وقۋ-اعارتۋ مينيسترلىگىنە مەكتەپكە دەيىنگى, ورتا, كاسىپتىك تەحنيكالىق ءبىلىم ساپاسىن ارتتىرۋ مىندەتى جۇكتەلگەن. مىندەتكە سايكەس جوسپار دا دايىن. جوسپاردىڭ جوباسىنا زەر سالساق, 2030 جىلعا قاراي 6 جاسقا دەيىنگى بالالار مەكتەپكە دەيىنگى ساپالى بىلىممەن جانە تاربيەمەن تولىق قامتىلادى. مەكتەپكە دەيىنگى ءبىلىم بەرۋ مەن تاربيە باعدارلامالارى حالىقارالىق تاجىريبەدە پايدالانىلاتىن ۇزدىك ستاندارتتار مەن ادىسنامالارعا ساي كەلەتىن بولادى.
2050 جىلعا قاراي ەلىمىزدەگى ورتا ءبىلىم بەرۋ جۇيەسىن دامىتۋ ءۇشىن مەملەكەتتىك-جەكەشەلىك ارىپتەستىك جەلىسىن قۇرۋ كوزدەلگەن. ءبىلىم بەرۋ ساياساتى فۋنكتسيونالدى ساۋاتتىلىقتى تۇبەگەيلى ارتتىرۋعا, زاماناۋي قۇزىرەتتىلىكتى قالىپتاستىرۋعا, جاس بۋىندى سىندارلى الەۋمەتتەندىرۋگە, ءبىلىم الۋدىڭ قولجەتىمدىلىگىنە, سونداي-اق وقىتۋ ساپاسىنداعى وڭىرلىك تەڭسىزدىكتى تومەندەتۋگە باعىتتالادى. سونىمەن قاتار تاجىريبەلىك داعدىلاردى وقىتۋ جانە تاجىريبەلىك بىلىكتىلىكتى الۋ بويىنشا باعدارلامالاردى قوسا وتىرىپ, ورتا ءبىلىم بەرۋدىڭ وقۋ جوسپارلارىنىڭ جانە باعدارلامالارىنىڭ باعىتى مەن ەكپىنىن وزگەرتۋ جوسپارلانعان.
ال ورتا, تەحنيكالىق جانە كاسىپتىك ءبىلىم بەرەتىن ۇيىمداردىڭ بارلىعىندا 2030 جىلعا قاراي ۇجىمدىق باسقارۋ جانە اكادەميالىق دەربەستىك قاعيداتتارى ەنگىزىلەتىن بولادى. تەحنيكالىق جانە كاسىپتىك ءبىلىم بەرۋ جۇيەسىن دامىتۋ ەڭبەك نارىعىنىڭ بۇرىننان بار جانە بولاشاق قاجەتتىلىكتەرىن قاناعاتتاندىرۋعا باعىتتالادى. كاسىپكەرلىككە باعدارلانعان وقۋ باعدارلامالارى, ءبىلىم بەرۋ كۋرستارى مەن ينستيتۋتتارى قۇرىلادى.
ايتىلعان ناتيجەگە قول جەتكىزۋ ءۇشىن ءبىلىم سالاسىندا بيىل اتقارىلاتىن جۇمىستار ايقىندالدى. وقۋ-اعارتۋ مينيسترلىگىنىڭ رەسمي مالىمەتى بويىنشا حالىقتىڭ الەۋمەتتىك وسال توپتارىنان شىققان بالالاردى دەربەس مەكتەپكە دەيىنگى تاربيەلەۋ قىزمەتتەرىنە قول جەتكىزۋ, ۇيدەگى تاربيەشىلەر ينستيتۋتىنىڭ تاجىريبەسىن قولدانۋ جوسپارى وسى جىلى ورىندالادى. بۇعان قوسا مەكتەپكە دەيىنگى وقىتۋ مەن تاربيەلەۋ ساپاسىنا مونيتورينگ ەنگىزىلەدى. ال جۇمىس ىستەۋ قۇقىعى مەكتەپكە دەيىنگى قىزمەتتەردىڭ ساپاسىن جەتىلدىرەتىن جانە جاقسارتاتىن مەكتەپكە دەيىنگى ۇيىمدارعا بەرىلەدى. سونىمەن قاتار مەكتەپكە دەيىنگى تاربيە مەن وقىتۋ مازمۇنىن جاڭارتۋ كەزىندە باستاۋىش بىلىممەن بىردەي تاسىلدەر مەن ۇعىمدار پايدالانىلادى. ءبىلىم بەرۋ مازمۇنىنا بارلىق جاس توپتارى مەن سىنىپتاردا مازمۇندى بىرىكتىرۋ ءتاسىلى رەتىندە «وتپەلى تاقىرىپتار» ەنگىزىلەدى. ساپانى ارتتىرۋ, سونداي-اق تولىققاندى دامىتۋشى جانە قاۋىپسىز ورتا قۇرۋ, ءبىلىم بەرۋ ءۇردىسىن جۇزەگە اسىرۋ جاعدايلارىن قامتاماسىز ەتۋ, نورمالار مەن قاعيدالاردى ساقتاۋ, تاربيەلەنۋشىلەردىڭ دەنساۋلىعىن ساقتاۋ, پەداگوگتەردىڭ كاسىبي قۇزىرەتتىلىگىن ارتتىرۋ جانە شتاتتاردى جاساقتاۋ ءۇشىن مەكتەپكە دەيىنگى ءبىلىم بەرۋ ۇيىمدارى كەزەڭ-كەزەڭىمەن ليتسەنزيالانادى.
ورتا ءبىلىم بويىنشا ورىن تاپشىلىعىن ازايتۋ ءۇشىن 1,5 ملن وقۋشى ورنى اشىلادى. تىرەك اۋىلدار مەن اۋدان ورتالىقتارىندا شاعىن اۋىلداردىڭ بالالارىن ينتەرناتتاردا نەمەسە پاترونات وتباسىلاردا تۇرۋ ءۇشىن ورىندارمەن 100 پايىز قامتاماسىز ەتىلەدى. بارلىق مەكتەپ عيماراتتارى سانيتارلىق توراپتارمەن, كومپيۋتەرلەرمەن جابدىقتالادى. ينتەرنەتكە قول جەتكىزۋ جىلدامدىعى 50 مگب/سەك تومەن ەمەس جانە ليميتتەلمەگەن ترافيكپەن قوسىلادى. بارلىق مەكتەپتە وتاندىق ءوندىرىس جابدىقتارىن قولدانا وتىرىپ, سىمسىز جەلىلەرى ورىستەتىلەتىن بولادى. بىرىڭعاي ينتەگراتسيالانعان ءبىلىم بەرۋ ونلاين-پلاتفورماسى ىسكە قوسىلادى. بۇعان قوسا بيىلعى وقۋ جىلىندا مەكتەپتەگى ءبىلىم بەرۋ باعدارلامالارىنا وقۋشىلاردىڭ ەموتسيونالدى, فيزيكالىق جانە پسيحيكالىق ءال-اۋقاتىنىڭ نەگىزى بولاتىن تۇراقتى دامۋ, شىعارماشىلىق سانا, سالاۋاتتى پسيحوەموتسيونالدى دامۋ كومپونەنتتەرى ەنگىزىلەدى. وقۋشىلاردىڭ ويلاۋ داعدىلارىن قاراپايىم دەڭگەيدەن جوعارى دەڭگەيگە دەيىن كوتەرىپ, قالىپتاستىرۋعا باسىمدىق بەرىلەدى.
مينيسترلىكتىڭ جوسپارىنا سەنسەك, مۇعالىم تاپشىلىعى جويىلادى, كاسىبي قۇرام جاقسارادى. پەداگوگ اتاعىنا قۇقىق ۇلتتىق بىلىكتىلىك تەستىلەرىنىڭ ناتيجەلەرى بويىنشا بەرىلەتىن بولادى, ال اتتەستاتتاۋ جۇيەسى وقۋشىنى وقىتۋدىڭ ناقتى ناتيجەلەرىنە باعدارلانادى. ينفورماتيكا مەن فيزيكا پانىنەن ساباق بەرەتىن اۋىل مۇعالىمدەرىنە, سونداي-اق روبوتتەحنيكا مەن باعدارلامالاۋ بويىنشا اۋداندىق جارىستار مەن تۋرنيرلەردىڭ جەڭىمپازدارىن دايىنداعان پەداگوگتەرگە ەرەكشە نازار اۋدارىلادى, ولاردىڭ جالاقىسىنا قوسىمشا ۇستەمە جۇيەلەردەن باسقا ىنتالاندىرۋ شارالارى دا ازىرلەنەدى.
ال تەحنيكالىق جانە كاسىپتىك ءبىلىم بەرۋ جۇيەسىندەگى جۇمىستار 2024 جىلى كەپىلدەندىرىلگەن ءبىرىنشى كاسىپ داعدىلارىن الۋ, ىشكى كوشىپ-قونۋشىلاردى قالا ەكونوميكاسىنا بەيىمدەۋ, سونداي-اق سەكتورارالىق اعىندار كەزىندە جاڭا تالاپتارعا جۇمىس كۇشىن بەيىمدەۋ جونىندەگى مىندەتتەردى شەشۋگە باعىتتالادى.
مەملەكەتتىك ءبىلىم بەرۋ تاپسىرىسى نەگىزىندە تەگىن كاسىبي ءبىلىم الۋعا تىلەك بىلدىرۋشىلەر تولىق قامتىلادى. ءبىلىم بەرۋ باعدارلامالارى جۇمىس بەرۋشىلەردە سۇرانىسقا يە ساپالى كاسىبي جانە الەۋمەتتىك داعدىلاردى ۇسىنۋعا باعىتتالادى. سونىمەن قاتار بيىل مينيسترلىك تاراپىنان تەحنيكالىق جانە كاسىپتىك ءبىلىم بەرۋ ۇيىمدارىنىڭ ءتيىمدى باسشىلارىن انىقتاۋعا جانە ولاردىڭ كوشباسشىلىق قابىلەتىن دامىتۋعا باعىتتالعان جوبا ىسكە قوسىلادى.
وقۋ-اعارتۋ مينيسترلىگىنىڭ مالىمەتىنشە, جۇمىس بەرۋشىلەردىڭ قىزمەتكەرلەرگە قوياتىن تالاپتارى كورسەتىلگەن كاسىپتىك ستاندارتتاردى ازىرلەۋ بويىنشا جۇمىس جالعاسا بەرەدى. ال «جاس مامان» جوباسى اياسىندا جاراقتاندىرىلعان كوللەدجدەر بازاسىندا كادرلاردى وزىق دايارلاۋ ورتالىقتارى قۇرىلادى. سونداي-اق وسى جىلى كوللەدجدەر اراسىندا اشىقتىق پەن باسەكەگە قابىلەتتىلىكتى قامتاماسىز ەتۋ ءۇشىن «ستۋدەنتكە اقشا» قاعيداتى بويىنشا كوللەدجگە قابىلداۋدىڭ جاڭا فورماتى ەنگىزىلەدى.
