كوشپەلىلەر ويىندارى 2014 جىلدان بەرى ۇزدىكسىز ۇيىمداستىرىلىپ كەلدى. العاشقى ءۇش باسەكەنىڭ شىمىلدىعى قىرعىزستاندا ءتۇرىلدى. «ايىر قالپاقتى» اعايىندارىمىز ونى جوعارى دەڭگەيدى وتكىزۋگە بارىنشا كۇش سالدى. ۋاقىت وزعان سايىن اتالعان جارىستىڭ بەدەلى مەن مارتەبەسى ءوسىپ, كورەرمەندەر سانى كۇرت ارتتى. سوعان سايكەس, قاتىسۋشى كوماندالاردىڭ قاتارى دا كوبەيە ءتۇستى. ءبىر سوزبەن ايتساق, بۇل ويىندار ەتنو- سپورتتىڭ وليمپياداسىنا اينالدى. ەكى جىلدا ءبىر وتەتىن وسى سپورتتىق سايىستى 2022 جىلى تۇركيانىڭ ەجەلگى يزنيك قالاسى قابىلدادى. انادولى ەلىندە قازاقستان قۇراماسى وتە جاقسى كورسەتكىشكە قول جەتكىزدى. ال بىزدەر ءۇشىن ەڭ ماڭىزدىسى – كوشپەلىلەر ويىندارىنىڭ باعدارلاماسىنا كوكپاردىڭ ەنۋى. بۇل وزگەرىس «كوكپار» دەسە دەلەبەسى قوزىپ, قانى قىز-قىز قاينايتىن قازاق جانكۇيەرلەرىن قاتتى قۋانتتى. تۇڭعىش رەت ۇيىمداستىرىلعان جارىستا ءبىزدىڭ جىگىتتەر قارسىلاس شاق كەلتىرمەي, جەڭىس تۇعىرىنىڭ ەڭ بيىك ساتىسىنا كوتەرىلدى.
– V كوشپەلىلەر ويىندارىنىڭ باعدارلاماسىنا سپورتتىڭ 20 ءتۇرى ەنىپ وتىر. بىرقاتار جارىس «قازانات» اتشابارىندا وتەدى. قازىر استانا قالاسىنىڭ اكىمدىگى سول يپپودرومدا كۇردەلى جوندەۋ جۇمىستارىن جۇرگىزىلىپ جاتىر. بۇيىرتسا, ول تاياۋ ۋاقىتتا اياقتالىپ قالار. ودان بولەك جەكەلەگەن كۇش سايىستارى جاقسىلىق ۇشكەمپىروۆ اتىنداعى جەكپە-جەك سارايىندا, ءداستۇرلى ينتەللەكتۋالدىق ويىندار «دۋمان» قوناقۇيىندە, ال باسقا باسەكەلەر «الاۋ» مۇز ايدىنى مەن «Qazaqstan» جەڭىل
اتلەتيكا سارايىندا ۇيىمداستىرىلادى. ءدۇبىرلى دودانىڭ اشىلۋ سالتاناتى «استانا ارەنا» ستاديونىندا, ال جابىلۋ ءراسىمى «قازاناتتا» وتەدى. باسەكەلەر اياقتالعان بەتتە جالپى كوماندالىق ەسەپتىڭ قورىتىندىسىن شىعارامىز, – دەيدى ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ.
قازاقستان قۇراماسى جارىس باعدارلاماسىنا ەنگەن بارلىق سپورت ءتۇرى بويىنشا باق سىنايدى. باستى ماقسات – كوپشىلىك كوڭىلىنەن شىعاتىنداي ناتيجەلى ونەر كورسەتىپ, جالپى كوماندالىق ەسەپتە جەكە-دارا كوش باستاۋ. اسىرەسە ءبىز كوكپار, قازاق كۇرەسى, اۋدارىسپاق جانە جامبى اتۋ سىندى اتا-بابالارىمىزدان كەيىنگى ۇرپاققا ميراس بولىپ قالعان ۇلتتىق سپورت تۇرلەرىنەن وتەتىن سايىستاردا تولاعاي تابىسقا قول جەتكىزۋگە ءتيىسپىز. بۇل كۇندەرى باس كوماندامىزدىڭ ساپىندا سىرىم ءىزباساروۆ, عالىمجان ءىزجانوۆ, ەرالحان ايكوز, ايتبەك سارىباي, قۇرمانبەك تۇرعانبەك, اسەل داليەۆا جانە تاعى باسقا مىقتىلار بار. ەڭ بايتاق قازاق ەلىنىڭ باس شاھارىندا وتەتىن ءدۇبىرلى دودادا سول دۇلدۇلدەرمەن قاتار, جارىس جولىنا شىعاتىن باسقا دا ساڭلاقتارعا زور سەنىم ارتىلىپ وتىر.
– قازاق قاۋىمى ءۇشىن كوشپەلىلەر ويىندارىنىڭ ماڭىزى ايرىقشا, – دەپ جالعاستىردى اڭگىمەسىن باقداۋلەت ءسابيتوۆ. – ويتكەنى ۇلتتىق ونەرىمىز ۇلىقتالىپ, بۇكىل الەم جۇرتشىلىعى نازارىنا ىلىگەتىن تۇسى وسى. اتالعان جارىسقا قازاقستان قۇراماسى ۇزدىكسىز قاتىسىپ كەلە جاتقانى وزدەرىڭىزگە دە ءمالىم. كورسەتكەن ناتيجەمىز دە كوڭىل كونشىتەرلىك. تۇڭعىش رەت ۇيىمداستىرىلعان ويىندارعا 19 ەلدىڭ سپورتشىلارى قاتىسسا, 2022 جىلى تۇركيادا وتكەن سايىستا الەمنىڭ 102 مەملەكەتىنىڭ دۇلدۇلدەرى باق سىنادى. دەمەك جەر جاھاننىڭ تەڭ جارتىسى بۇل سىنعا قىزىعۋشىلىق تانىتادى دەگەن ءسوز. ونىڭ ۇستىنە استاناداعى جارىستىڭ جەڭىمپازدارىنا حالىقارالىق دارەجەدەگى سپورت شەبەرى اتاعى بەرىلەدى. بۇل – سپورتشىلار ءۇشىن ۇلكەن موتيۆاتسيا! بۇعان دەيىن ونداي اتاق بەرىلمەيتىن. وسى تاماشا ءداستۇر الداعى ۋاقىتتا دا جالعاسىن تاۋىپ, كوشپەلىلەر ويىندارى رەسمي جارىسقا اينالسا, ۇلتتىق سپورتپەن اينالىساتىن جاستاردىڭ سانى دا كۇرت ارتاتىنى ايدان انىق.
قازىرگى كەزدە بارلىق سپورت ءتۇرى بويىنشا ۇلتتىق قۇراما كوماندالار جاساقتالدى. جەرلەستەرىمىز كەمىندە ءتورت-بەس وقۋ-جاتتىعۋ جيىنىن وتكىزۋدى كوزدەپ وتىر. اراسىندا رەسپۋبليكالىق جانە حالىقارالىق تۋرنيرلەرگە قاتىسۋ دا جوسپارلانىپ وتىر. ءبىر سوزبەن ايتساق, ەلوردادا الاۋى تۇتاناتىن V كوشپەلىلەر ويىندارىنا دايىندىعىمىز وتە جاقسى. ەندى قازاق ەلىنىڭ ورەندەرى وسى كەرەمەت سپورتتىق شارانى اسا جوعارى دەڭگەيدە ۇيىمداستىرىپ قانا قويماي, بارىنشا زور تابىسقا قول جەتكىزۋگە ءتيىس.
