سۋرەتتى تۇسىرگەن اۆتور
بۇگىن شىعىس قازاقستان وبلىسىنىڭ اكىمى ەرمەك كوشەرباەۆ كەستەگە سايكەس جۇرگىزىلىپ جاتقان جۇمىستاردىڭ بارىسىمەن تانىستى.
«كوپىر مەملەكەت باسشىسىنىڭ تاپسىرماسى بويىنشا سالىنىپ جاتىر. ەرتەڭگى كۇنى كوپىر لوگيستيكانى, ءتۋريزمدى, شاعىن جانە ورتا بيزنەستى دامىتۋعا مۇمكىندىك بەرەدى. قازىردىڭ وزىندە مۇندا جاقىن ماڭداعى اۋىلداردىڭ تۇرعىندارى جۇمىس ىستەپ, جاڭا جۇمىس ورىندارى اشىلىپ جاتىر. كوپىردىڭ ءبارىمىز ءۇشىن, ءبىرىنشى كەزەكتە, شالعايداعى شەكارالاس اۋداندارىمىز; كۇرشىم, زايسان جانە تارباعاتاي اۋداندارىنىڭ تۇرعىندارى ءۇشىن ماڭىزى زور. مەن بۇل ستراتەگيالىق ماڭىزدى جوبانى 2024 جىلى اياقتايتىنىمىزعا سەنىمدىمىن», دەدى ەرمەك كوشەرباەۆ.
ەستەرىڭىزگە سالا كەتسەك, قوس جولاقتى اۆتوموبيل كوپىرى كۇرشىم اۋدانىنىڭ قۇيعان اۋىلىنىڭ تۇسىنداعى ەنى ەڭ كىشى ۋچاسكەسىندە سالىنىپ جاتىر. دەگەنمەن, بۇل قازاقستانداعى ەڭ ۇزىن كوپىر بولادى.
قازىرگى ۋاقىتتا 18 تىرەكتىڭ 12-ءسى ورناتىلىپ, التى تىرەكتى ورناتۋ جۇمىستارى جۇرگىزىلىپ جاتىر. بۇدان باسقا, كىرمە جولدار, سۋ وتكىزۋ قۇرىلىستارى مەن اينالما جولدار رەتكە كەلتىرىلۋ باستالعان.
«ەگەر بۇگىنگى تاڭدا كەزەك كۇتۋ ۋاقىتىن ەسەپتەمەگەندە, سۋ قويماسى ارقىلى پاروممەن وتەتىن ۋاقىت 40 مينۋتقا سوزىلسا جانە پاروممەن ءاربىر ءجۇرىپ وتكەنى ءۇشىن كوپ اقشا تولەۋگە تۋرا كەلسە, قۇرىلىس اياقتالعاننان كەيىن سۋ قويماسىن ەكى مينۋتتا عانا كەسىپ وتۋگە بولادى», دەپ اتاپ ءوتتى شىعىس قازاقستان وبلىسىنىڭ اكىمى.
بۇگىنگى تاڭدا نىسان رەسپۋبليكالىق مەنشىككە, ياعني اۆتوموبيل جولدارى كوميتەتىنە تاپسىرىلدى. قۇرىلىس جۇمىستارىنىڭ ساپاسى تۇراقتى باقىلاۋعا الىنعان. جول اكتيۆتەرى ساپاسىنىڭ ۇلتتىق ورتالىعى 14 رەت كەلىپ, 20 سىناما سىناقتان وتكىزدى. بارلىق انىقتالعان ەسكەرتۋ جويىلدى.
بۇگىن كۇرشىم جانە سامار اۋداندارىنىڭ تۇرعىندارى ءبىرىنشى بولىپ تەحنولوگيالىق وتكەل بويىنشا ءبىر جاعالاۋدان ەكىنشى جاعالاۋعا ءوتتى.
