان جاڭالىقتى قۋانا قابىلدادى. اۋىلدىق انالار كەڭەسىنىڭ توراعاسى راۋشان جۇمانقۇلوۆا: «اۋلىمىزدا فەلدشەرلىك-اكۋشەرلىك پۋنكت سالىنعانىنا ريزامىز. بۇرىن كىشكەنتاي عانا ەسكى عيماراتتىڭ ءوزىن جوقتان بار دەپ كوڭىلگە مەدەت تۇتاتىنبىز. بۇگىن جاپ-جاڭا, ەڭسەلى مەديتسينالىق نىسان كوپتىڭ يگىلىگىنە بەرىلىپ وتىر. عيماراتتىڭ اشىلۋىنا ۇلەس قوسقان بارشا ازاماتقا العىسىمىز شەكسىز», دەپ قۋانىشىن جەتكىزدى.
الاكول اۋدانىندا 56 ەلدى مەكەندە 75 مىڭعا جۋىق حالىق بار. ولارعا قولجەتىمدى ءارى ساپالى مەديتسينالىق قىزمەت كورسەتۋ ءۇشىن 2024 جىلى ەكپىندى, جايپاق, قاينار اۋىلدارىنا فەلدشەرلىك-اكۋشەرلىك پۋنكت سالۋ, 5 ەلدى مەكەندە بلوكتى-ءمودۋلدى نىساندار سالۋ جوسپارلانىپ وتىر.
جەتىسۋ وبلىسى
