فوتو: gov.kz
زۇلحارناي سەيىتوۆ 1922 جىلى 27 جەلتوقساندا ومبى وبلىسى, جاڭا قىپشاق اۋىلىندا دۇنيەگە كەلگەن. 1942 جىلى قىزىل ارميا قاتارىنا شاقىرىلىپ, سۆەردلوۆسك وبلىسىنداعى تۋرينسك قالاسىنا اسكەري ءىس بويىنشا وقۋعا جىبەرىلەدى. سول جىلى ول لەنينگراد مايدانىنا اتتانىپ, وندا 2-ءشى ەكپىندى ارميا قۇرامىندا شايقاسادى. كەيىننەن ساپەر كۋرستارى بويىنشا ارنايى دايىندىقتان وتەدى. ديۆەرسانتتار مەن ءتارتىپ ساقشىلارىنىڭ ماڭىزدى جاۋىنگەرلىك جۇمىسىن اتقارعان قىزمەتتىك يتتەرمەن ول ستالينگرادتان بەلورۋسسيا مەن پولشا ارقىلى ءوتىپ, بەرلينگە جاسالعان شابۋىلعا قاتىسادى. مايدانگەر ستالينگراد شايقاسىندا قان توگىپ, بەلورۋسسيا مەن پولشانى ازات ەتتى, بەرلينگە جەتىپ, پوتسدام كوشەلەرىن مينادان تازارتۋعا قاتىستى. جاۋىنگەرلىك ەڭبەگى ءۇشىن كوپتەگەن مەدالدارمەن ماراپاتتالدى.
سوعىستان كەيىن زۇلحارناي سەيىتوۆ ومبى اۋىل شارۋاشىلىعى ينستيتۋتىن ءتامامداپ, قازاقستانعا جىبەرىلەدى. مۇندا ول بيولوگيا عىلىمدارىنىڭ دوكتورى جانە اكادەميك بولدى. ارىپتەستەرىمەن بىرگە «قازاق بالزامى» جانە «التىنسۋ» ەمدىك سۋسىندارىن ازىرلەۋگە قاتىستى. قىمىز, شۇبات, بيە جانە تۇيە ءسۇتىن قۇرعاق دايىنداۋ تەحنولوگيالارىن جاسادى.
ەڭبەك سىڭىرگەن عىلىم قايراتكەرى زۇلحارناي سەيىتوۆ 150-دەن استام عىلىمي جۇمىستار مەن مونوگرافيالاردىڭ, 14 پاتەنت پەن 8 اۆتورلىق كۋالىكتىڭ, 10 وقۋ قۇرالىنىڭ, ونىڭ ىشىندە قازاق, ورىس, اعىلشىن تىلدەرىندەگى «بيوحيميا» وقۋلىعىنىڭ اۆتورى. ونىڭ كوپتەگەن ازىرلەمەلەرى مەن جاڭالىقتارى مەديتسينادا دا, تاماق ونەركاسىبىندە دە كەڭىنەن قولدانىلادى.
