بۋراباي قىستا دا قىزىقتى

بىرەر كۇن بۇرىن ايماقتىڭ ءتۋريز­مىن دامىتۋعا ۇلەس قوسىپ جۇرگەن «بۋرا­باي دامۋ» سەرىكتەستىگىمەن قوسا «Visit Aqmola» تۋريستىك اقپاراتتىق ورتالىعىنىڭ ماماندارى باستاپ, ءبىر توپ جۋرناليست بۋرابايداعى قىس ماۋسىمىن تاماشالادىق.

«بۋراباي دامۋ» سەرىكتەستىگى – پرە­زيدەنت ءىس باسقارماسىنا قاراستى كومپانيا. سەگىز جىلدان بەرى ششۋچينسك – بۋرا­باي كۋرورتتىق ايماعىنداعى ءتۋريزمدى دامىتۋ مىندەتىن جەمىستى اتقارىپ كەلەدى. دەمالىس ورنىنداعى نىسانداردى كۇتىپ ۇستاپ, ساپالى قىزمەت كورسەتەدى.

ساپار بارىسىندا اۋدان ورتالىعى­نان شامامەن 10 شاقىرىم قاشىق جاتقان پرەزيدەنت ءىس باسقارماسى «بۋرا­باي» ۇلتتىق پاركىنىڭ مارال وسى­رە­­تىن شارۋاشىلىعىنا ايالدادىق. مۇن­دا ءمۇيىزى مەن ءسۇتى مىڭ دا ءبىر سىر­قات­قا ەم مارال شارۋاشىلىعىنىڭ تىنىس-تىرشىلىگى كوپتى قىزىقتىرادى. شارۋا­شى­لىقتاعى مامانداردىڭ اي­تۋىن­شا, وسى ماڭدى مەكەندەيتىن مارال­دىڭ­ تارعىل بۇعى تۇقىمداسى قىزىل كىتاپ­قا ەنگەن. ورمانشىلار ءجۇرىسى قيىن­داپ, قالجىراعان مارالدى توپتان ءبولىپ, ەمدەيدى. بۇگىندە شارۋاشىلىقتا 200 باس شاماسىن­دا مارال بار. ولار 600 گەك­تار اۋماق­تى الىپ جاتقان قالىڭ ورمان القا­بىن مەكەندەيدى. وسى ماڭداعى پانتو­­تەراپيا ورتالىعىندا شيپالى ءدارى-دارمەكتىڭ نەبىر ءتۇرى جاسالادى ەكەن.

«بۋراباي» مەملەكەتتىك ۇلتتىق پاركىنە قاراستى 10 ورمان شارۋاشىلىعى بار بولسا, ءبىز سونىڭ ىشىندەگى «ميرنىي» ورمان شارۋاشىلىعىنا ايالدادىق. وندا 30 جىلدىق تاجىريبەسى بار ورمانشى باۋىرجان مۇقانوۆ باستاعان بىرنەشە جۇمىسشى بۇعى, ەلىك سىندى اڭداردىڭ ازىعىن قامداپ ءجۇر ەكەن. ءيا, ورمان شارۋاشىلىعىندا قىزىل كىتاپقا ەنگەن وسىمدىكتەر جويىلىپ كەتۋدىڭ از-اق الدىندا تۇرعان اڭ-قۇستى قورعاۋ – وڭاي شارۋا ەمەس. ويتكەنى قاسقىر سەكىلدى جىرتقىش اڭدار شامادان تىس كوبەيسە, وزگە جانۋارلاردىڭ سانىن كۇرت ازايتۋى مۇمكىن عوي. «ميرنىي» ورمان شارۋاشىلىعىنىڭ اۋماعى 18 394 گەكتار بولسا, ءار گەكتاردا ءبىر-ءبىر استاۋدان قويىلعان.

قىسقى ءشوبىن باستىرمالاردا جيىپ دايىنداعان ورمانشىلارعا تابىس تىلەپ, كۋرورتتىق ايماقتاعى «قازاقستان لاپلاندياسىنا» اياڭدادىق. قىس ماۋ­سىمىندا اياز اتا رەزيدەنتسياسىنىڭ اۋماعىنا كەلگەن ۇلكەن-كىشىلەرگە بۇعى, حاسكي يتتەرىن جەككەن شانامەن, اتشانامەن سەرۋەندەۋگە بولادى. ەرتەگىلەردە كەزدەسەتىن باقسىنىڭ دا ءۇيى – وسى ماڭدا. زاۋ بيىكتەن شانامەن زۋلاپ, كونكي, شاڭعى تەبۋگە كەلگەندەرگە جاعداي جاسالعان. بۇل ماڭدا قاردا جۇرەتىن كولىكتەر دە جۇيىتكيدى. ەڭ باستىسى, قىزمەت كورسەتۋ ساپاسى جاقسارعان.

اقمولا وبلىسى بۇرىننان تۋريزمگە تاپتىرمايتىن وڭىرلەردىڭ ءبىرى سانالادى. وتكەن 8 اي بويىنشا ايتار بولساق, وبلىس اۋماعىنا كەلگەن تۋريستەردىڭ سانى شامامەن 956,7 مىڭعا جەتكەن. ونىڭ ىشىندە 17,2 مىڭ قوناق كۋرورتتى اۋماققا دەمالۋعا كەلسە, مەملەكەتتىك ۇلتتىق پارككە 535,3 مىڭ ادام ايالداعان. جىل سوڭىنا دەيىن تۋريستەر سانى 1,2 ميلليوننان اسادى دەگەن بولجام دا بار. ونىڭ ىشىندە ەل ازاماتتارىنىڭ ۇلەسى – 940,8 مىڭ ادام شاماسىندا. ال قاڭتار-قىركۇيەك ارالىعىندا كۋرورتتىق ايماققا 15 838 شەتەلدىك تۋريست كەلگەن. ەندى جاقىن بەرىدە اقمولا وبلىسىنىڭ تۋريزم باسقارماسى «Visit Aqmola» تۋريستىك اقپاراتتىق ورتالىعىمەن بىرلەسىپ بۋرابايدا «مۇز قالاشىعى» فەستيۆالىن وتكىزۋگە نيەتتەنىپ وتىر ەكەن. ءبىز ءداستۇرلى ءىس-شارا ايماققا تۋريستەردى تارتۋدىڭ تاعى ءبىر ءساتتى قادامى دەپ تۇيدىك.

اقمولا وبلىسى